Read Pashto Bible (Yusufzai) — د پښتو مقدس کتاب پيدايښت 36 Bible Online

پيدايښت 36 - Pashto Bible (Yusufzai) — د پښتو مقدس کتاب bible

پيدايښت 36

¹دا د عيساؤ اولاد دے، چې د ادوم په نُوم هم يادېدو.

²عيساؤ کنعانۍ جينکۍ وادۀ کړې : د حِتى اېلون لُور عده، د صبعون حِوى د عنه د زوئ لُور، اُهليبامه،

³اؤ د اِسمٰعيل لُور د نبايوت خور، بشامه.

⁴د عده نه اليفز پېدا شو، د بشامه نه رُعواېل پېدا شو،

⁵اؤ اُهليبامه نه يعوس، يعلام اؤ قورح پېدا شول، د عيساؤ دا ټول زامن د کنعان په وطن کښې پېدا شوى وُو.

⁶بيا عيساؤ د خپلو ښځو، خپلو زامنو، لُوڼو اؤ د خپل کور ټولو خلقو سره اؤ خپلو ټولو څاروو اؤ د هغه هر څۀ سره چې هغۀ په کنعان کښې ګټلى وُو، روان شو اؤ د خپل ورور يعقُوب نه بل وطن ته لاړو.

⁷هغه ځکه لاړو چې په کُوم ځائ کښې هغه اؤ يعقُوب اوسېدل هلته يې ګُزاره نه کېدله، د هغوئ څاروى ډېر زيات وُو اؤ نور دوئ په يو ځائ اوسېدلے نۀ شول.

⁸نو عيساؤ د غرُونو وطن ادوم کښې اوسېدو.

⁹دا د ادوميانو د پلار نيکۀ، د عيساؤ اولاد دے.

¹⁰د عيساؤ د ښځې عده نه يو زوئ، اليفز پېدا شو. اؤ د اليفز پينځۀ زامن وُو : تيمان، اومر، صفو، جعتام اؤ قنز. اؤ د بلې ښځې، تمنت نه د هغۀ يو بل زوئ عماليق وو. د عيساؤ د ښځې بشامه نه د هغۀ يو زوئ رُعواېل پېدا شو اؤ د رُعواېل څلور زامن وُو : نحت، زارح، سمه اؤ مِزه.

¹⁴د عنه لُور د صبعون نمسۍ چې د عيساؤ ښځه وه د هغې نوم اُهليبامه وو د هغې د عيساؤ نه دا درى زامن پېدا شول : يعوس، يعلام اؤ قورح.

¹⁵دا د عيساؤ اولاد نه جوړې شوې قبيلې دى. د عيساؤ مشر زوئ اليفز د دې قبيلو پلار نيکۀ وو : تيمان، اومر، صفو، قنز،

¹⁶قورح، جعتام اؤ عماليق. دا ټول د عيساؤ د ښځې عده اولاد دے.

¹⁷د عيساؤ زوئ رُعواېل د دې قبيلو پلار نيکۀ وو : نحت، زارح، سمه اؤ مِزه. دا ټول د عيساؤ د ښځې بشامه اولاد وو.

¹⁸دا قبيلې د عيساؤ د ښځې اُهليبامه اولاد دے چې هغه د عنه لُور وه : يعوس، يعلام اؤ قورح.

¹⁹دا ټولې قبيلې د عيساؤ په اولاد کښې راځى.

²⁰د ادوم د وطن اصلى اوسېدُونکى په قبيلو کښې تقسيم وُو چې د دوئ نسب‌نامه د حورى، شعير دې اولاد ته ځى : لوطان، سوبل، صبعون، عنه، ديسون، ايصر اؤ ديسان.

²²لوطان د حورى اؤ هيمان قومُونو پلار نيکۀ وو. د لوطان د خور تمنت نُوم وو.

²³سوبل د علوان، منحات، عيبال، سفو اؤ د اونام قومُونو پلار نيکۀ وو.

²⁴د صبعون دوه زامن آيه اؤ عنه وُو. دا هغه عنه دے چې کله هغۀ د خپل پلار خرۀ څرول نو په صحرا کښې يې ګرمې چينې ومُوندلې.

²⁵عنه د ديسون پلار وو، هغه د حمدان، اشبان، يتران اؤ کِران قومُونو پلار نيکۀ وو. د عنه يوه لُور وه چې د هغې نُوم هم اُهليبامه وو.

²⁷ايصر د بِلهان، زعوان اؤ عقان قومُونو پلار نيکۀ وو.

²⁸ديسان د عُوض اؤ اِران قومُونو پلار نيکۀ وو.

²⁹دا د ادوم په وطن کښې حورى قبيلې دى : لوطان، سوبل، صبعون، عنه، ديسون، ايصر اؤ ديسان.

³¹د دې نه مخکښې په بنى اِسرائيلو هيچا هم بادشاهى نۀ وه کړې اؤ دې بادشاهانو د ادوم په وطن بادشاهى وکړه : د دِنهابا نه د بعور زوئ بالع، د بصرا نه د زارح زوئ يوباب، د تيمان د علاقې نه حشيم اؤ د عويت نه د بدد زوئ هدد. هدد د موآب په وطن کښې په يو جنګ کښې ميديانو ته شکست ورکړے وو : د مُسرقه نه شمله، د سيند د غاړې رحوبوت نه شاؤل، د عکبور زوئ بعل حنان، د پاوُ نه حدد، د هغۀ ښځه مهيطب‌اېل، د مطرِد لُور اؤ ميضاهاب نمسۍ وه.

⁴⁰عيساؤ د دې ادومى قبيلو پلار نيکۀ وو : تمنت، علوه، يتيت، اُهليبامه، ايله، فينون، قنز، تيمان، مِبصار، مجدِاېل اؤ عِرام. يوه علاقه به د هم هغه قبيلې په نُوم مشهُوره وه چې چرته به هغه قبيله اوسېده.