Read Pashto Bible (Yusufzai) — د پښتو مقدس کتاب دوهم سموئيل 23 Bible Online

دوهم سموئيل 23 - Pashto Bible (Yusufzai) — د پښتو مقدس کتاب bible

دوهم سموئيل 23

¹د يَسى زوئ داؤد هغه سړے وو چې خُدائ پاک ورله شان ورکړے وو، چې د يعقوب خُدائ پاک هغه د دې دپاره خوښ کړو چې بادشاه شى او هغه د بنى اِسرائيلو دپاره مشهُور ثناء خوان هم وو. د داؤد آخرى خبرې دا وې:

²”د مالِک خُدائ روح زما په ذريعه خبرې کوى، د هغۀ پېغام زما په ژبه دے.

³د بنى اِسرائيلو خُدائ پاک وئيلى دى، د بنى اِسرائيلو حِفاظت کوُونکى ما ته وئيلى دى، هغه بادشاه چې په اِنصاف سره بادشاهى کوى، کوم چې د خُدائ پاک په يره کښې بادشاهى کوى،

⁴هغه داسې دے لکه چې بې وريځو سحر کښې نمر پړقېږى، هغه نمر چې د باران نه پس واښۀ ځلوى.

⁵نو داسې به خُدائ پاک زما اولاد له برکت ورکړى، ځکه چې هغۀ زما سره د همېشه دپاره تړون کړے دے، يو داسې تړون چې هغه به نۀ ماتېږى، يوه وعده چې نۀ به بدلېږى. زما بالکل هم دغه خواهِش دے، دا به زما خلاصُون وى، او بې شکه خُدائ پاک به داسې وکړى.

⁶خو بد کاره خلق د غورزولو شوو ازغو په شان وى، چې هيڅ څوک يې هم په خالى لاسونو سره نۀ شى راخستلے.

⁷تۀ به د دې دپاره د اوسپنې آوزار يا د نېزې نه کار اخلې، هغوئ به بېخى وسوزولے شى.“

⁸د داؤد د مشهُورو فوجيانو نومونه دا دى: وړومبے د تحُکمون يوشيب بيشبت وو، کوم چې د دريو مشر وو، هغۀ د خپلې نېزې سره د اتو سوو خِلاف جنګ وکړو او هغوئ ټول يې په يو جنګ کښې ووژل.

⁹د هغه دريو مشهُورو نه دويم د اخيو د قبيلې د دودو زوئ اليعزر وو. يوه ورځ چې فلستيان راغونډ وُو نو هغۀ او داؤد ورته ووئيل چې زمونږ سره جنګ وکړئ. نو بنى اِسرائيليان ټول وتښتېدل،

¹⁰خو هغه ټينګ شو او د فلستيانو سره يې تر دې پورې جنګ وکړو چې لاس يې کار پرېښودو او خپلې تُورې له يې نۀ شو وروړلے. مالِک خُدائ په هغه ورځ باندې لويه فتح وموندله. کله چې دا ختم شو، نو بنى اِسرائيليان اليعزر له راواپس شول او د مړو دشمنانو نه يې زغرې وويستلې.

¹¹د هغه دريو مشهُورو نه يو د حرار د اجى زوئ سمه وو. فلستيان لحى کښې راغونډ شوى وُو چرته چې د دلو يو پټے وو. بنى اِسرائيليان د فلستيانو نه وتښتېدل،

¹²خو سمه په پټى کښې ټينګ شو، د دې حِفاظت يې وکړو او فلستيان يې ووژل. مالِک خُدائ په هغه ورځ باندې لويه فتح وموندله.

¹³لَو شروع کېدو ته په نزدې وخت کښې د هغه دېرشو کسانو نه درې د عدولام غار ته لاړل، چرته چې داؤد وو، په دې وخت کښې د فلستيانو يوې ډلې په رفائيم کښې خېمې لګولې وې.

