Read Pashto Bible (Yusufzai) — د پښتو مقدس کتاب پيدايښت 15 Bible Online

پيدايښت 15 - Pashto Bible (Yusufzai) — د پښتو مقدس کتاب bible

پيدايښت 15

¹څۀ موده پس، ابرام خوب وليدلو چې مالِک خُدائ ورته وائى، ”ابرامه! يرېږه مه. زۀ ستا ډال يم اؤ زۀ به تا له يو لوئ اِنعام درکوم.“

²خو ابرام جواب ورکړو، ”مالِکه، مالِکه خُدايه! ستا اِنعام به ما له څۀ فائده راکړى، زما خو بچى هم نشته؟ اؤ صِرف د دمشق اِلعازر زما وارث دے.

³ګوره! تا ما له اولاد نۀ دے راکړے اؤ زما غُلام به زما ميراث اخلى.“

⁴نو د مالِک خُدائ کلام يو ځل بيا هغۀ ته راغلو چې : ”ستا غُلام اِلعازر به ستا ميراث نۀ اخلى، ستا خپل زوئ به ستا وارث وى.“

⁵مالِک خُدائ هغه بهر بوتلو اؤ ورته يې ووئيل، ”آسمان ته وګوره! کۀ تۀ د آسمان ستورى شمېرلے شې نو وې شمېره، ستا اولاد به د ستورو په شان ډېر وى.“

⁶ابرام په مالِک خُدائ يقين وکړو، نو مالِک خُدائ هغه د خپل ايمان له وجې صادق وګرځولو.

⁷بيا مالِک خُدائ هغۀ ته ووئيل، ”زۀ مالِک خُدائ يم، چا چې په بابل کښې د اُور نه راوويستلې، چې دا زمکه ستا خپله شى.“

⁸خو ابرام ترې تپوس وکړو، ”مالِکه، مالِکه خُدايه! ما ته به څنګه پته ولږى چې دا به زما شى؟“

⁹هغۀ جواب ورکړو، ”ما له يوه څخۍ، يوه چېلۍ اؤ يو ګډ راوله، چې هر يو د دريو کالو وى اؤ يوه ګُوګُوشتکه اؤ کونتره هم راوړه.“

¹⁰ابرام دا ځناور حاضر کړل، حلال يې کړل، هغه درې څاروى يې په مېنځ نيم کړل اؤ په دوه قطارُونو کښې يې نيم نيم يو بل ته مخامخ کېښودل، خو مارغان يې په مېنځ نيم نۀ کړل.

¹¹ټپُوسان په غوښه لاندې راغُوټه شول، خو ابرام ترې نه وشړل.

¹²چې کله نمر په پرېوتو شو، په ابرام يو درُوند خوب راغلو اؤ يره اؤ توره تيارۀ هم پرې راغله.

¹³مالِک خُدائ هغۀ ته ووئيل، ”تۀ دا خبره ياده ساته چې ستا اولاد به په پردى وطن کښې مُسافر شى، دوئ به هلته غُلامان شى اؤ څلور سوه کاله به پرې ظلم کېږى،

¹⁴خو زۀ به هغه قوم له سزا ورکړم چې دوئ څوک غُلامان کوى اؤ چې کله هغه پردے وطن پرېږدى، نو دوئ به ډېر مال دولت د ځان سره يوسى.

¹⁵اؤ تۀ په خپله به په ښۀ پوخ عُمر کښې، په تسلۍ سره وفات شې اؤ دفن به شې.

¹⁶په څلورم نسل کښې به ستا اولاد دلته واپس راشى، ځکه چې اموريانو اوسه پورې دومره ګُناه نۀ ده کړې چې زۀ دوئ بهر کړم.“

¹⁷چې کله نمر‌پرېواتو اؤ توره تيارۀ شوه، نو يو د بلو سکارو لوښے چې لُوګے يې کولو اؤ يو بَل لرګے ناڅاپى راڅرګند شو اؤ د ځناورو په مېنځ کښې تېر شو.

¹⁸نو په هغه وخت کښې مالِک خُدائ د ابرام سره يو تړون وکړو. هغۀ ووئيل، ”زۀ ستا سره دا تړون کوم چې زۀ به ستا اولاد له د مِصر د دې سيند نه د فرات تر لوئ سيند پورې دا زمکه ورکوم،

¹⁹اؤ ورسره د قينيانو وطن، د قنيزيانو، د قدمونيانو،

²⁰د حِتيانو، د فرزيانو، د رفائيم،

²¹د اموريانو، د کنعانيانو، د جرجاسيانو اؤ د يبوسيانو وطن هم ورکوم.“