Read Pashto Bible (Yusufzai) — د پښتو مقدس کتاب پيدايښت 20 Bible Online

پيدايښت 20 - Pashto Bible (Yusufzai) — د پښتو مقدس کتاب bible

پيدايښت 20

¹اِبراهيم د ممرې نه د کنعان صحرا ته لاړو اؤ د قادِس اؤ شُور په مېنځ کښې اوسېدو. په هغه وخت کښې چې کله هغه په جرار کښې اوسېدو،

²هغۀ وئيلى وُو چې خپله ښځه ساره يې خور ده. نو د جرار بادشاه ابى‌ملِک ترې ساره بوتلې وه.

³خو يوه شپه هغۀ خُدائ پاک په خوب کښې وليدو اؤ ورته يې ووئيل : ”ګوره! تۀ د مرګ په خُله ولاړ يې، ځکه چې کُومه ښځه تا راوستې ده هغه وادۀ شوې هم ده.“

⁴خو ابى‌ملِک ګوتې هم نۀ وې وروړې اؤ هغۀ ووئيل، ”مالِکه خُدايه! زۀ بې‌ګُناه يم! تۀ به ما اؤ زما خلق تباه کوې څۀ؟

⁵اِبراهيم خو په خپله وئيلى وُو چې هغه يې خور ده اؤ هغې هم وئيلى وُو چې هغه يې ورور دے. ما خو دا په صفا نېت کړى دى اؤ زما لاسُونو ګُناه نۀ ده کړې.“

⁶خُدائ پاک په خوب کښې جواب ورکړو، ”اؤ، ما ته پته ده چې تا دا په صفا نېت کړى دى، هغې ته ګوتې وروړلو ته مې ځکه پرې نۀ ښودلې چې زما خِلاف ګُناه ونۀ کړې

⁷خو اوس، هغه ښځه خپل خاوند ته واپس کړه. هغه يو نبى دے اؤ هغه به درته دُعا وکړى اؤ تۀ به مړ نۀ شې. خو کۀ تۀ هغه واپس نۀ ورکوې، نو زۀ تا خبروم چې تۀ اؤ ستا ټول خلق به مړۀ کېږئ.“

⁸بل سحر وختى ابى‌ملِک خپل ټول درباريان راوغوښتل اؤ چې څۀ شوى وُو ورته يې ووئيل اؤ هغوئ سخت ويرېدل.

⁹بيا ابى‌ملِک اِبراهيم راوغوښتلو اؤ تپوس يې ترې وکړو، ”دا تا په مُونږ څۀ کړى دى؟ ما تا سره څۀ بد کړى دى چې تا په ما اؤ زما په بادشاهۍ دا آفت راوستلے دے؟ داسې خو د هيچا سره هم نۀ دى کول پکار، لکه چې تا زما سره کړى دى.

¹⁰دا تا ولې کړى دى؟“

¹¹اِبراهيم جواب ورکړو، ”زما دا خيال وو چې دلته به داسې هيڅ څوک هم نۀ وى چې هغه د خُدائ پاک نه يرېږى اؤ دوئ به ما ووژنى چې زما ښځه بوځى.

¹²هغه په رښتيا زما خور ده. هغه زما د پلار لُور ده، خو زما د خپلې مور لُور نۀ ده اؤ ما هغه وادۀ کړه.

¹³چې کله خُدائ پاک زۀ د خپل پلار د کور نه مُسافر کړم، نو ما هغې ته ووئيل، تۀ به زما سره هغه وخت خپل غېرت څرګند کړې چې هر چا ته وائې چې زۀ ستا ورور يم.“

¹⁴بيا ابى‌ملِک ساره واپس اِبراهيم ته ورکړه، هم هغه وخت يې هغۀ ته ګډې، څاروى اؤ نوکران هم ورکړل.

¹⁵هغۀ اِبراهيم ته ووئيل، ”ګوره! دا ټوله زما زمکه ده، چې چرته دې خوښه وى هلته اوسېږه.“

¹⁶هغۀ ساره ته ووئيل، ”زۀ ستا ورور له يو زر د سپينو زرو سيکې ورکوم، دا د دې د پاره چې تا سره څومره خلق دى چې ټولو ته ثابِته شى چې تۀ بې‌ګُناه يې، هر چا ته به معلُومه شى چې ستا لمن پاکه ده.“

¹⁷نو په دې وجه چې د اِبراهيم د ښځې ساره سره کُومه واقعه شوې وه، مالِک خُدائ د ابى‌ملِک په محل کښې ټولې ښځې شنډې کړې. نو اِبراهيم د ابى‌ملِک د پاره دُعا وکړه اؤ خُدائ پاک هغه روغ کړو، خُدائ پاک د هغۀ ښځه اؤ د هغۀ وينځې هم روغې کړې، چې د دوئ بچى پېدا شى.