Read Pashto Bible (Yusufzai) — د پښتو مقدس کتاب پيدايښت 7 Bible Online

پيدايښت 7 - Pashto Bible (Yusufzai) — د پښتو مقدس کتاب bible

پيدايښت 7

¹بيا مالِک خُدائ نُوح ته ووئيل، ”د خپل ټول بال بچ سره کشتۍ ته وخېژه، ما ته پته ده چې يواځې تۀ په ټوله دُنيا کښې هغه صادق سړے يې چې ښۀ عمل کوې.

²د هر قِسم حلال ځناورو نه اووۀ جوړې واخله، خو د هر قِسم حرام ځناورو نه صِرف يوه يوه جوړه واخله.

³اؤ هر قِسم مارغانو نه هم اووۀ جوړې واخله، د دې د پاره چې هر قِسم ځناور اؤ مارغان په مخ د زمکې ژوندى پاتې شى.

⁴د نن نه اووۀ ورځې پس به زۀ باران راولم چې څلوېښت شپې اؤ څلوېښت ورځې به ورېږى، د دې د پاره چې ټول ژوندى د زمکې د مخ نه ورک شى.“

⁵نو نُوح هغه هر څۀ وکړل چې څنګه مالِک خُدائ ورته حُکم ورکړے وو.

⁶نُوح د شپږو سوو کالو وو چې په زمکه سېلاب راغلو.

⁷نو په هغه وخت نُوح اؤ د هغۀ ښځه، د هغۀ زامن اؤ د هغوئ ښځې کشتۍ ته وختل چې د سېلاب نه ځان بچ کړى،

⁸د هر قِسم ځناورو اؤ مارغانو يو نر اؤ يوه ښځه، حلال اؤ حرام ټول،

⁹نُوح کشتۍ ته وخېژول، لکه چې څنګه خُدائ پاک حُکم ورکړے وو.

¹⁰اووۀ ورځې پس سېلاب راغلو.

¹¹چې کله نُوح د شپږو سوو کالو وو، نو د دويمې مياشتې په اوولسمه ورځ د زمکې لاندې د بې‌شمېره چينو خُلې راخلاصې شوې اؤ د آسمان ټولې طوفانى دروازې راخلاصې شوې،

¹²اؤ په زمکه څلوېښت ورځې اؤ شپې باران وشو.

¹³هم په هغه ورځ نُوح اؤ د هغۀ ښځه، د هغۀ درې زامن، سِم، حام اؤ يافت اؤ د هغوئ ښځې ټول کشتۍ ته وختل.

¹⁴د دوئ سره هر قِسم څاروى اؤ ځنګلى ځناور، واړۀ اؤ غټ اؤ هر قِسم مارغان هم وُو.

¹⁵د هر قِسم ژوندى څيزُونو جوړې د نُوح سره کشتۍ ته وختلې،

¹⁶چې څنګه خُدائ پاک حُکم ورکړے وو. بيا مالِک خُدائ په نُوح پسې دروازه بند کړه.

¹⁷څلوېښت ورځې په زمکه سېلاب وو، اوبۀ ډېرې زياتې شوې اؤ کشتۍ يې اُوچته کړه.

¹⁸اوبۀ زياتې شوې اؤ کشتۍ د اوبو د پاسه ګرځېدله.

¹⁹اوبۀ دومره زياتې شوې چې لوړ لوړ غرُونه يې پټ کړل،

²⁰اوبۀ دومره وختلې چې تقريباً د غرُونو د سرُونو نه اتۀ ګزه اُوچتې شوې.

²¹په زمکه هر ژوندے څيز مړ شو، ټول مارغان، ځناور اؤ ټول بنيادم.

²²په زمکه هر ژوندے څيز چې ساه لرى، مړ شو.

²³مالِک خُدائ هر ژوندے څيز د زمکې د مخ نه ورک کړو. بنيادم، ځناور اؤ مارغان. خو صِرف نُوح اؤ هغه ژوندى څيزُونه چې د هغۀ سره په کشتۍ کښې وُو ژوندى پاتې شول.

²⁴اؤ اوبۀ د يو نيم سل ورځو پورې نۀ کمېدلې.