Read Pashto Bible (Yusufzai) — د پښتو مقدس کتاب دوهم سموئيل 24 Bible Online

دوهم سموئيل 24 - Pashto Bible (Yusufzai) — د پښتو مقدس کتاب bible

دوهم سموئيل 24

¹مالِک خُدائ بنى اِسرائيلو ته يو ځل بيا غصه شو او د داؤد په ذريعه يې په هغوئ مصيبت راوستلو. مالِک خُدائ هغۀ ته ووئيل، ”لاړ شه او د بنى اِسرائيل او يهوداه خلق وشمېره.“

²نو داؤد د خپل لښکر مشر يوآب له حُکم ورکړو، ”د خپلو آفسرانو سره د بنى اِسرائيلو ټولو قبيلو ته لاړ شه د يو سر نه تر بل سره پورې وګرځېږه او خلق و شمېره. زۀ دا معلومول غواړم چې هغوئ څومره دى.“

³خو يوآب بادشاه ته ووئيل، ”بادشاه سلامت! مالِک خُدائ ستا خُدائ پاک دې بنى اِسرائيليان د اوس نه يو په سل نور هم زيات کړى او ژوندې اوسې چې تۀ يې وګورې. خو بادشاه سلامت! تۀ داسې کول ولې غواړې؟“

⁴خو بادشاه په يوآب او د هغۀ په آفسرانو باندې د هغۀ حُکم ومنلو، هغوئ د هغۀ د حضُور نه روان شول او د بنى اِسرائيلو خلقو شمېرلو له لاړل،

⁵هغوئ د اُردن سيند نه واوړېدل او د عروعير جنوبى طرف ته يې خېمې ولګولې، دا ښار د جاد په علاقه کښې د وادۍ په مينځ کښې وو.

⁶او د حِتيانو په علاقه کښې جِلعاد او قادِس ته روان وُو. بيا هغوئ دان ته لاړل او د دان نه هغوئ نمرپرېواتۀ طرف صيدا ته لاړل.

⁷بيا هغوئ جنوبى طرف ته د پَخو دېوالونو ښار صور ته لاړل او هم هغسې د حِويانو او کنعانيانو ټولو ښارونو ته هم لاړل او په آخر کښې د يهوداه په جنوبى برخه کښې بيرسبع ته لاړل.

⁸نو نهۀ مياشتې او شل ورځې پس هغوئ يروشلم ته راواپس شول، چې په ټول مُلک کښې يې سفر کړے وو.

⁹هغوئ بادشاه له د هغه ټولو سړو شمېر ورکړو چا چې جنګ کولے شو: اتۀ لاکه سړى په بنى اِسرائيل کښې او پينځۀ لاکه په يهوداه کښې وُو.

¹⁰خو چې کله داؤد مردم ‌شمارى وکړه نو خپل ضمير هغه ملامته کول شروع کړل او هغۀ مالِک خُدائ ته ووئيل، ”ما چې څۀ کړى دى نو دا مې يوه سخته ګناه کړې ده، مالِکه خُدايه! زما غلطى معاف کړه. ما د کم عقلتوب کار کړے دے.“

¹¹۱۱‏-۱۲ مالِک خُدائ جاد ته ووئيل چې د داؤد پېشګوئې ورکوُونکے وو، ”لاړ شه او داؤد ته ووايه چې زۀ هغۀ له درې خوښې ورکوم او هغه دې په هغه دريو سزاګانو کښې يوه خوښه کړى نو زۀ به هم هغه شان وکړم.“ په ورپسې سحر د داؤد د پاڅېدو نه پس،

¹³جاد هغۀ له لاړو او چې مالِک خُدائ څۀ وئيلى وُو هغه يې ورته ووئيل او تپوس يې ترې نه وکړو، ”په دې کښې ستا کوم يو خوښ دے؟ ستا په مُلک کښې درې کاله قحط وى يا درې مياشتې چې خپل دشمن نه منډې وهې يا چې درې ورځې ستا په مُلک وبا راشى؟ اوس په دې باندې سوچ وکړه او ما ته ووايه چې مالِک خُدائ له کوم يو جواب يوسم.“

