Read Pashto Bible (Yusufzai) — د پښتو مقدس کتاب پيدايښت 13 Bible Online

پيدايښت 13 - Pashto Bible (Yusufzai) — د پښتو مقدس کتاب bible

پيدايښت 13

¹ابرام د خپلى ښځى سره او ټول مال سره د مِصر نه د کنعان په طرف صحرا ته لاړو اؤ لُوط هم ورسره وو.

²ابرام ډېر مالداره سړے وو، هغۀ څاروى اؤ داسې سپين زر اؤ سرۀ زر يې هم لرل.

³اؤ هغۀ بېلو بېلو ځايُونو ته کوچ کولو اؤ بيت‌اېل ته روان وو. هغه هم هغه ځائ ته ورسېدو چې د بيت‌اېل اؤ عى په مېنځ کښې دے چرته چې هغه مخکښې دېره شوے وو

⁴اؤ قُربان‌ګاه يې جوړه کړې وه. اؤ د مالِک خُدائ نُوم يې پرې اخستے وو.

⁵د لُوط سره هم څاروى اؤ رَمې وې، خپله کورنۍ اؤ نوکران هم ورسره وُو.

⁶خو هلته دومره شنه زمکه نۀ وه چې دوئ دواړه په کښې يو ځائ پاتې شوى وے، ځکه چې د دوئ سره ډېر زيات مال وو.

⁷نو د ابرام اؤ د لُوط د شپُونکو په مېنځ کښې جګړه شوه. (په هغه وخت کښې کنعانيان اؤ فرزيان هم په هغه وطن کښې اوسېدل.)

⁸نو ابرام لُوط ته ووئيل، ”خُدائ پاک دې زما اؤ ستا اؤ زمُونږ د شپُونکو په مېنځ کښې لانجه نۀ راولى، ځکه چې مُونږ خپلوان يُو.

⁹ولې دا ټوله زمکه ستا په وړاندې نۀ ده؟ زما نه جُدا شه. چې چرته دې خوښه وى هم هلته لاړ شه. کۀ تۀ ښى طرف ته ځې نو زۀ به ګڅ طرف ته ځم، کۀ تۀ ګڅ طرف ته ځې نو زۀ به ښى طرف ته لاړ شم.“

¹⁰لُوط سترګې واړولې راواړولې اؤ د اُردن ټول هوار مېدان يې وليدو، چې د ضُعر پورې، د مالِک خُدائ د باغ په شان يا د مِصر د وطن په شان ښې ډېرې اوبۀ يې لرلې. (په هغه وخت کښې مالِک خُدائ د صُدوم اؤ عمُوره ښارونه لا تباه کړى نۀ وُو.)

¹¹نو لُوط د ځان د پاره د اُردن ټول هوار مېدان خوښ کړو اؤ نَمرخاتۀ طرف ته لاړو. نو داسې دوئ دواړه جُدا شول.

¹²ابرام د کنعان په وطن کښې پاتې شو اؤ لُوط په مېدان کښې د ښارُونو په مېنځ کښې دېره شو اؤ صُدوم سره نزدې يې خېمې ولګولې،

¹³چې د هغه ځائ خلق ډېر خراب وُو اؤ د مالِک خُدائ ګُناهګار وُو.

¹⁴د لُوط د تلو نه پس، مالِک خُدائ ابرام ته ووئيل، ”چرته چې تۀ ولاړ يې، د دې ځائ نه هر طرف ته ښۀ په غور سره وګوره.

¹⁵چې څومره زمکه ستا په نظر راځى، دا زۀ تا اؤ ستا اولاد له همېشه د پاره ورکوم.

¹⁶زۀ به تا له دومره ډېر اولاد درکوم چې هيڅ څوک به يې شمېرلے نۀ شى خو د خاورو د ذرو شمېرل به ترې آسان وى.

¹⁷پاڅه! روان شه اؤ په ټوله زمکه نظر واچوه، ځکه چې دا ټوله تا له درکوم.“

¹⁸نو ابرام د دې ځائ نه کَډه واخستله اؤ د ممرې پاکو ونو ته نزدې دېره شو، چې دا په حبرون کښې دے اؤ هلته يې مالِک خُدائ ته يوه قُربان‌ګاه جوړه کړه.