Read Pashto (Nangahari) — د پښتو مقدس کتاب اول سموئيل 25 Bible Online

اول سموئيل 25 - Pashto (Nangahari) — د پښتو مقدس کتاب bible

اول سموئيل 25

¹هغه وخت راورسېد چې سموئیل مړ شو. ټول اسراییلیان راغونډ شول او د هغه دپاره یې ویر وکړ. هغه یې په رامه کې په خپله ځمکه کې ښخ کړ. وروسته له هغه داود د فاران دښتې ته لاړ.

²۲‏-۳ په هغه ځای کې د کالیب د خېل څخه یو سړی ؤ چې نابال نومېده. هغه د معون د ښار څخه ؤ او د کرمل ښار ته نژدې یې خپله ځمکه درلودله. نابال ډېر شتمن سړی ؤ او درې زره پسونه او زر وزې یې درلودلې. د هغه ښځه ابیجایل ښکلې او هوښیاره وه مګر نابال سخت او بد خویه سړی ؤ. نابال په کرمل کې خپل پسونه سکولودل

⁴او داود چې هغه وخت په دښته کې ؤ دا خبره یې واورېدله.

⁵نو لس تنه ځوانان یې د دې امر سره واستول چې کرمل ته لاړ شي، نابال پیدا کړي او د ده سلامونه هغه ته ورسوي.

⁶داود هغوی ته امر وکړ چې نابال ته ووایي: ”خوشاله او ژوندی اوسئ! تاسو ته او ستاسو کورنۍ ته ښه روغتیا غواړم! هغو ټولو ته چې ستاسو سره دي هم روغتیا غواړم!

⁷ما واورېدل چې د پسونو د سکولودلو وخت دی. کله چې ستاسو شپانه زمونږ سره وو، مونږ د هغوی سره بده رویه نه وه کړې. ټول وخت چې هغوی په کرمل کې وو د هغوی څخه هیڅ شی ورک نه شو.

⁸د خپلو خدمتګارانو څخه پوښتنه وکړئ او دوی به درته ووایي. نن خاصه ورځ ده. له دې کبله زما د ځوانانو سره مهربانه اوسئ. لطف وکړئ څه چې راکولی شئ مونږ او خپل زوی داود ته یې ورکړئ.“

⁹د داود نفر راورسېدل او د داود په نوم یې نابال ته پیغام ورکړ. بیا هغوی د ځواب دپاره منتظر شول.

¹⁰نابال د داود خدمتګارانو ته په ځواب کې وویل: ”داود څوک دی؟ د یسي زوی څه کار کوي؟ په دې ورځو کې ډېر نوکران د خپلو بادارانو څخه تښتي.

¹¹آیا هغه ډوډۍ، اوبه او غوښه چې د خپلو پسونو سکولودونکو دپاره مې تیار کړي دي واخلم او هغو خلکو ته یې ورکړم، چې زه یې نه پېژنم د کوم ځای څخه راغلي دي؟“

¹²نو د داود خدمتګاران بېرته هغه ته ورغلل او هرڅه چې نابال ویلي وو ورته بیان یې کړل.

¹³داود خپلو نفرو ته امر وکړ: ”خپلې تورې له ملا وتړئ!“ نو دوی خپلې تورې وتړلې او داود خپله توره وتړله. شاوخوا څلور سوه نفره د داود سره لاړل او دوه سوه نفره د لوازمو سره پاتې شول.

¹⁴د نابال د خدمتګارانو څخه یو نفر د نابال ښځې ابیجایل ته وویل: ”آیا تا اورېدلي دي؟ داود د دښتې څخه ځینې استازي زمونږ بادار ته رالېږلي وو چې د هغه سلامونه ورته ورسوي مګر نابال دوی سپک کړل.

