Read Pashto Bible (Yusufzai) — د پښتو مقدس کتاب پيدايښت 40 Bible Online

پيدايښت 40 - Pashto Bible (Yusufzai) — د پښتو مقدس کتاب bible

پيدايښت 40

¹څۀ موده وروستو د مِصر د بادشاه ساقى اؤ مشر نانبائى داسې څۀ غلط کار وکړو چې بادشاه ورباندې خفه شو.

²فِرعون دې دواړو آفسرانو ته سخت غُصه شو

³اؤ دوئ يې د څوکيدارانو د مشر په کور کښې قېد کړل، هم په هغه ځائ کښې چې چرته يُوسف قېد وو.

⁴دوئ ډېر وخت په قېد‌خانه کښې تېر کړو اؤ د څوکيدارانو مشر يُوسف ته حواله کړل چې د دوئ خِدمت کوى.

⁵يوه شپه په قېد‌خانه کښې د مِصر د بادشاه ساقى اؤ مشر نانبائى دواړو خوب وليدو اؤ د هر يو خوب خپل خپل مطلب وو.

⁶چې کله يُوسف هغوئ له سحر ورَغلو، هغۀ دوئ پرېشانه وليدل.

⁷هغۀ د هغوئ نه تپوس وکړو، ”تاسو ولې نن پرېشانه ښکارئ؟“

⁸هغوئ ورته ووئيل، ”مُونږ دواړو يو يو خوب ليدلے دے اؤ دلته داسې هيڅ څوک هم نشته چې تعبير يې وکړى.“ يُوسف ورته ووئيل چې، ”دا خو خُدائ پاک دے چې هغه د خوبُونو د تعبير عِلم ورکوى، تاسو ما ته خپل خوبُونه ووايئ.“

⁹نو ساقى ووئيل، ”زما په خوب کښې زما په مخکښې د انګُورو بُوټے وو،

¹⁰د دې درې څانګې وې. چې څنګه د دې نه پاڼې راووتلې، غُوټۍ راڅرګندې شوې اؤ انګُور پاخۀ شول.

¹¹ما د فِرعون پيالۍ په لاس کښې نيولې وه، نو ما انګُور راواخستل اؤ دا مې په پياله کښې نچوړ کړل اؤ هغۀ له مې ورکړل.“

¹²يُوسف ووئيل، ”د دې تعبير دا دے : دا درې څانګې درې ورځې دى.

¹³په دې دريو ورځو کښې به بادشاه تا آزاد کړى اؤ په خپل ځائ به دې کښېنوى. تۀ به هغۀ له پيالۍ ورکړې اؤ د مخکښې په شان به د هغۀ ساقى يې.

¹⁴خو چې کله ستا د پاره هر څۀ سم شى نو ما مۀ هېروه اؤ په ما ډېره مِهربانى وکړه فِرعون ته زما ذِکر وکړه اؤ د دې قېد‌خانې نه خلاصېدلو کښې زما مدد وکړه.

¹⁵ځکه چې زۀ د عبرانيانو د وطن نه راتښتولے شوے وم اؤ ما دلته په مِصر کښې داسې هيڅ کار نۀ دے کړے چې په دې قېد‌خانه کښې بندى شم.“

¹⁶چې کله مشر نانبائى پوهه شو چې د ساقى د خوب تعبير ښۀ وو، هغۀ هم يُوسف ته ووئيل ”ما هم خوب ليدلے دے، ما په سر د ډوډۍ درې ټوکرۍ راوانې کړې وې.

¹⁷د ټولو سر ته ټوکرۍ کښې د فِرعون د پاره هر قِسم ډوډۍ وې اؤ مارغانو دا خوړلې.“

¹⁸يُوسف جواب ورکړو، ”د دې تعبير دا دے : هغه درې ټوکرۍ درې ورځې دى.

¹⁹په دريو ورځو کښې به فِرعون ستا نه سر لړه کړى. بيا به تا په يوه ونه کښې راځوړند کړى اؤ مارغان به ستا غوښه وخورى.“

²⁰په دريمه ورځ دا د فِرعون د پېدايښت ورځ وه، هغۀ خپلو ټولو درباريانو له يوه لويه ډوډۍ وکړه، هغۀ خپل ساقى اؤ مشر نانبائى رابهر کړل اؤ د خپلو درباريانو په مخکښې يې حاضر کړل.

²¹فِرعون، ساقى بيا په خپل وړومبى ځائ کښېنولو اؤ ساقى پيالۍ فِرعون له په لاس کښې ورکړه،

²²خو هغه مشر نانبائى يې راځوړند کړو. دا ټول هم هغه شان وشول لکه څنګه چې يُوسف وئيلى وُو.

²³خو ساقى يُوسف راياد نۀ کړو. اؤ هېر يې کړو.