Read Pashto (Nangahari) — د پښتو مقدس کتاب اول سموئيل 27 Bible Online

اول سموئيل 27 - Pashto (Nangahari) — د پښتو مقدس کتاب bible

اول سموئيل 27

¹خو داود د خپل ځان سره فکر وکړ: ”یوه ورځ به شائول ما ووژني، زما دپاره ترټولو ښه خبره دا ده چې د فلسطینیانو خاورې ته وتښتم. نو شائول به په اسراییلو کې زما د لټون څخه لاس واخلي او زه به د هغه له لاسه خلاص شم.“

²نو داود د خپلو شپږسوه نفرو سره د اسراییلو د سرحد څخه تېر شو او د جت پادشاه آخیش ته چې د معوک زوی ؤ ورغی.

³داود او د هغه نفر په جت کې د آخیش سره ځای په ځای شول. د هر سړي سره خپله کورنۍ وه. همدارنګه د داود سره خپلې دوه ښځې یعنې یزرعیلي اخینوعم او د نابال کونډه ابیجایل کرملي وې.

⁴کله چې شائول واورېدل چې داود جت ته تښتېدلی دی، هغه د داود د لټولو هڅه پرېښوده.

⁵داود آخیش ته وویل: ”که زما څخه خوشاله یئ ماته یو وړوکی ښار راکړئ چې په کې واوسېږم. باداره! زما دپاره دا لازمه نه ده چې ستاسو سره په پایتخت کې واوسېږم.“

⁶نو آخیش په هغه ورځ داود ته د صقلغ ښار ورکړ او له دې کبله د صقلغ ښار تر نن ورځې پورې د یهودا د پادشاهانو دی.

⁷داود یو کال او څلور میاشتې د فلسطینیانو په خاوره کې ژوند وکړ.

⁸په دې دوران کې به داود او د هغه نفرو په جشوریانو، جرزیانو او عمالیقیانو باندې حملې کولې. دغه قومونه د ډېرې اوږدې مودې راپدېخوا په هغه خاوره کې چې د شور څخه تر مصر پورې رسېده اوسېدل.

⁹کله به چې داود په یوې سیمې باندې حمله کوله نو یو سړی یا ښځه به یې هم ژوندی نه پرېښود. همدارنګه د هغوی پسونه، غوایان، خره، اوښان او حتیٰ کالي به یې اخیستل. بیا به بېرته آخیش ته راستنېده.

¹⁰کله به چې آخیش پوښتنه کوله: ”دا ځل دې په کوم ځای باندې یرغل کړی دی؟“ داود به ورته ویل: ”زه د یهودا جنوبي برخې ته“ یا ”د یرحمئیل سیمې ته“ یا ”هغې سیمې ته تللی وم چې قینیان په کې اوسیږي.“

¹¹داود به هر یو سړی او ښځه وژل، ترڅو چې هیڅوک ونه شي کولای بېرته جت ته لاړ شي او خبر ورکړي چې داود او د هغه سړیو په رښتیا سره څه کړي دي. تر هغه وخته پورې چې داود په فلسطین کې اوسېده همداسې به یې کول.

¹²آخیش په داود باندې باور کاوه او د ځان سره به یې ویل: ”د هغه خپل قوم اسراییل د هغه څخه دومره زیاته کرکه کوي، چې هغه به ټول عمر زما خدمت کوي.“