Read Pashto (Nangahari) — د پښتو مقدس کتاب اول سموئيل 23 Bible Online

اول سموئيل 23 - Pashto (Nangahari) — د پښتو مقدس کتاب bible

اول سموئيل 23

¹یوه ورځ داود ته خبر ورسېد چې فلسطینیانو د قعیلې په ښار باندې حمله کړې ده او درمندونه لوټوي.

²نو هغه د څښتن څخه پوښتنه وکړه: ”آیا زه لاړ شم او په فلسطینیانو باندې حمله وکړم؟“ څښتن ځواب ورکړ: ”هو، په هغوی باندې حمله وکړه او قعیله وژغوره.“

³مګر د داود نفرو هغه ته وویل: ”مونږ دلته په یهودا کې وېرېږو، نو که د فلسطینیانو د ځواکونو مقابلې دپاره قعیلې ته لاړ شو نو زمونږ وېره به نوره هم زیاته شي.“

⁴داود یو ځل بیا د څښتن څخه پوښتنه وکړه او څښتن هغه ته ځواب ورکړ: ”قعیلې ته لاړ شه ځکه چې زه به فلسطینیان تاته تسلیم کړم.“

⁵نو داود د خپلو سړیو سره قعیلې ته لاړ او د فلسطینیانو په ځواکونو باندې یې برید وکړ. د هغو څخه یې زیات ووژل او د هغوی څاروي یې یوړل. په دې ډول داود د قعیلې ښار وژغوره.

⁶کله چې ابیاتار د اخیملک زوی وتښتېد او په قعیله کې د داود سره یوځای شو، مقدس پېشبند یې له ځان سره راوړ.

⁷شائول ته خبر ورسېد چې داود قعیلې ته تللی دی، هغه وویل: ”خدای هغه ماته راتسلیم کړ. داود خپل ځان د دېوال او د قوي دروازو په لرونکي ښار کې کلابند کړی دی.“

⁸نو شائول خپل ټول ځواکونه د جګړې دپاره راوغوښتل چې قعیلې ته لاړ شي او داود او د هغه سړي محاصره کړي.

⁹کله چې داود واورېدل چې شائول په هغه باندې د حملې کولو نیت لري، هغه ابیاتار کاهن ته وویل: ”مقدس پېشبند دلته راوړه.“

¹⁰داود دعا وکړه: ”ای څښتنه! د اسراییلو خدایه، ما اورېدلي دي چې شائول نیت لري چې قعیلې ته راشي او ښار زما یعنې ستا د غلام په خاطر له منځه یوسي.

¹¹آیا د قعیلې ښاریان به ما شائول ته وسپاري؟ آیا لکه څنګه چې مې اورېدلي دي شائول به په رښتیا سره راشي؟ ای څښتنه، د اسراییلو خدایه، زه تاته زاري کوم چې ځواب راکړه!“ څښتن ځواب ورکړ: ”شائول به راشي.“

¹²داود پوښتنه وکړه: ”آیا د قعیلې ښاریان به ما او زما سړي شائول ته وسپاري؟“ څښتن وویل: ”هغوی به تاسو وسپاري.“

¹³نو داود او د هغه سړي چې شمېر یې شپږسوه تنه وو د قعیلې څخه لاړل او د یو ځای څخه به بل ځای ته تلل. کله چې شائول ته خبر ورسېد چې داود د قعیلې څخه تښتېدلی دی، نو هغه خپل د تګ پلان پرېښود.

¹⁴داود د زیف د دښتې په غرنۍ سیمه کې په محفوظو ځایونو کې اوسېده. شائول تل هڅه کوله چې هغه پیدا کړي، مګر خدای داود هغه ته په لاس نه ورکاوه.

¹⁵کله چې داود په حورش کې د زیف په دښته کې ؤ، هغه پوه شو چې شائول د هغه د وژلو دپاره راوتلی دی.

¹⁶د شائول زوی یوناتان حورش ته د داود لیدلو له ورغی او هغه ته یې ډاډ ورکړ چې خدای ستا مل دی.

¹⁷یوناتان وویل: ”مه وېرېږه، زما پلار به ونه شي کولی چې تا پیدا کړي. ته به په اسراییلو باندې پادشاه شې او زه به په رتبه کې ستا نه دوهم یم، زما پلار شائول هم په دې باندې پوهیږي.“

¹⁸هغوی دواړو د څښتن په حضور کې تړون وکړ. وروسته بیا یوناتان کور ته لاړ مګر داود په حورش کې پاتې شو.

¹⁹د زیف خلک شائول ته چې په جبعې کې اوسېده لاړل او ورته ویې ویل: ”داود زمونږ په سیمه کې، په حورش کې د حخیله په غره کې چې د یهودا د دښتې په جنوب کې پروت دی، پټ شوی دی.

²⁰اعلیحضرته! اوس نو کله چې ستاسو خوښه وي راشئ او مونږ د دې مسئولیت په غاړه لرو چې هغه تاسو ته وسپارو.“

²¹شائول ځواب ورکړ: ”څښتن دې تاسو ته برکت درکړي ځکه چې تاسو په ما باندې ډېره مهرباني کوئ.“

²²شائول زیاته کړه: ”لاړ شئ، نور تیاری هم ونیسئ او معلومه کړئ چې داود د عادت له مخې چېرته ځي او چا دی په هغه ځای کې لیدلی دی. ما اورېدلي دي چې هغه ډېر مکرجن دی.

²³د هغه د پټېدلو ټول ځایونه معلوم کړئ او د واضیح معلوماتو سره بېرته ماته راشئ. وروسته له هغې به زه ستاسو سره لاړ شم، که چېرې د یهودا د سیمې په هر خېل کې وي زه به یې پیدا کړم.“

²⁴نو دوی رخصت شول او د شائول څخه مخکې زیف ته لاړل. داود او د هغه نفر د معون په دښته کې وو یعنې د یهودا د دښتې د جنوبي برخې په یوې درې کې.

²⁵شائول او د هغه نفرو په لټولو شروع وکړه، کله چې داود ته په دې هکله خبر ورسېد هغه یو لوی ګټ ته چې د معون په دښته کې ؤ لاړ او هلته پاتې شو. کله چې شائول دا واورېدل، داود پسې د معون دښتې ته لاړ.

²⁶شائول د یو غره یوه اړخ ته او داود او د هغه سړي د غره بل اړخ ته تلل او بیړه یې کوله چې د شائول څخه وتښتي. څنګه چې شائول او د هغه ځواکونه داود او د هغه سړیو ته نژدې کېدل چې دوی ونیسي،

²⁷یو استازی شائول ته راغی او ویې ویل: ”ژر راشه! فلسطینیانو زمونږ په خاورې یرغل کړی دی.“

²⁸نو شائول د داود تعقیبول پرېښودل او لاړ چې د فلسطینیانو سره وجنګیږي. له دې کبله دا ځای د تېښتې د ګټ په نوم یاد شو.

²⁹داود لاړ او د عین جدي په محفوظ ځای کې اوسېده.