Read Pashto Bible (Yusufzai) — د پښتو مقدس کتاب پيدايښت 2 Bible Online

پيدايښت 2 - Pashto Bible (Yusufzai) — د پښتو مقدس کتاب bible

پيدايښت 2

¹نو داسې د ټول جهان جوړېدل پُوره شُو.

²اؤ په اوومه ورځ خُدائ پاک پېدايښت پُوره کړو اؤ کار يې بس کړو.

³هغۀ اوومې ورځې له برکت ورکړو اؤ مُقدسه يې وګرځوله، ځکه چې هغۀ په اوومه ورځ پېدايښت پُوره کړو اؤ کار يې بس کړو.

⁴اؤ داسې ټول جهان پېدا شو. <h>د عدن باغ </h> چې مالِک خُدائ، خُدائ پاک ټول جهان جوړ کړو،

⁵په زمکه هيڅ قِسم بُوټے نۀ وو اؤ هيڅ تُخم زرغُون شوے نۀ وو، ځکه چې هغۀ باران نۀ وو ورولے اؤ د زمکې د کروَندې هم څوک نۀ وُو.

⁶خو اوبۀ به د زمکې نه راوتلې اؤ زمکه به يې اوبۀ کوله.

⁷بيا مالِک خُدائ، خُدائ پاک د زمکې نه څۀ خاوره واخستله اؤ آدم يې ترې نه جوړ کړو. خُدائ پاک د هغۀ په سپېږمو کښې د ژوند ساه پُو کړه اؤ آدم ژوندے شو.

⁸بيا مالِک خُدائ، خُدائ پاک په عدن کښې يو باغ وکَرلو اؤ هغه پېدا کړے آدم يې په کښې مُقرر کړو.

⁹هغۀ هلته د هر قِسم ښائسته اؤ ښو مېوو ونې وکَرلې. هغۀ د باغ په مېنځ کښې ژوند ورکوُونکى ونه اؤ د ښۀ اؤ بد پوهه ورکوُونکى ونه ولګوله.

¹⁰په عدن کښې يو درياب به باغ اوبۀ کولو، د عدن بل طرف ته دا په څلورو سيندُونو کښې تقسيم شوے وو.

¹¹د وړومبى سيند نُوم فيسون دے، دا د حوېلۍ ټول وطن نه تېرېږى.

¹²(سُوچه سره زر، خوشبودار عطر اؤ قيمتى کاڼى دلته ملاوېږى.)

¹³د دويم سيند نُوم جيحون دے، دا د کُوش ټول وطن نه تېرېږى،

¹⁴دريم سيند دجله دے، چې د اسُور نَمرخاتۀ طرف نه تېرېږى اؤ څلورم د فرات سيند دے.

¹⁵مالِک خُدائ، خُدائ پاک آدم د عدن باغ کښې مُقرر کړو چې په باغ کښې کَرل رېبل کوى اؤ ساتنه يې کوى.

¹⁶مالِک خُدائ، خُدائ پاک هغۀ ته حُکم وکړو، ”تۀ د باغ د هرې ونې مېوه خوړے شې،

¹⁷خو د هغې ونې نه بغېر کُومه چې د ښۀ اؤ بد د پېژندګلو پوهه ورکوى. چې هيڅ کله د هغې ونې مېوه ونۀ خورې، کۀ تا وخوړه، نو په هغه ورځ به مړ شې.“

¹⁸بيا مالِک خُدائ، خُدائ پاک ووئيل، ”د آدم د پاره يواځې اوسېدل ښۀ نۀ دى. زۀ به د هغۀ د پاره يوه ښۀ ملګرى جوړه کړم چې د هغۀ مدد به کوى.“

¹⁹نو هغۀ د زمکې نه څۀ خاوره واخستله اؤ ټول ځناور اؤ مارغان يې ترې نه جوړ کړل. هغه يې بيا آدم له راوستل چې وګورى چې څۀ نومُونه ورباندې ږدى، اؤ آدم چې په هر ژوندى څيز څۀ نُوم کېښودو هم هغه يې نُوم شو.

²⁰نو آدم په ټولو مارغانو اؤ ځناورو نومُونه کېښودل، خو د آدم د پاره يوه ښۀ ملګرى نۀ وه پيدا شوى چې د هغۀ مدد وکړى.

²¹بيا مالِک خُدائ، خُدائ پاک په آدم درُوند خوب راوستلو اؤ چې آدم اُودۀ شو، نو هغۀ د آدم نه يوه پوښتۍ راوويسته اؤ هغه ځائ يې ورله په غوښه ډک کړو.

²²بيا مالِک خُدائ، خُدائ پاک د آدم د پوښتۍ نه يوه ښځه پېدا کړه اؤ هغۀ له يې راوستله.

²³نو آدم ووئيل، ”واه، دا هم زما په شان ده. اؤ زما په شان وجُود لرى. د دې نُوم ”ښځه“ دے، ځکه چې دا د بنيادم نه راويستلے شوې ده.“

²⁴نو هم دا وجه ده چې سړے خپل مور اؤ پلار پرېږدى اؤ د ښځې سره يو ځائ وى اؤ دواړه يو بدن شى.

²⁵سړے اؤ ښځه دواړه بربنډ وُو، خو د يو بل نه يې پړده نۀ کوله.