Read Pashto Bible (Yusufzai) — د پښتو مقدس کتاب پيدايښت 33 Bible Online

پيدايښت 33 - Pashto Bible (Yusufzai) — د پښتو مقدس کتاب bible

پيدايښت 33

¹يعقُوب چې وکتل نو عيساؤ يې وليدو اؤ څۀ ګورى چې څلور سوه کسان ورسره راروان وُو. نو هغۀ خپل بچى په لِياه، راحيل اؤ په هغه دوه نورو ښځو باندې تقسيم کړل.

²هغۀ نورې ښځې اؤ د هغوئ بچى مخکښې کړل، بيا يې لِياه اؤ د هغې بچى کړل اؤ راحيل اؤ يُوسف يې وروستو کړل.

³يعقُوب د دوئ نه مخکښې لاړو اؤ چې څنګه خپل ورور ته ورسېدو، نو ټيټ شو اؤ اووۀ ځل يې تندې په زمکه ولګولو.

⁴خو عيساؤ مِلاوېدو د پاره هغۀ له ورمنډه کړل اؤ د هغۀ نه يې لاسُونه تاؤ کړل، غاړه يې ويستلو اؤ ښُکل يې کړو. دوئ دواړو وژړل.

⁵چې کله عيساؤ وکتل اؤ هغه ښځې اؤ ماشُومان يې وليدل، نو هغۀ تپوس وکړو، ”دا ستا سره څوک دى؟“ يعقُوب ورته ووئيل، ”صاحِبه! خُدائ پاک په ما ډېر مهربان دے اؤ دا بچى يې راکړى دى.“

⁶بيا هغه نورې ښځې اؤ د هغوئ بچى رامخکښى شول اؤ ورته ټيټ شول،

⁷بيا لِياه اؤ د هغې بچى راغلل اؤ په آخِر کښې يُوسف اؤ راحيل راغلل اؤ ورته ټيت شول.

⁸عيساؤ ترې تپوس وکړو، ”د هغې بلې ډلې سره چې زۀ مِلاؤ شوم هغه دې د څۀ مقصد د پاره راوستلې ده؟“ يعقُوب ورته ووئيل، ”د دې د پاره چې زما نېک راسره ښۀ شى.“

⁹خو عيساؤ ووئيل، ”زما وروره! زما سره هر څۀ ډېر دى، چې ستا سره هم څۀ دى هغه د ځان د پاره وساته.“

¹⁰يعقُوب ووئيل، ”نه، زۀ تا ته سوال کوم، کۀ تۀ په ما مهربان يې، نو زما د لاسُونو نه دا تُحفه قبُوله کړه. چې ستا مخ ته مې وکتل دا داسې شوه لکه چې د خُدائ پاک مخ ته مې کتلى وى، اوس تۀ زما سره ډېر ښۀ يې.

¹¹زۀ تا ته سوال کوم چې دا تُحفه زما نه قبُوله کړه کُومه چې ما تا له راوړې ده، خُدائ پاک په ما مهربان دے اؤ چې د څۀ څيز هم ضرُورت وو هغه يې راکړے دے.“ يعقُوب په هغۀ زور راوړو نو هغه يې قبُوله کړه.

¹²عيساؤ ووئيل، ”ځئ چې په خپل سفر باندې ځُو. زۀ به ستاسو سره ځم.“

¹³يعقُوب ووئيل، ”زما نېکه! تا ته پته ده چې ماشُومان کمزورى دى، په کار دى چې زۀ د دې ګډو اؤ څاروو اؤ د دوئ د بچو خيال وساتم. کۀ دا مُونږ يوه ورځ هم تېز بوځُو، نو ټول څاروى به مړۀ شى.

¹⁴زۀ خپل نېک ته سوال کوم چې د خپل خِدمت‌ګار نه مخکښې لاړ شى اؤ نېکه! زۀ به په مزه مزه د څاروو اؤ د هغوئ د بچو په قدم په تا پسې درځم اؤ په ادوم کښې به درسره مِلاؤ شم.“

¹⁵عيساؤ ووئيل، ”زۀ به تا سره زما خپل څۀ کسان پرېږدم.“ خو يعقُوب ورته ووئيل، ”د دې هيڅ حاجت نشته، زۀ صِرف دا غواړم چې ستا په نظر کښې ښۀ راشم.“

¹⁶نو هم په هغه ورځ عيساؤ په خپله مخه ادوم ته واپس شو.

¹⁷خو يعقُوب سُکات ته لاړو، چرته چې هغۀ د خپل ځان د پاره کور اؤ د څاروو د پاره شپولُونه جوړ کړل. نو د هغه ځائ نُوم سُکات شو.

¹⁸د ميسوپوتاميه نه په واپسۍ کښې يعقُوب د کنعان په وطن کښې شِکم ښار ته په سلامتۍ سره ورسېدو اؤ د ښار سره نزدې يې په يو پټى کښې خپلې خېمې ولګولې.

¹⁹هغۀ د هغه پټى دا حِصه د شِکم پلار همور د اولاد نه د سپينو زرو په سلو سيکو واخستله.

²⁰هغۀ هلته يوه قُربان‌ګاه جوړه کړه اؤ اېل نُوم يې پرې کېښودو کُوم چې د اِسرائيلو خُدائ پاک دے.