Read Pashto (Nangahari) — د پښتو مقدس کتاب اول سموئيل 3 Bible Online

اول سموئيل 3 - Pashto (Nangahari) — د پښتو مقدس کتاب bible

اول سموئيل 3

¹په هغو ورځو کې چې سموئیل د عیلي تر لارښودنې لاندې د څښتن خدمت کاوه د څښتن له طرفه پیغامونه او رویاګانې ډېرې لږې وې.

²یوه شپه عیلي چې سترګې یې ډېرې کمزورې شوې وې او په سختۍ سره یې لیدلی شول په خپل ځای کې ویده ؤ.

³څراغ لا مړ شوی نه ؤ خو سموئیل د خدای په کور کې ویده ؤ او هلته د خدای د لوظ سپېڅلی صندوق ایښودل شوی ؤ.

⁴په دغه وخت کې څښتن غږ وکړ: ”سموئیله! سموئیله!“ سموئیل ځواب ورکړ: ”زه دلته یم.“

⁵هغه عیلي ته ورمنډه کړه او ویې ویل: ”تا ماته غږ وکړ، زه دلته یم.“ مګر عیلي ځواب ورکړ: ”ما غږ نه دی کړی، بېرته لاړ شه او څمله.“ نو هغه لاړ او څملاست.

⁶څښتن بیا ورباندې غږ وکړ: ”ای سموئیله!“ او سموئیل راپاڅېده، عیلي ته ورغی او ویې ویل: ”تا ماته غږ وکړ، زه دلته یم.“ عیلي وویل: ”ای زما زویه، ما تاته غږ نه دی کړی، بېرته لاړ شه او څمله.“

⁷سموئیل لا تر دې وخته پورې څښتن نه پېژنده یعنې د څښتن پیغام ورته نه ؤ رسېدلی.

⁸څښتن د دریم ځل دپاره په سموئیل باندې غږ وکړ. سموئیل پاڅېد، عیلي ته ورغی او ویې ویل: ”تا ماته غږ وکړ، زه دلته یم.“ نو بیا عیلي پوه شو چې څښتن په هلک باندې غږ کوي.

⁹نو بیا عیلي سموئیل ته وویل: ”لاړ شه، څمله او که چېرې هغه غږ وکړ ووایه: خبره وکړه ای څښتنه، ځکه ستا غلام یې اوري.“ نو سموئیل لاړ او په خپل ځای کې څملاست.

¹⁰څښتن راغی، ودرېد او د مخکې په شان یې غږ وکړ: ”ای سموئیله! ای سموئیله!“ سموئیل وویل: ”خبره وکړه ځکه چې ستا غلام یې اوري.“

¹¹څښتن هغه ته وویل: ”زه به اوس د اسراییلو په قوم باندې داسې کار وکړم چې هغه به ډېر هیبتناکه وي او هرڅوک یې چې واوري هغه به هک حیران شي.

¹²زه به هغه ټولې خبرې چې د عیلي د کورنۍ په ضد مې کړې دي د اول نه تر اخره پورې سرته ورسوم.

¹³ما پخوا هغه ته ویلي وو چې زه به تر ابده پورې د هغه کورنۍ ته سزا ورکوم په دې خاطر چې زامنو یې زما په ضد کفر ویلی دی. عیلي پوهېده چې هغوی دا کار کوي خو د هغوی مخنیوی یې نه کاوه.

¹⁴له دې کبله د عیلي د کورنۍ دپاره مې قسم خوړلی چې د هغه د کورنۍ ګناه به هیڅکله د قربانۍ او یا نذرانو په ورکولو سره لېرې نه شي.“

¹⁵سموئیل تر سبا پورې پروت ؤ او بیا هغه پاڅېده او د څښتن د کور دروازې یې خلاصې کړې. هغه ووېرېده چې عیلي ته د خپلې رویا په باره کې ووایي.

¹⁶مګر عیلي په هغه باندې غږ وکړ او ویې ویل: ”ای سموئیله! زما زویه!“ سموئیل ځواب ورکړ: ”زه دلته یم.“

¹⁷عیلي پوښتنه وکړه: ”څښتن تاته څه وویل؟ زما څخه یې مه پټوه، که چېرې هغه څه چې خدای تاته ویلي دي ماته ونه وایې نو خدای دې تاته سخته سزا درکړي.“

¹⁸نو سموئیل هغه ته هرڅه وویل، د هغه څخه یې هیڅ شی پټ نه کړ. عیلي وویل: ”هغه څښتن دی. هرڅه چې د هغه په نظر کې ښه ښکاري هغه دې وکړي.“

¹⁹سموئیل لوئیده او څښتن د هغه سره ؤ. هرڅه وړاندوینه به یې چې کوله هغه رښتیا کېدله.

²⁰ټول اسراییلیان د دان څخه په شمال کې او تر بئرشبع په جنوب کې په دې پوه شول چې سموئیل په رښتیا سره د څښتن نبي شو.

²¹څښتن به په شیلوه کې سموئیل ته ځان ښکاره کاوه او خپل پیغام به یې ورته رساوه.