¹⁴داؤد جواب ورکړو، ”زۀ د نااُميدۍ په حالت کښې يم! خو زۀ دا نۀ غواړم چې ما له انسان سزا راکړى. پرېږده چې مالِک خُدائ په خپله مونږ له سزا راکړى، ځکه چې هغه رحمان او رحيم دے.“

¹⁵نو مالِک خُدائ په بنى اِسرائيلو باندې يوه وبا راولېږله، چې د هغه سحر نه واخله تر هغه وخت پورې وه چې کوم يې خوښ کړے وو. د مُلک د يو سر نه تر بل سره پورې اويا زره بنى اِسرائيليان مړۀ شول.

¹⁶کله چې د مالِک خُدائ فرِښته د يروشلم په تباه کولو باندې وه، نو مالِک خُدائ د خلقو سزا په باره کښې خپله فېصله بدله کړه او هغه فرِښتې ته يې ووئيل کومې چې هغوئ وژل، ”بس دے، دا دومره ورله ډېر دى!“ فرِښته د يو يبوسى اروناه د درمند سره وه.

¹⁷داؤد فرِښته وليده چې هغې خلق وژل او مالِک خُدائ ته يې ووئيل، ”زۀ ګناهګار يم. زۀ هغه کس يم چا چې غلطى کړې ده. دې عاجزو خلقو څۀ کړى دى؟ تا له په کار دى چې ما او زما کورنۍ له سزا راکړې.“

¹⁸هم په هغه ورځ جاد داؤد له ورَغلو او ورته يې ووئيل، ”د اروناه درمند ته وخېژه او مالِک خُدائ ته يوه قربان‌ګاه جوړه کړه.“

¹⁹نو داؤد د مالِک خُدائ حُکم ومنلو او چې څنګه جاد ورته وئيلى وُو هغه لاړو.

²⁰اروناه لاندې وکتل او وې وليدل چې بادشاه او د هغۀ آفسران راروان وُو. هغه د داؤد په مخکښې پړمخې پرېوتو

²¹او تپوس يې وکړو، ”بادشاه سلامت! تۀ دلته د څۀ دپاره راغلې؟“ داؤد ورته ووئيل، ”د دې دپاره چې ستا درمند واخلم او مالِک خُدائ ته يوه قربان‌ګاه جوړه کړم، دا د دې دپاره چې وبا ودرېږى.“

²²اروناه ورته ووئيل، ”بادشاه سلامت! وايې خله او چې څۀ دې خوښ وى نو هغه مالِک خُدائ ته پېش کړه. دا غوَيى دى چې په قربان‌ګاه باندې به يې د نذرانې په توګه وسوزوې، د هغوئ جغونه او د غوبل تختې دا دى چې د سوزولو د لرګو په توګه يې اِستعمال کړې.“

²³ارونا هر څۀ بادشاه له ورکړل او ورته يې ووئيل، ”مالِک خُدائ ستا خُدائ پاک دې ستا نذرانه قبوله کړى.“

²⁴خو بادشاه ورته ووئيل، ”نه، زۀ به د دې قيمت درکوم. زۀ به مالِک خُدائ خپل خُدائ پاک ته هغه څۀ په نذرانه کښې نۀ پېش کوم چې مفت مِلاو شى.“ نو هغۀ درمند او غوَيى د سپينو زرو په پنځوسو سيکو باندې واخستل.

²⁵بيا هغۀ مالِک خُدائ ته يوه قربان‌ګاه جوړه کړه او سوزېدونکې نذرانې او د سلامتۍ نذرانې يې پېش کړې. مالِک خُدائ د هغۀ سوال قبول کړو او په بنى اِسرائيلو کښې وبا بنده شوه.