Read Pashto Bible (Yusufzai) — د پښتو مقدس کتاب پيدايښت 16 Bible Online

پيدايښت 16 - Pashto Bible (Yusufzai) — د پښتو مقدس کتاب bible

پيدايښت 16

¹د ابرام د ښځې سارۍ تر اوسه پورې بچى نۀ وُو شوى. خو د هغې يوه مِصرۍ وينځه وه چې نُوم يې هاجِره وو،

²نو هغې ابرام ته ووئيل، ”مالِک خُدائ ما له اولاد نۀ دے راکړے. تۀ ولې زما د وينځې سره شپه نۀ تېروې؟ کېدے شى چې زۀ د هغې نه آباده شم.“ نو ابرام د سارۍ خبره ومنله.

³نو هغې خپله وينځه هاجِره ورکړه چې ښځه يې شى. (د ابرام په کنعان کښې د لس کاله اوسېدو نه پس داسې وشول.)

⁴ابرام د هاجِرې سره څملاستو، نو هغه اُميدواره شوه. چې کله هغې ته پته ولګېده چې اُميدواره شوه، نو خپلې نېکې ته به يې سپک کتل.

⁵نو سارۍ ابرام ته ووئيل، ”دا بد ستا په وجه وشول. ما خپله وينځه په خپله ستا په غېږ کښې کښېنوله اؤ چې د کُوم وخت نه هغې ته پته لګېدلې ده چې اُميدواره ده، نو هغه ما ته سپک ګورى. مالِک خُدائ دې اِنصاف وکړى چې په ما اؤ په تا کښې څوک په حقه دى.“

⁶خو ابرام جواب ورکړو، ”ډېر ښۀ، هغه ستا وينځه ده اؤ ستا په اِختيار کښې ده، چې څۀ دې خوښه وى نو ورسره يې وکړه.“ نو سارۍ د هاجِرې سره دومره ظلم وکړو چې هغه ترى وتښتېده.

⁷د مالِک خُدائ فرِښتې په صحرا کښې د شُور په لاره هاجِره په چينه ومُوندله

⁸اؤ فرِښتې ووئيل، ”هاجِرې، د سارۍ وينځې! د کُوم ځائ نه تۀ راغلې يې اؤ چرته ځې؟“ هغې جواب ورکړو، ”زۀ د خپلې نېکې نه تښتم.“

⁹د مالِک خُدائ فرِښتې هغې ته ووئيل، ”خپلې نېکې له واپس لاړه شه اؤ د هغې د اِختيار لاندې ژوند تېروه.“

¹⁰بيا فرِښتې هغې ته دا هم ووئيل، ”زۀ به تا له دومره ډېر اولاد درکړم چې هيڅ څوک به يې نۀ شى شمېرلے.

¹¹تۀ اوس اُميدواره يې اؤ د زوئ نُوم به اِسمٰعيل کېږدې ځکه چې مالِک خُدائ په تکليف کښې ستا آواز اؤرېدلے دے.

¹²خو ستا زوئ به د يو ځنګلى په شان عُمر تېروى، هغه به د هر چا دُښمن وى اؤ هر يو به د هغۀ خِلاف وى. هغه به د خپلوانو نه بيل ژوند تيروى.“

¹³هاجِرې د ځان نه تپوس وکړو، ”ما خو خُدائ پاک ليدلے دے اؤ بيا هم لا ژوندۍ پاتې يم؟“ نو هغې هغه مالِک خُدائ ته يو نُوم ورکړو چې د هغې سره يې خبرې کړې وې، يعنې ”هغه خُدائ پاک چې ګورى“.

¹⁴دا ځکه د قادِس اؤ بيرد په مېنځ کښې کُوهى ته خلق وائى چې ”د هغه ژوندى خُدائ پاک کُوهے دے چې ما ګورى“.

¹⁵د هاجِرې نه د ابرام زوئ وشو اؤ اِسمٰعيل نُوم يې پرې کېښودو.

¹⁶ابرام په هغه وخت کښې د شپږ اتياؤ کالو وو.