Read Pashto Bible (Yusufzai) — د پښتو مقدس کتاب دوهم سموئيل 20 Bible Online

دوهم سموئيل 20 - Pashto Bible (Yusufzai) — د پښتو مقدس کتاب bible

دوهم سموئيل 20

¹په جِلجال کښې داسې وشول چې د بنيامين د قبيلې يو بدمعاش سړے وو. هغه د بِکرى زوئ وو او نوم يې شيبا وو. هغۀ بيګل وغږولو او چغه يې کړه، ”نۀ به د داؤد نه په ميراث کښې مونږ ته څۀ مِلاؤ شى اؤ نۀ مونږ ته د هغۀ نه د ملاويدو څۀ اُميد شته! اے بنى اِسرائيلو راځئ چې خپلو کورونو ته ځُو!“

²نو داسې بنى اِسرائيلو د داؤد خِلاف بغاوت وکړو او د شيبا سره روان شول، خو د يهوداه سړى وفادار وُو او د اُردن نه تر يروشلم پورې په داؤد پسې لاړل.

³کله چې داؤد په يروشلم کښې خپل محل ته ورسېدو، هغۀ هغه لس نورې ښځې بوتلې چې کومې يې د محل د خيال ساتلو دپاره پرېښې وې او په حِفاظت کښې يې ساتلې وې. هغوئ له يې د ضرورت څيزُونه ورکول، خو د هغوئ سره يې څملاستل نۀ کول. په هغوئ باندې ټول عُمر دا پابندى وه چې د کُنډو په شان ژوند تېروى.

⁴بادشاه عماسا ته ووئيل، ”د يهوداه سړى راغونډ کړه او سبا نه بل سبا د هغوئ سره حاضر شه.“

⁵عماسا د هغوئ د راغونډولو دپاره لاړو، خو چې بادشاه کوم وخت مقرر کړے وو نو هغه هغې له واپس رانۀ غلو.

⁶نو بادشاه ابيشى ته ووئيل، ”شيبا به مونږ له د ابى‌سلوم نه زيات مصيبت جوړوى. زما سړى بوځه او په هغۀ پسې لاړ شه، ګنى کېدے شى چې هغه د پَخو دېوالونو والا ښارونه ونيسى او زمونږ نه وتښتى.“

⁷نو د يوآب سړى او ټول تکړه فوجيان د ابيشى سره د يروشلم نه روان شول چې په شيبا پسې لاړ شى.

⁸چې کله هغوئ په جبعون کښې لوئ ګټ ته ورسېدل نو عماسا ورسره مِلاو شو. يوآب د جنګ دپاره زغره اغوستې وه، تُوره يې په کاش کښې ايښې وه چې په کمر‌بند پورې يې تړلې وه. چې وړاندې راغلو، نو تُوره وغورزېدله.

⁹يوآب عماسا ته ووئيل، ”زما ملګريه څنګه يې؟“ او د چل دپاره يې خپل ښے لاس د هغۀ ګيرې له وروړلو چې ښُکل يې کړى.

¹⁰چې کومه تُوره د يوآب په بل لاس کښې وه نو هغې ته د عماسا خيال نۀ وو او يوآب يې ورباندې په خېټه ووهلو او کولمې ترې نه بهر په زمکه وغورزېدې، هغه په ټکى مړ شو او يوآب ته د هغۀ د بيا وهلو ضرورت پېښ نۀ شو. بيا يوآب او د هغۀ ورور ابيشے په شيبا پسې روان شول.

¹¹د يوآب يو سړے د عماسا د لاش سره ودرېدو او آواز يې وکړو، ”څوک چې د يوآب او داؤد ملګرتيا کوى نو هغوئ دې په يوآب پسې روان شى!“

¹²د عماسا لاش په وينو کښې لت پت وو او د سړک په مينځ کښې پروت وو. د يوآب سړى دا وليدل چې هر يو کس ورته د تماشې دپاره ودرېږى، نو هغۀ لاش د سړک نه پټى ته راښکلو او څادر يې ورباندې واچولو.

¹³کله چې هغه لاش د سړک نه لرې کړے شو، نو هر يو کس د يوآب سره په شيبا پسې روان شو.

¹⁴شيبا د بنى اِسرائيلو د ټولو قبيلو د علاقې نه تېر شو او د ابيل بيت معکه ښار ته راغلو او د بِکرى د ډلې کسان راغونډ شول او په هغۀ پسې ښار ته ننوتل.

¹⁵د يوآب سړى خبر شول چې شيبا هلته دے، نو هغوئ لاړل او ښار يې محاصره کړو. هغوئ بهرنى دېوالونو ته د خاورو ډېرى جوړ کړل او دېوال کنستل يې هم شروع کړل چې دا راوغورزېږى.

¹⁶هلته په ښار کښې يوه هوښياره ښځه وه چې هغې د ديوال نه چغه کړه، ”اے خلقو واورئ! يوآب ته ووايئ چې دلته راشى، زۀ د هغۀ سره خبرې کول غواړم.“

¹⁷نو يوآب لاړو او هغې ترې نه تپوس وکړو، ”تۀ يوآب يې څۀ؟“ هغۀ ورته ووئيل، ”او، زۀ يوآب يم.“ هغې ورته ووئيل، ”صاحِبه! زما خبره واوره.“ هغۀ ورته ووئيل، ”زۀ اورم وايه.“

¹⁸هغې ورته ووئيل چې په خوا به خلقو وئيل، ”لاړ شه او د هابيل په ښار کښې به درته د مسئلې حل مِلاو شى، نو چې هغوئ به لاړل نو مسئله به حل شوه.

¹⁹زمونږ يو عظيم ښار دے، چې په بنى اِسرائيل کښې ډېر د وفا او آمن نه ډک دے. دا تۀ ولې تباه کوې؟ تۀ هغه څۀ ورانول غواړې څۀ چې د مالِک خُدائ دى؟“

²⁰يوآب ورته ووئيل، ”هيچرے نه! زۀ به ستاسو ښار هيڅ کله تباه او وران نۀ کړم.

²¹زمونږ منصُوبه دا نۀ ده. د يو سړى نوم شيبا دے چې هغه د بِکرى زوئ دے، هغه د غرونو د مُلک د اِفرائيم دے، هغۀ د داؤد بادشاه خِلاف بغاوت شروع کړے دے. بس دا يو سړے ما له په لاس کښې راکړه، نو زۀ به د ښار نه ووځم.“ هغې ورته ووئيل، ”مونږ به د هغۀ سر تا ته د دېوال نه دروغورزوُو.“

²²بيا هغه د خپلې منصُوبې سره د ښار خلقو له لاړه، هغوئ د شيبا سر پرې کړو او يوآب ته يې د دېوال نه وروغورزولو. هغۀ د دې دپاره بيګل وغږولو چې د هغۀ سړى د ښار نه لاړ شى، نو هغوئ واپس کورونو ته لاړل. او يوآب واپس بادشاه له يروشلم ته راغلو.

²³يوآب د بنى اِسرائيلو د لښکر مشر وو، د يهويدع زوئ بناياه د داؤد د څوکيدارانو مشر وو،

²⁴ادورام د هغه مزدورانو مشر وو چې په زور کار ترې نه اخستے شو، د اخيلود زوئ يهوسفط منشى وو،

²⁵سِوا د دربار منشى وو، صدوق او ابياتار اِمامان وُو،

²⁶او د يائر د ښار عيرا هم د داؤد يو اِمام وو.