Read Pashto Bible (Yusufzai) — د پښتو مقدس کتاب دوهم سموئيل 21 Bible Online

دوهم سموئيل 21 - Pashto Bible (Yusufzai) — د پښتو مقدس کتاب bible

دوهم سموئيل 21

¹د داؤد په بادشاهۍ کښې درې کاله ډېر سخت قحط وو. نو داؤد د مالِک خُدائ سره د دې په باره کښې خبره وکړه او مالِک خُدائ ووئيل، ”ساول او د هغۀ کورنۍ خُون کړے دے، ځکه چې هغۀ د جبعون قبيلې خلق ووژل.“

²(د جبعون خلق بنى اِسرائيليان نۀ وُو، هغوئ د اموريانو ژوندئ پاتې شوې يوه وړه ډله وه او بنى اِسرائيلو دا لوظ کړے وو چې هغوئ به ژوندى پرېږدى خو ساول د يهوداه او بنى اِسرائيلو د قوم پرستۍ په وجه غوښتل چې اموريان تباه کړى.)

³نو داؤد د جبعون خلق راوغوښتل او هغوئ ته يې ووئيل، ”زۀ ستاسو دپاره څۀ وکړم؟ ستاسو سره چې کومه غلطى شوې وه نو زۀ د هغې تاوان درکول غواړم، نو چې تاسو د مالِک خُدائ خلقو دپاره برکت وغواړئ.“

⁴هغوئ جواب ورکړو، ”د ساول او د هغۀ د کورنۍ سره زمونږ لانجه په سپينو او سرو زرو باندې نۀ حل کېږى او نۀ مونږ دا حق لرو چې بنى اِسرائيليان ووژنو.“ داؤد ترې نه تپوس وکړو، ”نو بيا ستاسو څۀ خيال دے چې ستاسو دپاره څۀ وکړم؟“

⁵هغوئ ورته ووئيل، ”ساول زمونږ داسې تباه کول غوښتل چې د بنى اِسرائيل په مُلک کښې زمونږ يو کس هم ژوندې پاتې نۀ شى.

⁶نو د هغۀ د اولاد نه اووۀ نران مونږ ته حواله کړه او مونږ به يې په جبعه کښې د مالِک خُدائ په وړاندې ووژنو او ځوړند به يې کړُو، چې هغه د مالِک خُدائ خوښ کړى شوى بادشاه ساول ښار دے.“ نو بادشاه ورته ووئيل، ”زۀ به هغوئ تاسو ته حواله کړم.“

⁷خو د مالِک خُدائ په نوم د هغه قسم په وجه چې هغۀ او يُونتن د يو بل سره کړ‌ے وو، داؤد مفيبوست ژوندې پرېښودو، مفيبوست د ساول نمسے او د يُونتن زوئ وو.

⁸خو هغۀ ارمونى او مفيبوست بوتلل د ساول دا دوه زامن د آيه د لور رِصفخ نه پېدا شوى وُو، هغۀ د ساول د لور ميرب پينځۀ زامن هم بوتلل، چې د برزلى د زوئ ادرعى نه يې پېدا شوى وُو، چې هغه د محوله وو.

⁹داؤد هغوئ د جبعون خلقو ته حواله کړل، چې د مالِک خُدائ په مخکښې يې په غرۀ باندې قتل کړل، نو ټول اووۀ واړه په يو ځائ مړۀ شول. سپرلے په ختمېدو وو او د وربشو لَو شروع وو، چې هغوئ ووژلے شول.

¹⁰بيا د ساول بله ښځه د آيه لور رِصفخ د ټاټ کپړه واخستله چې د ځان دپاره په هغه ګټ باندې څپر جوړ کړى چرته چې مړى پراتۀ وُو او د لَو د شروع کېدو نه واخله د خزان بارانونو د شروع کېدو پورې هغه هلته ايساره شوه. د ورځې به هغې د مړو نه مارغان شړل او د شپې به يې دا د ځنګلى ځناورو نه بچ کول.

¹¹چې داؤد خبر شو چې رِصفخ څۀ کړى وُو،

¹²نو هغه لاړو او په جِلعاد کښې يې د يبيس د خلقو نه د ساول او د هغۀ د زوئ يُونتن هډُوکى واخستل. (هغوئ دا په بيت شان کښې د بازار نه پټ کړى وُو، چرته چې فلستيانو لاشونه راځوړند کړى وُو. دا په هغه وخت وُو چې په کومه ورځ هغوئ د جِلبوعه په غرۀ باندې ساول وژلے وو.)

¹³داؤد د ساول او يُونتن او د هغه اوو سړو هډُوکى هم يوړل چې کوم ځوړند کړے شوى وُو.

¹⁴بيا هغوئ د بنيامين په علاقه ضِلع کښې د ساول پلار قيس په قبر کښې د ساول او د يُونتن هډُوکى ښخ کړل، هم هغه شان چې څنګه بادشاه حُکم کړے وو. او د هغې نه پس خُدائ پاک د هغوئ د مُلک دپاره سوال قبول کړو.

¹⁵د فلستيانو او بنى اِسرائيلو په مينځ کښې يو بل جنګ وشو او داؤد او د هغۀ سړى لاړل او فلستيانو سره يې جنګ وکړو. په يو جنګ کښې داؤد ستړے شو.

¹⁶د دېوانو د نسل اشبى بنوب د زېړو يوه نېزه روانه کړې وه چې تقريباً درې نيم کيلو وزن يې وو او يوه نوې تُوره هم ورسره وه، د هغۀ اراده دا وه چې داؤد ووژنى.

¹⁷خو د ضروياه زوئ ابيشے د داؤد مدد دپاره راغلو او په دېو باندې يې حمله وکړه او وې وژلو. بيا د داؤد سړو د داؤد نه لوظ واخستلو چې هغه به بيا هيڅ کله د هغوئ سره جنګ له نۀ ځى. هغوئ ووئيل، ”تۀ د بنى اِسرائيلو دپاره لکه د رڼا اُميد يې او مونږ دا رڼا ختمېدل نۀ غواړُو.“

¹⁸د دې نه پس په جوب کښې د فلستيانو سره يو بل جنګ وشو، چې په هغې کښې د حوسى قبيلې سِبکى يو دېو ووژلو چې د هغه دېو نوم سف وو.

¹⁹د فلستيانو سره يو بل جنګ وشو او د بيت‌لحم د يائير زوئ اِلحنان د جات جوليت ووژلو چې د هغۀ نېزه د کوټې د ستنې په شان غټه وه.

²⁰بيا په جات کښې يو بل جنګ وشو چې په کښې يو دېو وو چې د هغۀ د هر لاس او د هرې پښې شپږ شپږ ګوتې وې.

²¹هغۀ په بنى اِسرائيلو پورې خندا وکړه او د داؤد ورور د سمه زوئ، يُونتن هغه ووژلو.

²²دا څلور د جات د دېوانو اولاد وو او داؤد او د هغۀ سړو دوئ وژلى وُو.