Read Pashto Bible (Yusufzai) — د پښتو مقدس کتاب دوهم سموئيل 7 Bible Online

دوهم سموئيل 7 - Pashto Bible (Yusufzai) — د پښتو مقدس کتاب bible

دوهم سموئيل 7

¹داؤد بادشاه په سکون سره خپل محل کښې اوسېدو او مالِک خُدائ هغه د خپلو ټولو دشمنانو نه بې غمه کړے وو.

²يوه ورځ داؤد بادشاه ناتن پېغمبر ته ووئيل، ”زۀ دلته په يو داسې کور کښې اوسېږم چې د دِيار د ونې نه جوړ دے، خو د خُدائ پاک د لوظ صندوق په يوه خېمه کښې پروت دے!“

³ناتن ورته ووئيل، ”چې څۀ دې په زړۀ کښې وى نو هم هغه شان وکړه، ځکه چې مالِک خُدائ ستا مل دے.“

⁴خو په هغه شپه مالِک خُدائ ناتن ته ووئيل،

⁵”لاړ شه او زما خِدمت کوُونکى داؤد ته ووايه چې زۀ داسې وايم چې تۀ هغه څوک نۀ يې چې زما دپاره د اوسېدو دپاره کور جوړ کړې.

⁶د هغه وخت نه واخله چې ما بنى اِسرائيل د مِصر نه راوويستل تر اوسه پورې زۀ کله هم په يو کور کښې نۀ يم اوسېدلے، ما د هغوئ سره سفر کولو او په يوه خېمه کښې اوسېدم.

⁷د بنى اِسرائيلو سره په ټول سفر کښې ما د هغوئ مشرانو کښې يو ته هم نۀ دى وئيلى چې زما دپاره تاسو د دِيار کور ولې نۀ دے جوړ کړے.

⁸نو زما خِدمت کوُونکى داؤد ته ووايه چې زۀ رب‌الافواج هغۀ ته وايم چې ما تۀ په پټو کښې د ګډو شپونتوب نه بوتلې او د خپلو خلقو بنى اِسرائيلو بادشاه مې جوړ کړې.

⁹تۀ چې چرته هم تلې نو زۀ ستا مل وم او چې تۀ مخ په وړاندې تلې نو ما ستا ټولو دشمنانو له شکست ورکولو. زۀ به ستا نوم د دنيا د لويو مشرانو په شان مشهُور کړم.

¹⁰۱۰‏-۱۱ ما د خپلو خلقو بنى اِسرائيلو دپاره يو ځائ خوښ کړے دے او ما هغوئ هلته آباد کړى دى، چې هلته به نور هغوئ بغېر د څۀ تکليف نه ژوند تېروى. د کوم وخت نه چې هغوئ دې مُلک ته ننوتلى دى، نو خراب خلق په هغوئ باندې حملې کوى، خو داسې به بيا نۀ کېږى. زۀ تا سره وعده کوم چې تا به د خپلو ټولو دشمنانو نه بچ کوم او تا له به اولاد درکړم.

¹²کله چې تۀ مړ شې او د خپل پلار نيکۀ په اديره کښې ښخ شې، نو زۀ به ستا يو زوئ بادشاه جوړ کړم او د هغۀ بادشاهى به قائمه کړم.

¹³نو هغه به زما د نوم دپاره کور جوړ کړى او د هغۀ بادشاهى به د همېشه دپاره قائمه کړم.

¹⁴زۀ به د هغۀ د پلار په شان يم او هغه به زما د زوئ په شان وى. کله چې هغه غلطى وکړى نو زۀ به هغۀ له د يو انسانى پلار په شان په چُوکه سزا ورکوم.

¹⁵خو زۀ به د هغۀ نه خپله نۀ ختمېدونکې مينه نۀ لرې کوم لکه څنګه چې ما د ساول نه لرې کړه، هغه مې د دې دپاره اخوا کړو چې تۀ بادشاه شې.

¹⁶تۀ به همېشه اولاد لرې او زۀ به ستا بادشاهى همېشه دپاره قائمه ساتم. ستا بادشاهت به هيڅ کله نه ختمېږى.“

¹⁷ناتن داؤد ته هغه ټولې خبرې وکړې چې خُدائ پاک په هغۀ نازلې کړې وې.

¹⁸بيا داؤد د مالِک خُدائ د حضُور خېمې ته دننه لاړو، کښېناستو او دعا يې وکړه، ”مالِکه خُدايه، خُدايه پاکه! زۀ او زما کورنۍ د دې لائق نۀ يُو، څۀ چې تا زمونږ دپاره کړى دى.

¹⁹مالِکه خُدايه پاکه! تا د نور څۀ کولو وعده هم کړې ده. مالِکه خُدايه پاکه! تۀ اکثر د خلقو سره هم دغه شان کوې.

²⁰زۀ نور تا ته څۀ ووايم! تۀ ما خپل خِدمت کوُونکے پېژنې.

²¹د خپلې وعدې د خا‌طره او د خپلې مرضۍ په مطابق، تا دا لوئ کار کړے دے او دا دې خپل خِدمت کوُونکى ته ښودلے دے.

²²مالِکه خُدايه پاکه! تۀ څومره لوئ يې، ستا په شان بل هيڅ څوک هم نشته، مونږ ته همېشه دا پته ده چې صِرف تۀ خُدائ پاک يې.

²³د زمکې په مخ باندې د بنى اِسرائيلو په شان بل يو قوم هم نشته، چې هغوئ تا د غلامۍ نه خلاص کړل د دې دپاره چې هغوئ ستا خپل خلق شى. تا چې د هغوئ دپاره کوم لوئ او عجيبه کارونه کړى دى د هغې په وجه ستا نوم په دنيا کښې مشهُور او خور شوے دے. چې ستا خلق مخ په وړاندې تلل نو تا نور قومونه او د هغوئ معبودان لرې کړل، هغه خلق کوم چې تا د مِصر نه آزاد کړل د دې دپاره چې ستا خپل خلق شى.

²⁴تا بنى اِسرائيليان همېشه دپاره خپل خلق جوړ کړى دى او مالِکه خُدايه! تۀ د هغوئ خُدائ پاک شوې.

²⁵نو مالِکه خُدايه پاکه! تۀ خپله وعده پوره کوه، کومه وعده چې تا زما او زما د اولاد په باره کښې کړې ده او چې تا څۀ وئيلى دى هم هغه وکړه.

²⁶ستا نوم به لوئ وى او خلق به همېشه وائى چې، رب‌الافواج د بنى اِسرائيلو خُدائ پاک دے. او ستا د خِدمت کوُونکى داؤد بادشاهت به د همېشه دپاره قائم وى.

²⁷رب‌الافواجه، د بنى اِسرائيلو خُدايه پاکه! زۀ دا جرت کوم چې زۀ ستا نه دا سوال وکړم، ځکه چې تا دا هر څۀ په ما، په خپل خِدمت کوُونکى نازل کړى دى او تا ما ته وئيلى دى چې تۀ به زما د اولاد نه بادشاهان جوړوې.

²⁸نو مالِکه خُدايه! هم تۀ خُدائ پاک يې، ستا کلام رېښتُونے دے او تا زما سره دا زبردسته وعده کړې ده.

²⁹زۀ تا ته سوال کوم چې تۀ زما اولاد له برکت ورکړه نو چې هغوئ ستا د رحم نه خوند واخلى. مالِکه خُدايه پاکه! تا دا وعده کړې ده او ستا برکت به همېشه دپاره زما د اولاد په سر وى.“