Read Pashto Bible (Yusufzai) — د پښتو مقدس کتاب دوهم سموئيل 10 Bible Online

دوهم سموئيل 10 - Pashto Bible (Yusufzai) — د پښتو مقدس کتاب bible

دوهم سموئيل 10

¹څۀ موده وروستو د عمون بادشاه ناحس مړ شو او د هغۀ زوئ حنون بادشاه شوج.

²داؤد بادشاه ووئيل، ”زۀ به په حنون هغسې مِهربانه شم، لکه چې د هغۀ پلار ناحس په ما مِهربانه وو.“ نو داؤد پېغام وړُونکى ورولېږل چې هغۀ له تسلى ورکړى. کله چې هغوئ عمون ته ورسېدل،

³د عمونيانو مشرانو بادشاه ته ووئيل، ”ستا خيال دا دے څۀ چې داؤد ستا د پلار درناوے کوى چې هغۀ دا کسان د همدردۍ دپاره درلېږلى دى؟ بالکل نه! هغۀ دا د جاسوسۍ دپاره رالېږلى دى چې ښار ولټوى او په مونږ باندې فتح حاصله کړى!“

⁴حنون د داؤد پېغام وړُونکى ونيول او يو طرف ته ګيرې يې ورله کلې کړې، جامې يې ورله وشلولې چې د نوم نه لاندې بربنډ شى او هغوئ يې واپس ولېږل.

⁵هغوئ چې کورونو ته راواپس شول نو ډېر زيات شرمېدل. کله چې داؤد خبر شو چې څۀ شوى وُو، نو هغۀ خبر ورولېږلو چې هغوئ دې تر هغې پورې په يريحو کښې ايسار شى چې ګيرې يې بيا راوشى.

⁶کله چې عمونيانو ته پته ولګېده چې داؤد يې دشمن شوے دے، نو هغوئ د بيت رِحوب او ضوباه نه شل زره شامى فوجيان په پېسو راوستل، د معکه د بادشا ورسره يو زر سړى او دولس زره سړى ورسره د طوب وُو.

⁷داؤد د دې نه خبر شو او يوآب يې د ټول لښکر سره د هغوئ خِلاف ولېږلو.

⁸عمونيان روان شول او د ربه په دروازه کښې يې د جنګ دپاره صفُونه جوړ کړل، کوم چې د هغوئ مرکزى ښار وو، خو هغه نورو يعنې شاميانو او د طوب او معکه سړو په مېدان کښې د جنګ تيارے وکړو.

⁹يوآب چې وليدل چې د دشمن لښکر به د مخکښې او شا طرف نه حمله کوى، نو هغۀ ښۀ ښۀ بنى اِسرائيلى فوجيان خوښ کړل او شاميانو ته مخامخ يې په صفُونو کښې ودرول.

¹⁰هغۀ پاتې لښکر د خپل ورور ابيشى د مشرۍ لاندې ودرولو، چا چې هغوئ عمونيانو ته مخامخ په صفُونو کښې ودرول.

¹¹يوآب هغۀ ته ووئيل، ”که تا ته پته ولګېږى چې شاميان ما له شکست راکوى، نو زما مدد له راشه او که عمونيان تا له شکست درکوى، نو زۀ به ستا مدد له درشم.

¹²تکړه شه او حوصله مضبوطه کړه! راځئ چې د خپلو خلقو او د خُدائ پاک د ښارونو دپاره سخت جنګ وکړُو. او مالِک خُدائ به هغه څۀ کوى چې د هغۀ په نظر کښې صحيح وى!“

¹³يوآب او د هغۀ سړى د حملې دپاره رامخکښې شول او شاميان وتښتېدل.

¹⁴کله چې عمونيانو وليدل چې شاميان تښتى، نو هغوئ د ابيشى نه وتښتېدل او ښار ته راواپس شول. بيا يوآب د عمونيانو نه راواپس شو او يروشلم ته لاړو.

¹⁵شاميانو ته پته ولګېده چې هغوئ د بنى اِسرائيلو نه شکست خوړلے دے، نو هغوئ خپل ټول لښکر راغونډ کړو.

¹⁶هدد‌عزر بادشاه شاميان راوغوښتل چې هغوئ د فرات سيند نَمرخاتۀ طرف ته وُو او هغوئ حلام ته د سوباب د مشرۍ لاندې راغلل. سوباب د ضوباه د هدد‌عزر بادشاه د لښکر مشر وو.

¹⁷کله چې داؤد د دې نه خبر شو، نو هغۀ د بنى اِسرائيلو ټول فوجيان راغونډ کړل، د اُردن سيند نه پورې وتل او حلام ته روان شول، هلته شاميانو هغۀ ته مخامخ د جنګ دپاره صفُونه جوړ کړى وُو او جنګ شروع شو،

¹⁸بنى اِسرائيلو شاميانو له بيا شکست ورکړو. داؤد او د هغۀ سړو اووۀ سوه د جنګى ګاډو والا او څلوېښت زره فوجيان ووژل او هغوئ د دشمن مشر سوباب زخمى کړو، چې بيا د جنګ په مېدان کښې مړ شو.

¹⁹چې د هدد‌عزر لاندې بادشاهانو ته پته ولګېده چې هغوئ د بنى اِسرائيلو نه شکست خوړلے دے، نو هغوئ ورسره صُلح وکړه او د هغوئ لاندې راغلل. او شاميان د عمونيانو سره د نورې ملګرتيا کولو نه يرېدل.