¹⁴په دې وخت کښې داؤد په يو محفوظ ځائ کښې وو او د فلستيانو يوې ډلې بيت‌لحم قبضه کړے وو.

¹⁵داؤد ډېر زيات تګے وو او وې وئيل، ”زما ډېر آرمان دے چې څوک د بيت‌لحم د دروازې سره کُوهى نه ما له څښلو له لږې اوبۀ راوړى!“

¹⁶هغه درې مشهُور فوجيان د فلستيانو کېمپ ته وردننه شول، د کُوهى نه يې اوبۀ راوويستلې او داؤد له يې راوړې. خو هغۀ دا ونۀ څښلې، او د څښلو په ځائ يې مالِک خُدائ ته د نذرانې په توګه توئ کړې.

¹⁷او وې وئيل، ”مالِک خُدايه! زۀ دا هيڅ کله نۀ شم څښلے! دا به داسې وى لکه چې زۀ د دې سړو وينې څښم چا چې خپل ژوند په خطره کښې واچولو!“ نو هغۀ د دې څښلو نه اِنکار وکړو. دا د هغه دريو مشهُورو فوجيانو د بهادرۍ کارنامې وې.

¹⁸د يوآب ورور ابيشے چې د هغۀ مور ضروياه وه د هغه دېرشو مشر وو. هغۀ د خپلې نېزې سره د دريو سوو سړو خِلاف جنګ وکړو او وې وژل او د دې په وجه هغه د هغه دريو کسانو په شان مشهُور شو.

¹⁹نو هغه د هغه دريو نه زيات عزتمند شو او د هغوئ مشر شو، خو هغه په هغه دريو کسانو کښې شمېر نۀ وو.

²⁰د يهويدع زوئ بناياه يو بل مشهُور فوجى وو، هغۀ ډېرې د بهادرۍ کارنامې وکړې چې په کښې د هغه دوو لويو موآبيانو جنګ کوُونکو وژل هم شامِل وُو. يوه ورځ چې واوره ورېدله هغه کندې ته کُوز شو او يو زمرے يې ووژلو.

²¹هغۀ يو مِصرے هم ووژلو، يو غټ سړے چې نېزه ورسره وه. بناياه په هغۀ باندې د امسا سره حمله وکړه، د مِصرى د لاس نه يې نېزه واخستله او په دې باندې يې ووژلو.

²²دا د هغه بناياه کارنامې دى چې د هغه دريو تکړه فوجيانو په شان مشهُور شو.

²³هغه په ټولو کښې ښۀ تکړه وو، خو هغه په هغه دريو کښې نۀ شو شمېرلے. داؤد هغه د خپلې حِفاظتى ډلې مشر مقرر کړو.

²⁴۲۴‏-۳۹ په هغه دېرشو کښې نور دا کسان شامِل وُو: د يوآب ورور عساهيل، د بيت‌لحم د دودو زوئ اِلحنان، د حرود اِلقه او سمه، د فليت نه خلص، د تقوع نه د عقيس زوئ عيرا، د عنتوت نه ابيعزر، د حوسى نه مبونے، د اخيو نه ضلمون، د نطوفى نه مهرے، د نطوفى د بعنه زوئ حلب، په بنيامين کښې د جبعه ريبى زوئ اِتے، د فِرعاتونى نه بناياه، د جعس د واديانو سره نزدې نه هدى، د عرباه نه ابى علبون، د بحوريم نه عزماوت، د سعلبون نه اليخبه، د يسين زامن، يُونتن، د حرار نه سمه، د حرار نه د سرار زوئ اخى آم، د معکه د احسبى زوئ اليفلط، د جلو نه د اخيتُفل زوئ الى عام، د کرمل نه حصرو، د عرب نه فعرى، د ضوباه د ناتن زوئ اِجال، د جاد نه بانى، د عمون نه صِلق، د يوآب زغره وړُونکے د بيروت نحرى، د اِترى نه جريب او عيرا، او اورِياه حِتے. دا ټول هغه اووۀ دېرش مشهُور فوجيان وُو.