Read Pashto (Nangahari) — د پښتو مقدس کتاب اول سموئيل 22 Bible Online

اول سموئيل 22 - Pashto (Nangahari) — د پښتو مقدس کتاب bible

اول سموئيل 22

¹داود د جت څخه لاړ او د ادولام سمڅې ته وتښتېد. کله چې د هغه ورونو او د هغه پاتې کورنۍ واورېدل چې هغه هلته دی، نو دوی هلته د هغه سره یوځای شول.

²هغه خلک چې په تکلیف کې وو یا پوروړي وو یا شکایت یې درلود داود ته راټول شول او هغه د دوی مشر شو. شاوخوا څلورسوه سړي د هغه سره وو.

³داود له هغه ځای څخه د موآب مصفې ښار ته لاړ او د موآب پادشاه ته یې وویل: ”اعلیحضرته! آیا زما مور او پلار ته اجازه ورکوئ چې راشي او ستاسو سره پاتې شي تر هغې پورې چې زه پوه شم چې خدای به زما دپاره څه کوي؟“

⁴نو داود خپل مور او پلار د موآب پادشاه ته بوتلل او دوی د هغه سره تر هغه وخته پورې پاتې شول ترڅو پورې چې داود په محفوظ ځای کې پټ ؤ.

⁵یوه ورځ جاد نبي داود ته وویل: ”دلته مه پاتې کېږه، د یهودا خاورې ته لاړ شه.“ نو داود لاړ او د حارث ځنګل ته ورغی.

⁶یوه ورځ شائول په جبعه کې په یوه غونډۍ باندې د غز د ونې لاندې نېزه په لاس ناست ؤ او ټول افسران یې د هغه په شاوخوا کې ولاړ وو. هغه ته خبر ورغی چې داود او د هغه سړي پیدا شول.

⁷هغه خپلو افسرانو ته وویل: ”ای د بنیامین خلکو! واورئ، آیا د یسي زوی به تاسو ټولو ته ځمکې او د انګورو باغونه درکړي؟ آیا هغه به تاسو د زر کسیزه ډلې قوماندانان او یا د سل کسیزه ډلې قوماندانان وټاکي؟

⁸آیا د دې دپاره تاسو زما په ضد دسیسه جوړوئ؟ تاسو یو هم ماته ونه ویل چې زما خپل زوی د داود سره لاس یو کړی دی. هیڅوک نشته چې په ما زړه وسوزي یا ماته ووایي چې زما خپل سړی داود همدا اوس زما د وژلو دپاره فرصت لټوي او زما زوی هغه هڅولی دی!“

⁹مګر ادومي دواغ چې د شائول د افسرانو سره ولاړ ؤ وویل: ”ما د یسي زوی ولید چې په نوب کې د اخیتوب زوی اخیملک ته راغی.

¹⁰اخیملک د څښتن څخه پوښتنه وکړه چې داود باید څه وکړي او وروسته هغه داود ته یو څه خواړه او د فلسطیني جلیات توره ورکړه.“

¹¹نو شائول پادشاه د اخیتوب زوی اخیملک کاهن او د هغه د پلار ټوله کورنۍ چې هغوی هم په نوب کې کاهنان وو راوغوښتل او د ده حضور ته حاضر شول.

¹²شائول وویل: ”ای د اخیتوب زویه، واوره!“ هغه ځواب ورکړ: ”هو، زما باداره.“

¹³شائول د هغه څخه پوښتنه وکړه: ”تا او د یسي زوی ولې زما په ضد دسیسه جوړه کړې ده؟ ولې دې هغه ته ډوډۍ او توره ورکړې ده او د هغه دپاره دې د خدای سره مشوره کړې ده؟ هغه اوس زما په ضد راپورته شوی او فرصت لټوي چې ما ووژني!“

¹⁴اخیملک په ځواب کې وویل: ”ستاسو په افسرانو کې داود ترټولو وفادار دی! هغه ستاسو زوم دی، ستاسو د ساتونکو مشر دی او په شاهي دربار کې هر یو د هغه درناوی کوي.

¹⁵هو، ما د هغه دپاره د خدای سره مشوره کړې ده او دا لومړی ځل نه دی. تر کومه ځایه چې ستاسو په ضد د دسیسې خبره ده، نو تاسو اعلیحضرت باید په ما او همدارنګه زما په کورنۍ باندې تور ونه لګوئ، د دې خبرې څخه زه هیڅ خبر نه یم!“

¹⁶پادشاه وویل: ”ای اخیملکه! ته او ستا د پلار ټوله کورنۍ باید ووژل شي.“

¹⁷په دې وخت کې پادشاه هغه ساتونکو ته چې د ده په څنګ کې وو حکم وکړ: ”د څښتن کاهنان ووژنئ، ځکه چې دوی هم د داود پلویان دي. دوی پوهېدل چې هغه تښتي خو بیاهم دوی زه خبر نه کړم.“ مګر د پادشاه ساتونکو ونه غوښتل چې د څښتن په کاهنانو باندې لاس پورته کړي او هغوی ووژني.

¹⁸نو شائول ادومي دواغ ته وویل: ”ته هغوی ووژنه!“ او دواغ هغوی ټول ووژل. په هغه ورځ یې پنځه اتیا کاهنان چې کتاني مقدس پېشبندونه به یې اغوستل، ووژل.

¹⁹وروسته نوب د کاهنانو ښار ته لاړ او د کاهنانو کورنۍ د ښځو او سړیو نه نیولې تر کوچنیانو او تي رودونکو ماشومانو پورې یې ټول ووژل. حتیٰ غوایان، خره او د هغوی پسونه یې هم ژوندي پرېنښودل.

²⁰مګر ابیاتار چې د اخیملک د زامنو ‎څخه او د اخیتوب لمسی ؤ وتښتېد او لاړ چې د داود سره یوځای شي.

²¹هغه داود ته خبر ورکړ چې شائول د څښتن کاهنان ووژل.

²²داود ابیاتار ته وویل: ”کله چې ما په هغه ورځ ادومي دواغ هلته ولید زه پوه شوم چې هغه به خامخا شائول ته خبر ورکوي. نو ستا د ټولو خپلوانو د مړینې مسئولیت زما په غاړه دی.

²³زما سره پاتې شه او مه وېرېږه. هغه سړی چې غواړي تا ووژني، هغه غواړي چې ما هم ووژني. ته به زما سره خوندي یې.“