Read Pashto (Nangahari) — د پښتو مقدس کتاب اول سموئيل 28 Bible Online

اول سموئيل 28 - Pashto (Nangahari) — د پښتو مقدس کتاب bible

اول سموئيل 28

¹په هغو ورځو کې فلسطینیانو خپل ځواکونه راغونډ کړل چې د اسراییلو سره جنګ وکړي. آخیش داود ته وویل: ”ته باید پوه شې چې ته او ستا سړي باید زما د لښکرو سره ملګرتیا وکړئ.“

²داود وویل: ”تاسو به په خپله ووینئ چې ستاسو نوکر څه کولی شي.“ آخیش ځواب ورکړ: ”ډېر ښه، زه به تا ټول عمر خپل ساتونکی وټاکم.“

³په دې وخت کې سموئیل مړ شوی ؤ او ټولو اسراییلیانو د هغه دپاره ویر کړی ؤ او هغه یې په خپل ښار یعنې رامه کې ښخ کړی ؤ. شائول کوډګران او هغه خلک چې د مړو د ارواحګانو سره خبرې کولې د اسراییلو څخه شړلي وو.

⁴د فلسطینیانو لښکرې سره راټولې شوې او د شونیم ښار ته نژدې یې خېمې ودرولې. شائول ټول اسراییلیان راغونډ کړل او د جلبوع په غره کې یې خېمې ودرولې.

⁵کله چې شائول د فلسطینیانو ځواکونه ولیدل هغه ووېرېد او زړه یې سخت رپېده.

⁶نو هغه د څښتن څخه پوښتنه وکړه چې څه وکړي، مګر څښتن هغه ته نه د خوبونو، نه د اوریم په استعمالولو او نه د نبیانو په وسیله ځواب ورکړ.

⁷نو شائول خپلو درباریانو ته حکم وکړ: ”ماته یوه ښځه راپیدا کړئ چې کوډګره وي او د مړو د ارواحګانو سره مشورې کوي چې زه هغې ته ورشم او ورڅخه پوښتنه وکړم.“ هغوی ځواب ورکړ: ”د عین دور په ښار کې یوه کوډګره ښځه شته.“

⁸نو شائول خپله څېره بدله کړه، نور کالي یې واغوستل او د خپلو دوه نفرو سره د شپې په تیاره کې هغې ښځې ته ورغی. هغه ورته وویل: ”زما دپاره د ارواحګانو سره مشوره وکړه او ماته ووایه چې څه کېدونکي دي. هغه سړی ماته راوغواړه چې زه یې نوم درته وایم.“

⁹مګر ښځې هغه ته وویل: ”بېشکه ته پوهېږې چې شائول څه کړي دي، هغه کوډګران او هغه څوک چې د مړو د ارواحګانو سره خبرې کوي د هېواد څخه شړلي دي. ولې دې راته دام ایښی دی چې ومې وژنې؟“

¹⁰شائول هغې ته د ژوندي څښتن په نوم باندې قسم وخوړ او ویې ویل: ”په دې کار به ته سزا ونه مومې.“

¹¹نو ښځې پوښتنه وکړه: ”څوک درته راوغواړم؟“ هغه وویل: ”سموئیل راته راوغواړه.“

¹²کله چې هغې ښځې سموئیل ولید، په لوړ اواز یې چیغې ووهلې. هغې شائول ته وویل: ”زه دې ولې وغولولم؟ ته شائول یې!“

¹³پادشاه هغې ته وویل: ”مه وېرېږه! څه شی وینې؟“ ښځې په ځواب کې وویل: ”زه یوه ارواح وینم چې د ځمکې څخه بیرون راوزي.“

¹⁴هغه پوښتنه وکړه: ”هغه د څه شي په شان ښکاري؟“ هغې وویل: ”یو زوړ سړی چې چپنه یې اغوستې ده راپورته کیږي.“ نو شائول پوه شو چې سموئیل دی، هغه د درناوي په خاطر په ځمکه باندې پړمخې پرېوت.

¹⁵سموئیل شائول ته وویل: ”زه دې ولې په تکلیف کړم چې بېرته راشم؟“ شائول وویل: ”زه په لوی مصیبت باندې اخته یم. فلسطینیان زما سره جګړه کوي، خدای زما څخه خپل مخ اړولی دی او ماته نور نه د نبیانو او نه د خوبونو په وسیله ځواب راکوي. نو تاسو مې د دې دپاره راوغوښتلئ چې راته ووایئ چې څه وکړم.“

¹⁶سموئیل وویل: ”اوس چې څښتن ستا څخه مخ اړولی دی او ستا دښمن شوی دی ولې زما سره مشوره کوې؟

¹⁷څښتن هغه څه کړي دي چې زما په وسیله یې تاته ویلي وو. هغه ستا څخه پادشاهي اخیستې او داود ته یې ورکړې ده.

¹⁸تا د څښتن د حکم څخه سرغړونه وکړه او د هغه قهر او غضب دې عمالیقیانو ته ونه ښود. نو ځکه څښتن دا ورځ په تا باندې راوستې ده.

¹⁹پرته له دې به څښتن اسراییل او تا دواړه فلسطینیانو ته په لاس ورکړي او سبا به ته او ستا زامن زما سره یئ. څښتن به د اسراییلو لښکر هم فلسطینیانو ته تسلیم کړي.“

²⁰شائول سمدلاسه پرېوت او په ځمکه باندې اوږد وغزېده. د سموئیل له خبرو څخه ډېر ووېرېده. هغه خپل قوت له لاسه ورکړی ؤ ځکه چې هغه ټوله ورځ او ټوله شپه هیڅ شی نه ؤ خوړلی.

²¹کله چې هغه ښځه شائول ته ورغله او ویې لیدل چې هغه ډېر وېرېده، هغې ورته وویل: ”ګورئ، باداره! ما خپل ځان په خطر کې واچاوه او تاسو چې څه ماته ویلي وو هغه کار مې وکړ.

²²اوس مهرباني وکړئ څه چې زه وایم هماغسې وکړئ. اجازه راکړئ چې ستاسو دپاره یو څه خواړه تیار کړم. تاسو باید څه وخورئ ترڅو د سفر دپاره پوره قوت پیدا کړئ.“

²³شائول انکار وکړ او ویې ویل: ”نه یې خورم.“ مګر د هغه نفرو او هغې ښځې هغه وهڅاوه او هغه د دوی خبره ومنله. هغه د ځمکې څخه راپورته شو او په کټ باندې کښېناست.

²⁴هغې ښځې په کور کې یو چاغ سخوندر درلود، هغه یې په بیړه سره حلال کړ. وروسته هغې یو څه اوړه راواخیستل، ویې اغږل او فطیره ډوډۍ یې پخه کړه.

²⁵بیا یې هغه خواړه د شائول او د هغه د نفرو په مخ کې کېښودل او هغوی وخوړل. په هماغه شپه هغوی پاڅېدل او روان شول.