Read Pashto Bible (Yusufzai) — د پښتو مقدس کتاب پيدايښت 1 Bible Online

پيدايښت 1 - Pashto Bible (Yusufzai) — د پښتو مقدس کتاب bible

پيدايښت 1

¹په شروع کښې، چې کله خُدائ پاک ټول جهان پېدا کړو،

²زمکه خالى وه اؤ هيڅ په کښې نۀ وُو. سمندر هر څۀ ګېر کړى وُو. اؤ هر څيز په توره تيارۀ کښې پټ وو اؤ د خُدائ پاک رُوح په اوبو حرکت کولو.

³بيا خُدائ پاک حُکم وکړو چې، ”رڼا دې شى“ نو رڼا شوه.

⁴خُدائ پاک په دې ليدو خوشحاله وو. بيا هغۀ رڼا د تيارې نه جُدا کړه،

⁵اؤ په رڼا يې ”ورځ“ نُوم کېښودو اؤ په تيارۀ يې ”شپه“. شپه تېره شوه. اؤ سحر شو. دا وړومبۍ ورځ وه.

⁶بيا خُدائ پاک حُکم وکړو چې، ”د پاسنو او لاندينو اوبو تر مينځه دې فضا جوړه شى.“

⁷نو هم داسې وشول. نو خُدائ پاک فضا جوړه کړه چې لاندې اوبۀ د پاس اوبو نه جُدا وى.

⁸هغۀ په دې چت ”آسمان“ نُوم کېښودو. شپه تېره شوه. اؤ سحر شو. دا دويمه ورځ وه.

⁹بيا خُدائ پاک حُکم وکړو، ”د آسمان لاندې اوبۀ دې په يو ځائ راغونډې شى، نو وچه به راښکاره شى.“ نو هم داسې وشول.

¹⁰هغۀ په وچه ”زمکه“ نُوم کېښودو اؤ په يو ځائ راغونډو شوو اوبو يې ”سمندر“ نُوم کېښودو. اؤ خُدائ پاک د دې ليدو سره خوشحاله وو.

¹¹بيا هغۀ حُکم وکړو، ”زمکه دې هر قِسم بُوټى رازرغُون کړى، هغه ټول بُوټى چې غله اؤ مېوه به کوى.“ نو هم داسې وشول.

¹²نو زمکې هغه هر قِسم بُوټى زرغُون کړل کُوم چې غله اؤ مېوه کوى اؤ خُدائ پاک د دې ليدو سره خوشحاله وو.

¹³شپه تېره شوه. اؤ سحر شو. دا دريمه ورځ وه.

¹⁴بيا خُدائ پاک حُکم وکړو، ”ځلېدُونکى څيزُونه دې په آسمان کښې راښکاره شى چې ورځ د شپې نه جُدا کړى اؤ چې د ورځو، مياشتو اؤ د کالونو نښې شى،

¹⁵دا به په آسمان کښې زمکې ته ځلېږى.“ نو هم داسې وشول.

¹⁶نو خُدائ پاک هغه دوه غټ ځلېدُونکى څيزُونه جوړ کړل، نمر به د ورځې ځلېږى اؤ سپوږمۍ به د شپې ځلېږى، هغۀ ستورى هم پېدا کړل.

¹⁷هغۀ دا ځلېدُونکى څيزُونه په آسمان کښې مُقرر کړل چې زمکې له رڼا ورکوى،

¹⁸چې په ورځ اؤ شپه باندې اِختيار ولرى اؤ رڼا د تيارې نه جُدا کړى. اؤ خُدائ پاک د دې ليدو سره خوشحاله وو.

¹⁹شپه تېره شوه. اؤ سحر شو. دا څلورمه ورځ وه.

²⁰بيا خُدائ پاک حُکم وکړو، ”سمندر دې د ډېر قِسم ساه اخستُونکى څيزُونو نه ډک شى اؤ هوا دې د مارغانو نه ډکه شى.“

²¹نو خُدائ پاک غټې سمندرى بلاګانې پېدا کړې، هر قِسم ساه لرُونکى څيزُونه چې په اوبو کښې اوسېږى اؤ هر قِسم مارغان يې پېدا کړل. اؤ خُدائ پاک د دې ليدو سره خوشحاله وو.

²²اؤ خُدائ پاک برکت ورکړو اؤ د اوبو مخلُوق ته يې ووئيل چې ډېر شئ اؤ سمندر ډک کړئ اؤ مارغانو ته يې ووئيل چې زيات شئ.

²³شپه تېره شوه اؤ سحر شو. دا پينځمه ورځ وه.

²⁴بيا خُدائ پاک حُکم وکړو، ”زمکه دې هر قِسم څاروى اؤ ځنګلى، واړۀ اؤ غټ ځناور پېدا کړى.“ نو هم داسې وشول.

²⁵نو خُدائ پاک دا ټول ځناور پېدا کړل اؤ هغه د دې ليدو سره خوشحاله وو.

²⁶بيا خُدائ پاک ووئيل، ”مُونږ به اوس بنيادم جوړ کړُو، اؤ هغوئ به د خپل صورت په شان جوړ کړُو. هغوئ به په کبانو، مارغانو اؤ په ټولو ځناورو، څاروو اؤ ځنګلى، وړو اؤ غټو ځناورو باندې اِختيار لرى.“

²⁷نو خُدائ پاک بنيادم پېدا کړل اؤ د خپل صورت په شان يې جوړ کړل. هغوئ يې نر اؤ ښځه پېدا کړل،

²⁸برکت يې ورکړو اؤ وې وئيل، ”ډېر بچى پېدا کړئ، نو ستاسو اولاد به په ټوله دُنيا کښې اوسېږى اؤ زمکه به د هغوئ په لاس کښې وى. زۀ تاسو له په کبانو، مارغانو اؤ په ټولو ځناورو باندې اِختيار درکوم.

²⁹ما تاسو له د خوراک د پاره هر قِسم غله اؤ هر قِسم مېوې پېدا کړې دى،

³⁰خو ټولو ځنګلى ځناورو اؤ ټولو مارغانو له ما د خوراک د پاره واښۀ اؤ شنۀ بُوټى پېدا کړې دى.“ نو هم داسې وشول.

³¹خُدائ پاک دا ټول څيزُونه وکتل اؤ هغه ډېر خوشحاله وو. شپه تېره شوه. اؤ سحر شو. دا شپږمه ورځ وه.