Read Pashto Bible (Yusufzai) — د پښتو مقدس کتاب دوهم سموئيل 5 Bible Online

دوهم سموئيل 5 - Pashto Bible (Yusufzai) — د پښتو مقدس کتاب bible

دوهم سموئيل 5

¹بيا په حبرون کښې د بنى اِسرائيل ټولې قبيلې داؤد ته راغلې او هغۀ ته يې ووئيل، ”مونږ ستا خپله وينه يُو.

²په تېره زمانه کښې، تر څو چې ساول زمونږ بادشاه وو نو تا په جنګ کښې د بنى اِسرائيلو مشرى کوله او مالِک خُدائ تا ته ووئيل چې تۀ به د هغۀ د خلقو مشرى کوې او د هغوئ بادشاه به يې.“

³نو د بنى اِسرائيل ټول مشران په حبرون کښې داؤد بادشاه له راغلل. داؤد د هغوئ سره تړون وکړو، هغوئ د هغۀ سر په تيلو غوړ کړو، نو هغه د بنى اِسرائيلو بادشاه شو.

⁴داؤد د دېرشو کالو وو چې هغه بادشاه شو او هغۀ څلوېښت کاله بادشاهى وکړه.

⁵هغۀ په حبرون کښې په يهوداه باندې اووۀ نيم کاله بادشاهى وکړه او په يروشلم کښې يې په ټولو بنى اِسرائيلو او يهوداه باندې درې دېرش کاله بادشاهى وکړه.

⁶هغه وخت راغلو چې داؤد بادشاه او د هغۀ سړى په يروشلم باندې حملې کولو دپاره روان شول. کوم يبوسيان چې هلته اوسېدل د هغوئ خيال دا وو چې داؤد به ښار فتح نۀ کړى، نو هغوئ هغۀ ته ووئيل، ”تۀ به هيڅ کله دننه نۀ شې راتلے، ړاندۀ او شل دې هم بهر ايسارولے شى.“

⁷خو داؤد د هغوئ د صِيون قلعه قبضه کړه او دا ”د داؤد ښار“ په نوم مشهُوره شوه.

⁸په هغه ورځ داؤد خپلو سړو ته ووئيل، ”دلته داسې څوک شته چې هغه د يبوسيانو سره زما هومره نفرت لرى؟ دومره زيات چې هغوئ ووژنى؟ نو د اوبو په سورنګ کښې لاړ شئ او په هغه غريبو، شلو او ړندو باندې حمله وکړئ.“ نو داسې دا يو متل جوړ شو، ”شل او ړاندۀ د مالِک خُدائ کور ته نۀ شى ننوتلے.“

⁹د هغه قلعې قبضه کولو نه پس، داؤد په دې کښې اوسېدو او ”د داؤد ښار“ نوم يې پرې کېښودو. هغۀ د دې نه ګېرچاپېره ښار جوړ کړو، د هغه ځائ نه يې شروع وکړه چرته چې د غرۀ نَمرخاتۀ طرف ته زمکه په خاورو باندې ډکه شوې وه.

¹⁰هغه وخت په وخت نور هم تکړه کېدو، ځکه چې مالِک خُدائ رب‌الافواج د هغۀ مل وو.

¹¹د صور بادشاه حيرام داؤد ته يو کاروبارى ډله ولېږله، هغۀ له يې د ترکاڼانو سره د نختر لرګى او د کاڼو ګِلکاران ورکړل چې يو محل جوړ کړى.

¹²نو داؤد ته پته ولګېده چې مالِک خُدائ دے د بنى اِسرائيلو بادشاه مقرر کړے دے او د خپلو خلقو د خاطره يې خپله بادشاهى بختوره کوله.

¹³د حبرون نه يروشلم ته تلو نه پس، داؤد نورې وينځې او ښځې وکړې او نور زامن او لوڼه يې پېدا شول.

¹⁴د هغۀ دا بچى په يروشلم کښې پېدا شوى وُو: سمه، سوباب، ناتن، سليمان،

¹⁵اِبحار، اليسوع، نفج، يفيع،

¹⁶اليسمع، اليدع او اليفلط.

¹⁷کله چې فلستيان خبر شول چې داؤد د بنى اِسرائيلو بادشاه جوړ شوے دے، نو د هغوئ ټول لښکر روان شو چې داؤد ونيسى. کله چې داؤد د دې نه خبر شو نو هغه لاندې د پَخو دېوالونو ځائ ته لاړو.

¹⁸فلستيان د رفائيم مېدان ته راروسېدل او دا يې قبضه کړو.

¹⁹داؤد د مالِک خُدائ نه تپوس وکړو، ”زۀ په فلستيانو حمله وکړم څۀ؟ تۀ به ما له فتح راکړې څۀ؟“ مالِک خُدائ ورته ووئيل، ”او! حمله پرې وکړه، زۀ به تا له فتح درکړم.“

²⁰نو داؤد بعل پراضيم ته لاړو او هلته يې فلستيانو له شکست ورکړو. هغۀ ووئيل، ”مالِک خُدائ زما د دشمنانو نه د سېلاب په شان ناڅاپه تېر شوے دے.“ نو د هغه ځائ نوم بعل پراضيم شو.

²¹کله چې فلستيان وتښتېدل، نو هغوئ خپل بُتان شا ته پرېښودل او داؤد او د هغۀ سړو دا يوړل.

²²فلستيان واپس رفائيم مېدان ته لاړل او دا يې بيا قبضه کړو.

²³داؤد يو ځل بيا د مالِک خُدائ سره مشوره وکړه او هغۀ ورته ووئيل، ”په هغوئ باندې د دې ځائ نه حمله مۀ کوه، خو د بل طرف نه ورباندې راتاو شه او حمله پرې وکړه، چرته چې د تُوت ونې دى.

²⁴کله چې تۀ د تُوت په سرونو باندې د تګ آواز واورې، نو بيا حمله وکړه، زۀ به ستاسو نه مخکښې روان يم د دې دپاره چې د فلستيانو لښکر له شکست ورکړم.“

²⁵داؤد هم هغه شان وکړل چې څنګه مالِک خُدائ حُکم کړے وو او فلستيان يې د جبعې نه تر جزر پورې ووژل.