Read Pashto Bible (Yusufzai) — د پښتو مقدس کتاب پيدايښت 9 Bible Online

پيدايښت 9 - Pashto Bible (Yusufzai) — د پښتو مقدس کتاب bible

پيدايښت 9

¹خُدائ پاک نُوح اؤ د هغۀ زامنو له برکت ورکړو اؤ وې وئيل، ”آباد شئ اؤ ډېر بچى پېدا کړئ، نو ستاسو اولاد به په ټوله دُنيا کښې اوسېږى.

²ټول ځناور، مارغان اؤ کبان به ستاسو نه يرېږى، دا ټول ستاسو د اِختيار لاندې دى.

³اوس دا ځناور تاسو خوړلے شئ اؤ داسې شنۀ بُوټى هم، دا ټول ستاسو د خوراک د پاره دى.

⁴خو چې په کومه غوښه کښې وينه وى هغه به نۀ خورئ، دا ستاسو د پاره منع ده ځکه چې په وينه کښې ژوندُون دے.

⁵کۀ څوک بل کس قتلوى، زۀ به ورسره حِساب کوم. کۀ يو ځناور بنيادم ووژنى نو سزا به يې مرګ وى.

⁶ځکه چې خُدائ پاک د خپل ځان په شان بنيادم جوړ کړے دے. کۀ څوک د بنيادم وينه تويَوى، په بدل کښې به د هغۀ وينه توئ شى،

⁷ډېر بچى پېدا کړئ، نو ستاسو اولاد به په ټوله دُنيا کښې اوسېږى.“

⁸خُدائ پاک نُوح اؤ د هغۀ زامنو ته ووئيل چې،

⁹”ګورئ! اوس زۀ تاسو اؤ ستاسو د اولاد سره دا تړون کوم،

¹⁰هم داسې د هر ژوندى څيز، د ټولو مارغانو، ځناورو اؤ هر هغه څيز سره چې ستاسو سره د کشتۍ نه رابهر شوى وُو.

¹¹زۀ تاسو سره د دې خبرې تړون کوم چې بيا به هيڅ کله هم ټول ژوندى په سېلاب نۀ غرقېږى، بيا به په سېلاب دُنيا نۀ تباه کېږى.

¹²دا نښه به نۀ ختمېدُونکے تړون وى کُوم چې زۀ ستا اؤ د ټولو ژوندو څيزُونو سره کوم،

¹³زۀ به په آسمان کښې د بُوډۍ ټال جوړوم. دا به زما د دُنيا سره د تړون نښه وى.

¹⁴چې کله هم زۀ په زمکه وريځې راولم اؤ چې د بُوډۍ ټال په وريځو کښې راڅرګندېږى،

¹⁵نو ما ته به خپل تړون رايادېږى چې سېلاب به بيا هيڅ کله ټول ژوندى څيزُونه نۀ تباه کوى.

¹⁶چې کله په وريځو کښې د بُوډۍ ټال څرګند شى، زۀ به ورته ګورم اؤ هغه نۀ ختمېدُونکے تړون به رايادوم کُوم چې ما د زمکې د ټولو ژوندو څيزُونو سره کړے دے.

¹⁷دا زما د هغه تړون نښه ده کُوم چې زۀ د دُنيا د ټولو ژوندو څيزُونو سره کوم.“

¹⁸د نُوح زامن چې د کشتۍ نه کُوز شول هغوئ سِم، حام اؤ يافت وُو. (حام د کنعان پلار وو.)

¹⁹په زمکه چې څومره خلق دى دا ټول د نُوح د دريو زامنو اولاد دے.

²⁰نُوح زميدار وو، هغه وړومبے کس وو چې د انګُورو باغ يې وکَرلو.

²¹د انګُورو شراب څښلو نه پس هغه نشه شو اؤ په خپله خېمه کښې بربنډ څملاستو.

²²چې کله د کنعان پلار حام، خپل پلار داسې وليدو نو هغه بهر لاړو اؤ خپل دوه ورُوڼه يې خبرکړل.

²³نو سِم اؤ يافت يو څادر واخستو اؤ د خپلو اُوږو شا ته يې ونيولو. اؤ خېمې ته په شا دننه لاړل اؤ خپل پلار يې پټ کړو اؤ مخُونه يې اړولى وُو چې پلار بربنډ ونۀ ګورى.

²⁴چې کله نُوح په خود کښې شو اؤ خبر شو چې د ټولو کشرى زوئ د هغۀ سره څۀ کړى دى،

²⁵نو هغۀ ووئيل چې، ”په کنعان دې لعنت وى، هغه دې د ټولو ورُوڼو د غُلامانو غُلام شى.

²⁶مالِک خُدائ دې سِم بختور کړى، اؤ کنعان دې د هغۀ غُلام کړى.

²⁷خُدائ پاک دې يافت ډېر تېر کړى، د هغۀ اولاد اؤ د سِم خلق دې د ورُوڼو په شان کړى، اؤ کنعان دې د هغۀ غُلام کړى.“

²⁸د سېلاب نه پس نُوح نور درې نيم سوه کاله ژوندے وو

²⁹اؤ د نهۀ نيم سوه کالو په عُمر کښې په حق ورسېدو.