¹⁵بیاهم د داود سړي زمونږ سره ډېر ښه وو. هغوی زمونږ سره بده رویه نه ده کړې او ټوله موده چې په دښتې کې د هغوی سره نژدې وو زمونږ هیڅ شی ورک نه شو.

¹⁶په ټوله موده کې چې مونږ د دوی تر څنګ رمې څرولې، لکه د دېوال په شان یې شپه او ورځ زمونږ ساتنه کوله.

¹⁷اوس په دې باره کې فکر وکړه او وګوره چې ته څه کولای شې، ځکه چې زمونږ په بادار او د هغه په ټوله کورنۍ باندې مصیبت راروان دی. هغه دومره بد خویه سړی دی چې هیڅوک ورسره خبرې نه شي کولای.“

¹⁸ابیجایل وخت له لاسه ورنه کړ، هغې دوه سوه دانې ډوډۍ، د شرابو دوه ژي، پنځه تیار شوي پسونه، پنځه پیمانې وریتې شوې غلې دانې، د ممیزو سل کلچې او د وچ شویو اینځرو دوه سوه کلچې یې واخیستلې او هغه یې په خرو باندې بار کړې.

¹⁹وروسته بیا هغې خپلو خدمتګارانو ته وویل: ”تاسو مخکې لاړ شئ او زه درپسې ځم.“ مګر هغې خپل میړه نابال ته څه ونه ویل.

²⁰هغه په خپل خره باندې سپره وه او د غره لمنې ته راکوزېدله چې ناڅاپه یې داود او د هغه نفر ولیدل چې د هغې خواته راروان وو.

²¹داود لږ مخکې ویلي وو: ”دا بې فایدې وه چې د دې سړي شتمني مې په دې دښته کې وساتله، چې د هغه هیڅ شی ورک نه شو. هغه د ښو په بدل کې راسره بد وکړل.

²²خدای دې ما ووژني که چېرې زه د سهار څخه مخکې د نابال خلکو څخه آخري نارینه هم ونه وژنم.“

²³کله چې ابیجایل داود ولید، هغه په بیړه د خپل خره څخه راکوزه شوه او د هغه د درناوي په خاطر ځمکې ته ټیټه شوه.

²⁴هغه د داود پښو ته پرېوتله او ویې ویل: ”ای زما باداره، پرېږدئ چې ملامتي یوازې په ما باندې وي. خپلې خدمتګارې ته اجازه ورکړئ چې خبرې درسره وکړم، واورئ چې ستاسو خدمتګاره څه وایي.

²⁵زما بادار دې دغه بې کاره سړي نابال ته توجه نه کوي، هغه کټ مټ د خپل نوم په شان احمق سړی دی! ای باداره، کله چې ستاسو خدمتګاران راورسېدل زه په هغه ځای کې نه وم.

²⁶دا څښتن دی چې تاسو یې د خپلو دښمنانو څخه د بدل اخیستلو او وژلو څخه منع کړي یئ. اوس زه تاسو ته د ژوندي څښتن په نوم او ستاسو په سر قسم خورم چې ستاسو دښمنان او هغوی چې غواړي تاسو ته زیان ورسوي لکه د نابال په شان به سزا ومومي.

²⁷مهرباني وکړئ، دغه سوغات چې تاسو ته مې راوړی دی قبول کړئ او خپلو سړیو ته یې ورکړئ.

²⁸ای ښاغلیه، هیله لرم کومه خطا چې زما څخه شوې ده هغه راته وبخښئ. څښتن به تاسو او همدارنګه ستاسو اولاده هم پادشاهان کړي، ځکه چې تاسو د هغه دپاره جنګېږئ او ترڅو پورې چې ژوندي یئ، بد کار به ونه کړئ.

²⁹که چېرې څوک په تاسو باندې حمله وکړي او ستاسو د وژلو هڅه وکړي، ستاسو څښتن خدای به تاسو داسې خوندي وساتي لکه څوک چې د یوې قیمتي خزانې ساتنه کوي. خو ستاسو دښمنان به لېرې ګوزار کړي لکه څنګه چې څوک تیږه په مچنوغزه باندې ګوزاروي.

