Read Pashto Bible (Yusufzai) — د پښتو مقدس کتاب پيدايښت 23 Bible Online

پيدايښت 23 - Pashto Bible (Yusufzai) — د پښتو مقدس کتاب bible

پيدايښت 23

¹ساره يو سل اووۀ‌ويشت کاله ژوندۍ وه.

²هغه د کنعان په وطن کښې په قريت اربع کښې په حق ورسېده چې په حبرون مشهُور دے، اؤ اِبراهيم د ساره په غم غمژن شو اؤ هغې پسې يې ژړل.

³اِبراهيم د مړى خوا نه پاڅېدو، حِتيانو له ورَغلو اؤ وې وئيل چې،

⁴”زۀ د پردى وطن يم اؤ تاسو سره اوسېږم، زما خپله زمکه نشته چې چرته زۀ خپله ښځه په يو مُناسب ځائ کښې ښخه کړم. لږه زمکه په ما خرڅه کړئ.“

⁵هغوئ جواب ورکړو چې،

⁶”نېکه! زمُونږ خبره واوره، مُونږ تا ته د يو تکړه مشر په سترګه ګورُو. زمُونږ د اديرې د ټولو نه ښۀ ځائ کښې خپل مړے ښخ کړه، تا به هيڅ څوک د يو ځائ نه هم د خپل مړى ښخولو نه نۀ منع کوى.“

⁷اِبراهيم پاڅېدو اؤ د هغه وطن خلقو يعنې حِتيانو ته يې د عِزت نه سر ټيټ کړو.

⁸اؤ ورته يې ووئيل، ”کۀ ستاسو دا خوښه وى چې زۀ دلته خپل مړے ښخ کړم، نو د صحر زوئ عِفرون ته ووايئ

⁹چې د خپل پټى په سر کښې د مکفيله غار په ما خرڅ کړى. زۀ به يې پُوره قيمت ورکړم اؤ تاسو ټول به د دې ګواهان شئ.“

¹⁰عِفرون هلته د ښار د دروازې سره نزدې ناست وو، چې کله اِبراهيم دا عرض وکړو، نو هغۀ جواب ورکړو چې، ”صاحِبه! دا ټول پټے سره د غار ستا په وړاندې دے. زما د خپلو خلقو په مخکښې زۀ دا ستا د مړى د قبر د پاره درکوم.“

¹²يو ځل بيا، اِبراهيم د هغه وطن خلقو ته د عِزت نه ټيټ شو

¹³اؤ عِفرون ته يې ووئيل، ”د دې ګواهانو په مخکښې، زۀ تا له د دې پټى پُوره قيمت درکوم، چې خپله ښځه ښخه کړم. دا قيمت زما نه قبُول کړه.“

¹⁴عِفرون جواب ورکړو چې،

¹⁵”صاحِبه! زما خبره واوره، د دې ځائ قيمت صِرف څلور سوه د سپينو زرو سيکې به وى. په داسې وړُوکى قيمت به مُونږ څۀ ټينګېږُو؟ خپل مړے ښخ کړه.“

¹⁶اِبراهيم د عِفرون دا خبره منظُوره کړه اؤ هغه سپين زر يې عِفرون ته وتلل چې د کُومو په باره کښې يې د حِتيانو په مخکښې وئيلى وُو، د هغه وخت د سوداګرو د وزن مُطابق، څلور سوه د سپينو زرو سيکې.

¹⁷نو داسې اِبراهيم د عِفرون نه هغه د ممرئ سره نزدى مکفيله په علاقه کښې هغه پټے واخستلو. پټے سره د هغه غار اؤ ګېر‌چاپېره چې څومره ونې وې.

¹⁸د ښار په دروازه کښې د جرګې د ټولو سړو په مخکښې دا زمکه د اِبراهيم شوه چرته چې حِتيان د دې ګواهان وُو.

¹⁹د دې نه پس، اِبراهيم خپله ښځه ساره د مکفيله د پټى په غار کښې ښخه کړه

²⁰چې کُوم يې د حِتيانو نه اخستے وو.