Read Pashto Bible (Yusufzai) — د پښتو مقدس کتاب دوهم سموئيل 16 Bible Online

دوهم سموئيل 16 - Pashto Bible (Yusufzai) — د پښتو مقدس کتاب bible

دوهم سموئيل 16

¹کله چې داؤد د غرۀ د سر نه لږ مخکښې تلے وو، نو هغه ناڅاپه د مفيبوست د نوکر ضيبا سره مِلاو شو، د هغۀ سره دوه خرونه وُو چې دوه سوو ډوډو، يو سل موټى کشمشو، سل موټى د اوړى مېوو او د شرابو ډکه يوه مشکيزه پرې بار وُو.

²داؤد بادشاه ترې نه تپوس وکړو، ”تۀ په دې ټولو څيزُونو باندې څۀ کوې؟“ ضيبا ورته ووئيل، ”بادشاه سلامت! خرۀ ستا د کورنۍ د سوَرلۍ دپاره دى، روټۍ او مېوې د دې سړو د خوراک دپاره دى او شراب د دوئ د څښلو دپاره دى چې کله دوئ په صحرا کښې ستړى وى.“

³بادشاه ترې نه تپوس وکړو، ”ستا د نېک ساول نمسے مفيبوست چرته دے؟“ ضيبا ورته ووئيل، ”هغه په يروشلم کښې ايسار دے، ځکه چې د هغۀ خيال دا دے چې بنى اِسرائيليان به هغۀ له د هغۀ د نيکۀ ساول بادشاهى بيا ورکړى.“

⁴بادشاه ضيبا ته ووئيل، ”د مفيبوست سره چې څۀ هم دى هغه ستا شول.“ ضيبا جواب ورکړو، ”زۀ ستا په وړاندې د عزت نه ټيټېږم، بادشاه سلامت! تۀ دې زما نه همېشه خوشحاله اوسې!“

⁵کله چې داؤد بادشاه بحوريم ته ورسېدو، نو د ساول يو خپلوان د جيرا زوئ سِمعى د مِلاوېدو دپاره ورله راووتلو، کله چې هغه راروان وو نو کنځل يې کول.

⁶سِمعى داؤد او د هغۀ آفسران په کاڼو وويشتل، اګر چې د داؤد سره خپل سړى او فوجيان هم څنګ په څنګ ولاړ وُو.

⁷سِمعى کنځلې کولې او وې ووئيل، ”اوځه، اوځه! قاتِله، مجرمه!

⁸تا د ساول نه بادشاهى واخستله او اوس مالِک خُدائ ستا نه بدله اخلى ځکه چې تا د ساول د کورنۍ ډېر کسان وژلى دى. مالِک خُدائ ستا زوئ ابى‌سلوم له بادشاهى ورکړې ده، اے قاتِله! تۀ تباه يې!“

⁹ابيشى ووئيل چې د هغۀ مور ضروياه وه، ”بادشاه سلامت! تا دا مردار سپے ولې پرېښودو چې کنځلې درته وکړى؟ ما له اِجازت راکړه چې زۀ ورشم او سر ترې نه پرې کړم!“

¹⁰بادشاه ابيشى او د هغۀ ورور يوآب ته ووئيل، ”دا ستا کار نۀ دے. که هغه ما ته کنځل کوى او هغۀ ته مالِک خُدائ دا وئيلى وى، نو څوک دا حق لرى چې تپوس ترې نه وکړى چې دا ولې کوې؟“

¹¹نو داؤد ابيشى او خپلو ټولو آفسرانو ته ووئيل، ”زما خپل زوئ زما د وژلو کوشش کوى، تاسو په دې بنيامينى باندې ولې حېرانېږئ؟ مالِک خُدائ ورته وئيلى دى چې ما ته کنځلې وکړى، نو هغه پرېږدئ چې هم داسې کوى.

¹²کېدے شى چې مالِک خُدائ زما مشکل ووينى او نن زما سره د دې کنځلو په بدل کښې ښۀ وکړى.“

¹³نو داؤد او د هغۀ سړى په لاره روان وُو. سِمعى هم په نزدې غر باندې روان وو، هغۀ کنځلې کولې او په روانه کښې يې هغوئ په کاڼو ويشتل او خاورې يې ورباندې اچولې.

¹⁴کله چې بادشاه او د هغۀ ټول سړى اُردن ته ورسېدل نو هغوئ سخت ستړى وُو او هلته هغوئ آرام وکړو.

¹⁵ابى‌سلوم او د هغۀ سره ټول بنى اِسرائيليان يروشلم ته ننوتل او اخيتُفل د هغوئ سره وو.

¹⁶کله چې د داؤد اعتبارى ملګرے حوسى د ابى‌سلوم سره مِلاو شو نو هغۀ چغه کړه، ”بادشاه سلامت! زنده‌باد! بادشاه سلامت! زنده‌باد!“

¹⁷ابى‌سلوم ترې نه تپوس وکړو، ”ستا د خپل دوست داؤد سره وفادارى چرته لاړه؟ تۀ د هغۀ سره ولې لانۀ ړې؟“

¹⁸حوسى ورته ووئيل، ”ما داسې څنګه کړى وے؟ زۀ د هغه چا په طرف يم چې څوک د مالِک خُدائ، دې خلقو او ټولو بنى اِسرائيلو خوښ کړے وى. زۀ به تا سره ايسار شم.

¹⁹د دې نه علاوه، زۀ چې د خپل نېک د زوئ خِدمت نۀ کوم نو د چا به کوم؟ څنګه چې ما ستا د پلار خِدمت کړ‌ے دے، نو زۀ به ستا خِدمت هم کوم.“

²⁰بيا ابى‌سلوم اخيتُفل ته وروګرځېدو او ورته يې ووئيل، ”تۀ مونږ له خپله مشوره راکړه چې مونږ څۀ وکړُو؟“

²¹اخيتُفل ورته ووئيل، ”لاړ شه او د خپل پلار د نورو ښځو سره څمله کومې يې چې د ځان نه وروستو پرېښودلې دى چې د محل خيال ساتى. نو بيا به په بنى اِسرائيلو کښې هر چا ته پته ولګېږى چې تا په څرګنده د خپل پلار بې‌عزتى کړې ده نو داسې ستا ملګرى به نور هم تکړه شى.“

²²نو هغوئ د محل په چت باندې د ابى‌سلوم دپاره يوه خېمه ولګوله او د ټولو خلقو په مخکښې ابى‌سلوم ورننوتلو او د خپل پلار د نورو ښځو سره څملاستو.

²³په هغه ورځو کښې به چې اخيتُفل کومه مشوره ورکوله نو هغه به داسې منلے شوه لکه چې دا بالکل د خُدائ پاک خبره وى، داؤد او ابى‌سلوم دواړو به منله.