³⁰او څه وخت چې څښتن هغه ټول ښه کارونه چې ستاسو سره یې وعده کړې سرته ورسوي او تاسو د اسراییلو مشر وټاکي،

³¹نو باداره! ستاسو وجدان به د بې ځایه وژنې یا د بدلې اخیستلو د پښېمانۍ احساس نه کوي. او کله چې څښتن تاسو ته بری درکړي نو ما هېره نه کړئ.“

³²داود ابیجایل ته وویل: ”د اسراییلو د څښتن خدای ثناه دې وي چې نن ورځ یې ته زما د لیدلو دپاره راواستولې!

³³ستا د ښه قضاوت دپاره دې د خدای شکر وي چې زه دې نن ورځ د وینې تویولو او زما په خپل لاس د بدلې اخیستلو څخه وساتلم.

³⁴څښتن پرېنښودم چې تاته زیان ورسوم. مګر زه د اسراییلو د ژوندي خدای په نوم قسم خورم چې که چېرې تا زما د لیدلو دپاره بیړه نه وای کړې، نو تر سهاره پورې به د نابال ټول نارینه وژل شوي وای!“

³⁵وروسته بیا داود هغه څه قبول کړل چې هغه ته یې راوړي وو او ورته ویې ویل: ”په خیر سره خپل کور ته لاړه شه، ستا خبرې مې واورېدلې او ستا غوښتنه مې ومنله.“

³⁶ابیجایل بېرته نابال ته ورغله، هغه په کور کې ؤ او یوه داسې میلمستیا یې جوړه کړې وه لکه څنګه چې د پادشاه دپاره جوړیږي. هغه نېشه ؤ او خوشاله ؤ. نو هغې تر سبا سهاره پورې ده ته هیڅ څه ونه ویل.

³⁷نو وروسته له هغې چې نابال په سهار کې د نېشې څخه په حال شو، هرڅه چې پېښ شوي وو، هغې ورته وویل. په هغه باندې د زړه حمله راغله او هغه بېخي فلج شو.

³⁸نابال لس ورځې په همدې حال کې ؤ او وروسته څښتن د هغه ژوند پای ته ورساوه.

³⁹کله چې داود واورېدل چې نابال مړ شو، هغه وویل: ”د څښتن ثناه دې وي! هغه د نابال څخه زما د سپکاوۍ بدله واخیسته او زه یې د بد کار څخه وساتلم. څښتن نابال ته د خپلو بدیو سزا ورکړه.“ وروسته له هغې داود ابیجایل ته پیغام واستاوه او غوښتنه یې ورڅخه وکړه چې د ده سره واده وکړي.

⁴⁰د هغه خدمتګاران کرمل ته لاړل او ابیجایل ته یې وویل: ”داود مونږ تاته رالېږلي یو چې تا د ځان سره بوزو چې د هغه سره واده وکړې.“

⁴¹ابیجایل په ځمکه باندې پړمخې پرېوتله او ویې ویل: ”داود ته داسې ووایئ: زه ستا وینځه دې ته تیاره یم چې ستاسو خدمت وکړم او ستا د خدمتګارانو پښې ووینځم.“

⁴²هغه ژر پاڅېده او په خپل خره باندې سپره شوه. پنځه وینځې یې ورسره روانې شوې، هغه د داود د خدمتګارانو سره لاړله او په دې ترتیب د هغه ښځه شوه.

⁴³همدارنګه داود د اخینوعم سره چې د یزرعیل څخه وه هم واده کړی ؤ او دوی دواړه د هغه ښځې شوې.

⁴⁴خو شائول خپله لور میکال چې د داود ښځه وه فلتي د لایش زوی ته چې د جلیم څخه ؤ ورکړه.