Read Pashto Bible (Yusufzai) — د پښتو مقدس کتاب پيدايښت 8 Bible Online

پيدايښت 8 - Pashto Bible (Yusufzai) — د پښتو مقدس کتاب bible

پيدايښت 8

¹نُوح، د هغۀ بال بچ اؤ هغه ټول ځناور کُوم چې په کشتۍ کښې وُو د خُدائ پاک هېر نۀ وُو، هغۀ په زمکه هوا راوستله، نو اوبۀ په کمېدو شوې.

²د زمکې لاندې د چينو خُلې اؤ د آسمان طوفانى دروازې بند شوې. باران ودرېدو،

³اؤ اوبۀ ورو ورو په يو نيم سل ورځو کښې کمې شوې.

⁴د اوومې مياشتې په اوولسمه ورځ کشتۍ د اراراط په علاقه کښې په يو غرۀ ودرېده.

⁵اوبۀ کمېدې اؤ د لسمې مياشتې په وړومبۍ ورځ د غرُونو څُوکې راڅرګندې شوې.

⁶څلوېښت ورځې پس نُوح د کشتۍ کړکۍ کولاؤ کړه

⁷اؤ يو کارغۀ يې والُوځولو. هغه واپس رانۀ غلو، خو په هوا کښې تر هغې پورې اخوا دېخوا ګرځېدو چې د زمکې نه اوبۀ وچې شوې.

⁸په دې دوران کښې، نُوح ګُوګُوشتکه والُوځوله چې وګورى چې اوبۀ ختمې دى کۀ نۀ،

⁹خو اوبو تر اوسه پورې زمکه پټه کړې وه اؤ ګُوګُوشتکې د خپو لګولو ځائ پېدا نۀ کړو. نو واپس راغله اؤ نُوح لاس بهر کړو اؤ ځان سره يې کشتۍ کښې کښېنوله.

¹⁰د اووۀ ورځو اِنتظار نه پس هغۀ بيا ګُوګُوشتکه والُوځوله.

¹¹اؤ په ماښامى کښې هغۀ ته واپس راغله اؤ په مخُوکه کښې يې شنه د زيتُونو پاڼه نيولې وه. نو نُوح ته پته ولګېده چې اوبۀ کمې شوې دى.

¹²هغۀ بيا نور اووۀ ورځې اِنتظار وکړو اؤ يو ځل بيا يې ګُوګُوشتکه والُوځوله، خو دا ځل واپس رانۀ غله.

¹³چې کله نُوح د شپږ سوه اؤ د يو کال شو، نو د وړومبۍ مياشتې په وړومبۍ ورځ، اوبۀ وچې شوې. نُوح د کشتۍ د چت يوه حِصه کولاؤ کړه، نظر يې واچولو اؤ چې يې وکتل نو زمکه په وچېدو وه.

¹⁴د دويمې مياشتې په اوويشتمه ورځ زمکه بېخى وچه وه.

¹⁵نو خُدائ پاک نُوح ته ووئيل چې،

¹⁶”د خپلې ښځې، خپلو زامنو اؤ د دوئ د ښځو سره د کشتۍ نه بهر لاړ شه.

¹⁷ټول مارغان اؤ ځناور هم د ځان سره کُوز کړه، چې نور بچى پېدا کړى اؤ په ټوله زمکه کښې خوارۀ شى.“

¹⁸نو نُوح د خپلې ښځې، خپلو زامنو اؤ د دوئ د ښځو سره د کشتۍ نه کُوز شو.

¹⁹ټول ځناور اؤ مارغان په خپله خپله ډله کښې د کشتۍ نه ووتل.

²⁰نُوح يوه قُربان‌ګاه جوړه کړه چې مالِک خُدائ ته قُربانى پيش کړى، هغۀ د هر قِسم حلالو ځناورو اؤ مارغانو نه يو يو واخستو، حلال يې کړل، په قُربان‌ګاه کښې يې وسوزول اؤ د خُدائ پاک په حضُور کښې يې پېش کړل.

²¹د قُربانۍ په خوشبو مالِک خُدائ رضا شو اؤ خپل ځان سره يې ووئيل، ”د بنيادم د عمل په وجه به بيا زۀ هيڅ کله زمکه نۀ لعنتى کوم، ما ته پته ده چې د ماشُوموالى نه د دوئ خيالونه خراب وى. بيا به ټول مخلُوق تباه نۀ کړم، لکه چې دا ځل مې تباه کړى دى.

²²چې تر کُومې پورې دُنيا موجُوده وى، کَرل اؤ رېبل به وى، يخنى اؤ ګرمى به وى، اوړے اؤ ژمے به وى، شپه اؤ ورځ به وى اؤ دا به نۀ ختمېږى.“