Read Pashto Bible (Yusufzai) — د پښتو مقدس کتاب پيدايښت 35 Bible Online

پيدايښت 35 - Pashto Bible (Yusufzai) — د پښتو مقدس کتاب bible

پيدايښت 35

¹څۀ موده وروستو خُدائ پاک يعقُوب ته ووئيل، ”پاڅه اؤ سمدستى بيت‌اېل ته لاړ شه اؤ هلته اوسېږه. هلته ما ته يوه قُربان‌ګاه جوړه کړه. زۀ هغه خُدائ پاک يم چې تا ته راڅرګند شوے وم چې کله تۀ د خپل ورور عيساؤ نه تښتېدلى.“

²نو يعقُوب خپلې کورنۍ ته اؤ هغه ټولو ته چې د هغۀ سره وُو ووئيل، ”تاسو سره چې کُوم پردى بُتان دى هغه وغورزوئ، خپل ځانُونه پاک کړئ اؤ صفا جامې واغوندئ.

³مُونږ به د دې ځائ نه بيت‌اېل ته ځُو، هلته به زۀ خُدائ پاک ته يوه قُربان‌ګاه جوړه کړم چا چې په تکليف کښې زما سوال اؤرېدلے دے اؤ چې زۀ چرته هم تلے يم نو هغه زما مل وو.“

⁴نو هغوئ هغه ټول پردى بُتان چې د دوئ سره وُو اؤ د دوئ په غوږُونو کښې چې کُومې والۍ وې، هغه يې يعقُوب له ورکړل. هغۀ دا شِکم ته نزدې د څېړۍ د ونې لاندې ښخ کړل.

⁵چې کله يعقُوب اؤ د هغۀ زامن په سفر روان وُو، نو د ګېر‌چاپېره ښارُونو په خلقو باندې د خُدائ پاک سخته يره راغله، نو هيڅ څوک ورپسې نۀ شول.

⁶يعقُوب د خپلو ټولو خلقو سره لُوز ته راغلو، کُوم چې د کنعان په وطن کښې په بيت‌اېل مشهُور دے.

⁷هغۀ هلته يوه قُربان‌ګاه جوړه کړه اؤ په هغه ځائ يې ”د بيت‌اېل خُدائ پاک“ نُوم کېښودو، ځکه چې خُدائ پاک هغۀ ته هلته راڅرګند شوے وو کله چې هغه د خپل ورور نه تښتېدلو.

⁸د رِبقه خِدمت‌ګاره دبوره مړه شوه اؤ بيت‌اېل ته نزدې د څېړۍ د ونې لاندې ښخه شوه. نو ځکه د دې نُوم ”د ژړا څېړۍ“ شو.

⁹چې کله يعقُوب د ميسوپوتاميه نه راواپس شو، خُدائ پاک يعقُوب ته بيا راڅرګند شو اؤ هغۀ له يې برکت ورکړو.

¹⁰خُدائ پاک هغۀ ته ووئيل، ”ستا نُوم يعقُوب دے، خو د نن نه پس ستا نُوم اِسرائيل شو.“ نو د هغۀ نُوم يې اِسرائيل کېښودو.

¹¹اؤ خُدائ پاک هغۀ ته ووئيل، ”زۀ قادر خُدائ پاک يم. تۀ ډېر اولاد پېدا کړه. قومُونه به ستا د اولاد نه جوړېږى اؤ ستا په اولاد کښې به بادشاهان جوړېږى.

¹²زۀ به هغه وطن تا له درکړم کُوم چې ما اِبراهيم اؤ اِسحاق له ورکړے وو اؤ ستا نه پس به دا وطن ستا اولاد له هم ورکوم.“

¹³بيا خُدائ پاک د هغۀ نه لاړو.

¹⁴چرته چې خُدائ پاک د هغۀ سره خبرې کړې وې، نو يعقُوب يو يادګارى کاڼے ودرولو اؤ وقف يې کړو، شراب اؤ تېل يې پرې واچول.

¹⁵هغۀ په هغه ځائ بيت‌اېل نُوم کېښودو.

¹⁶بيا يعقُوب اؤ د هغۀ کورنۍ د بيت‌اېل نه کډه وکړه اؤ چې کله دوئ د اِفرات نه لږ غوندې لرې وُو، د راحيل د ماشُوم د پېدا کېدو وخت راغلو اؤ هغه په سخت درد کښې وه.

¹⁷چې کله هغه په سخت درد کښې وه د هغې ماشُوم پېدا شو، دايڼې هغې ته ووئيل، ”راحيل! يرېږه مه، اوس ستا بل زوئ هم شته.“

¹⁸هغه مړه کېدله اؤ د هغې ساه په وتلو وه. نو هغې په خپل زوئ بِن اَونى نُوم کېښودو، خو يعقُوب پرې بنيامين نُوم کېښودو.

¹⁹چې راحيل په حق ورسېده، نو هغه د اِفرات د لار په غاړه ښخه کړے شوه، چې هغه ځائ اوس د بيت‌لحم په نُوم يادېږى.

²⁰يعقُوب هلته يو يادګارى کاڼے ودرولو اؤ دا تر نن ورځې پورې د راحيل د قبر نښه ده.

²¹يعقُوب بيا کډه يوړه اؤ د عدر د څوکيدارۍ د برج بل طرف ته يې خېمه ولګوله.

²²چې کله يعقُوب په هغه وطن کښې اوسېدو، روبين لاړو اؤ د خپل پلار د بلې ښځې بِلهاه سره څملاستو، يعقُوب د دې نه خبر شو اؤ غُصه شو. د يعقُوب دولس زامن وُو.

²³دا د لِياه زامن دى : روبين د يعقُوب مشر زوئ، شمعُون، ليوى، يهُوداه، يساکار اؤ زبولون.

²⁴د راحيل زامن يُوسف اؤ بنيامين وُو.

²⁵د راحيل د وينځې بِلهاه زامن، دان اؤ نفتالى وُو.

²⁶د لِياه د وينځې زِلفه زامن جاد اؤ اشير وُو. دا د يعقُوب زامن دى چې په ميسوپوتاميه کښې پېدا شوى وُو.

²⁷يعقُوب واپس خپل پلار اِسحاق ته، حبرون سره نزدې ممرې ته راغلو، دا هغه ځائ دې چرته چې اِبراهيم اؤ اِسحاق اوسېدلى وُو.

²⁸د اِسحاق ټول عُمر يو سل اتيا کاله وو

²⁹اؤ اِسحاق ساه ورکړه اؤ ښۀ په پوخ عُمر کښې وفات شو اؤ هغه خپلو زامنو عيساؤ اؤ يعقُوب ښخ کړو.