Read Pashto Bible (Yusufzai) — د پښتو مقدس کتاب پيدايښت 45 Bible Online

پيدايښت 45 - Pashto Bible (Yusufzai) — د پښتو مقدس کتاب bible

پيدايښت 45

¹بيا يُوسف د خپلو خِدمت‌ګارانو په مخکښې زړۀ نۀ شو کلک کولے، نو هغۀ ټولو مِصريانو له حُکم ورکړو چې د هغۀ نه لاړ شى. چې کله يُوسف په خپلو ورُوڼو ځان پېژندلو د هغۀ سره نور هيڅ څوک هم نۀ وُو.

²هغۀ دومره په چغو چغو وژړل چې مِصريانو هم دا ژړا واؤرېده اؤ دا خبر د فِرعون محل ته ورسېدو.

³يُوسف خپلو ورُوڼو ته ووئيل، ”زۀ يُوسف يم. ولې زما پلار لا ژوندے دے؟“ خو چې د هغۀ ورُوڼو دا واؤرېدل، هغوئ دومره ويرېدل چې هغوئ خبرې هم نۀ شوې کولے.

⁴بيا يُوسف هغوئ ته ووئيل، ”ما ته لږ رانزدې شئ.“ اؤ هغوئ ورنزدې شول اؤ هغۀ ورته ووئيل، ”زۀ ستاسو ورور يُوسف يم، کُوم چې تاسو په مِصر کښې خرڅ کړے وو.

⁵اوس مۀ خفه کېږئ اؤ مۀ خپل ځانُونه ملامته کوئ چې تاسو دلته زۀ خرڅ کړم. بې‌شکه زۀ خُدائ پاک ستاسو نه مخکښې ولېږلم چې د خلقو ژوند بچ کړم.

⁶دا خو په زمکه د قحط صِرف دويم کال دے، پينځه نور کالونه به هم وى چې کَرل اؤ رېبل به په کښې نۀ کېږى.

⁷خُدائ پاک زۀ ستاسو نه مخکښې دلته رالېږلے يم چې تاسو په دُنيا کښې داسې په عجيبه طريقه بچ شئ اؤ چې دا خبره يقينى وى چې تاسو اؤ ستاسو اولاد ژوندے پاتې شى.

⁸نو دا تاسو نۀ وئ، خُدائ پاک وو چې هغۀ زۀ دلته راولېږلم. هغۀ زۀ د فِرعون د ټولو نه لوئ وزير، د هغۀ د دربار مشر اؤ په ټول مِصر مشر جوړ کړے يم.

⁹اوس زر زر واپس زما پلار له لاړ شئ اؤ هغۀ ته ووايئ چې ستا زوئ يُوسف داسې وائى : خُدائ پاک زۀ په ټول مِصر مشر جوړ کړے يم، زر زر ما ته راشه.

¹⁰تاسو به د جشن په علاقه کښې اوسېږئ، چرته چې به تۀ، ستاسو بچى، نمسى، ستاسو ګډې، چېلۍ، څاروى اؤ ستاسو هر څۀ به ما ته نزدې وى.

¹¹کۀ تاسو په جشن کښې يئ نو زۀ به ستاسو خيال ساتم. د قحط پينځۀ کالونه خو لا پاتې دى، اؤ زۀ دا نۀ غواړم چې تاسو، ستاسو کورنۍ اؤ ستاسو څاروى دې د لوږې نه مړۀ شى.

¹²اؤ ګورئ، اوس بنيامين اؤ تاسو هم ما وينئ چې زۀ په رښتيا يُوسف يم چې ستاسو سره خبرې کوم.

¹³زما پلار ته ووايئ چې ما ته دلته په مِصر کښې څومره عِزت مِلاؤ شوے دے اؤ هغه هر څۀ ورته ووايئ چې تاسو ليدلى دى. اؤ زر زر يې دلته راولئ.“

¹⁴هغۀ د خپل ورور بنيامين نه لاسُونه تاؤ کړل اؤ وې ژړل، بنيامين هم وژړل چې هغه يې غاړه ويستلو.

¹⁵بيا په ژړا ژړا کښې، هغۀ خپل ټول ورُوڼه غاړه ويستل اؤ ښُکل يې کړل. د هغې نه پس د هغۀ ورُوڼو ورسره خبرې اترې شروع کړې.

¹⁶چې کله دا خبر محل ته ورسېدو چې د يُوسف ورُوڼه راغلى دى، نو فِرعون اؤ د هغۀ درباريان خوشحال شول.

¹⁷فِرعون يُوسف ته ووئيل، ”خپلو ورُوڼو ته ووايه چې خپل څاروى بار کړى اؤ د کنعان وطن ته دې واپس لاړ شى.

¹⁸هغوئ دې خپل پلار اؤ خپلې کورنۍ دلته راولى اؤ دلته دې واپس راشى. زۀ به دوئ له په مِصر کښې د ټولو نه ښۀ زمکه ورکړم اؤ هغوئ به د هغې زمکې نه ښۀ ډېره ګټه واخلى.

¹⁹هغوئ ته دا هم ووايه چې د مِصر نه خپل ځان سره ګاډۍ بوځى چې په کښې خپلې ښځې، ماشُومان اؤ خپل پلار د ځان سره راولى.

²⁰د هغوئ نه چې کُوم مالُونه اؤ سامانونه پاتې شى د هغې غم دې نۀ کوى، ځکه چې په مِصر کښې د ټولو نه ښۀ زمکه به د هغوئ وى.“

²¹د يعقُوب زامنو هم هغه شان وکړل چې څنګه فِرعون حُکم کړے وو نو يُوسف هغوئ له ګاډۍ اؤ د سفر د پاره خوراک هم ورکړو.

²²هغۀ هر يو له د جامو نوې جوړې هم ورکړې، خو هغۀ بنيامين له درې سوه د سپينو زرو سيکې اؤ پينځۀ جوړه نوې جامې ورکړې.

²³هغۀ خپل پلار له د مِصر په ښۀ سامانُونو بار لس خرې اؤ لس د غلې بار خرې، ډوډۍ اؤ د سفر د پاره خوراک هم ورولېږلو.

²⁴هغۀ خپل ورُوڼه رُخصت کړل اؤ چې هغوئ څنګه روان شول هغۀ هغوئ ته ووئيل، ”په لاره کښې بحث مۀ کوئ.“

²⁵دوئ د مِصر نه روان شول اؤ د کنعان په وطن کښې خپل پلار اؤ کور ته لاړل.

²⁶هغوئ هغۀ ته ووئيل چې، ”يُوسف ژوندے دے. هغه د ټول مِصر مشر دے.“ يعقُوب حق حېران شو اؤ د هغوئ په خبرو يې يقين نۀ راتلو.

²⁷خو چې کله هغوئ ورته هغه هر څۀ ووئيل کُوم چې يُوسف هغوئ ته وئيلى وُو اؤ چې هغه ګاډۍ يې هم وليدلې کُومې چې يُوسف رالېږلې وې چې هغه به په کښې مِصر ته بوځى، نو د هغوئ پلار يعقُوب کښې ساه راغله.

²⁸هغۀ ووئيل، ”زما زوئ يُوسف ژوندے دے! بس هم دغه مې غوښتل! زۀ ورځم چې د مرګ نه مخکښې يې ووينم.“