Read Pashto Bible (Yusufzai) — د پښتو مقدس کتاب دوهم سموئيل 8 Bible Online

دوهم سموئيل 8 - Pashto Bible (Yusufzai) — د پښتو مقدس کتاب bible

دوهم سموئيل 8

¹څۀ وخت وروستو داؤد بادشاه فلستيانو له شکست ورکړو. نو بنى اِسرائيليان د هغوئ د قبضې نه خلاص شول.

²بيا هغۀ موآبيانو له شکست ورکړو. هغۀ قېديان په قطار کښې په زمکه څملول او ډلې يې جوړې کړې. په هرو درېو ډلو کښې به يې دوه وژلې او يوه به يې ژوندئ پرېښودله. نو موآبيان د هغۀ لاندې راغلل او هغۀ له يې محصُول ورکولو.

³بيا داؤد د شام د مُلک د ضوباه بادشاه له شکست وکړو، چې د هغۀ نوم هدد‌عزر وو او دې د رِحوب زوئ وو، دا په هغه وخت کښې وشول چې کله هدد‌عزر د پاسنى فرات سره علاقې بيا نيولو له روان وو.

⁴داؤد د هغۀ اوولس سوه په اسونو سوارۀ سړى او شل زره عام فوجيان ونيول. هغۀ د سلو جنګى ګاډو دپاره ښۀ ډېر اسونه وساتل او باقى نور ټول يې ګډ کړل.

⁵کله چې د دمشق شاميانو د هدد‌عزر بادشاه مدد دپاره يو لښکر ولېږلو، نو داؤد په هغوئ باندې حمله وکړه او دوه ويشت زره سړى يې ترې نه ووژل.

⁶بيا هغۀ په هغه علاقه کښې فوجى کېمپونه ولګول او هغوئ د هغۀ د اختيار لاندې راغلل او محصُول يې ورکولو. مالِک خُدائ په هر ځائ کښې داؤد له فتح ورکوله.

⁷داؤد د هدد‌عزر د آفسرانو د سرو زرو ډالونه قبضه کړل او دا يې يروشلم ته راوړل.

⁸هغۀ د بطاه او بيروتى ښارونو نه په لوئ مِقدار کښې زيړ هم يوړل چې په دې ښارونو باندې هدد‌عزر حکومت کولو.

⁹د حمات بادشاه توغے خبر شو چې داؤد د هدد‌عزر ټول لښکر له شکست ورکړے دے.

¹⁰نو هغۀ خپل زوئ يورام بادشاه داؤد ته ولېږلو او په هدد‌عزر باندې د فتحې مبارکى يې ورکړه، چې د هغۀ خِلاف توغى څو ځلې جنګ کړے وو. يورام داؤد ته تُحفې يوړې چې د سرو زرو، سپينو زرو او زيړو نه جوړې وې.

¹¹داؤد بادشاه دا تُحفې وقف کړې چې په عِبادت کښې به اِستعمالېږى، په دې کښې هغه سرۀ او سپين زر هم شامِل وُو چې د هغه قومونو نه ايې خستى وُو چې کوم يې فتح کړى وُو،

¹²د ادوم، موآب، عمون، فلستيه او عماليق قومونو نه، هم داسې د هغه مالِ غنيمت حِصه هم چې هغۀ د هدد‌عزر نه اخستے وو.

¹³کله چې داؤد د مالګې په وادۍ کښې اتلس زره ادوميانو وژلو نه پس راوګرځېدو نو هغه نور هم مشهُور شو.

¹⁴هغۀ په ټول ادوم کښې فوجى کېمپونه ولګول او د هغه ځائ خلق د هغۀ د اختيار لاندې راغلل. مالِک خُدائ داؤد له په هر ځائ کښې فتح ورکوله.

¹⁵داؤد په ټولو بنى اِسرائيلو باندې حکومت کولو او هغۀ دا خبره يقينى کړه چې د هغۀ د ټولو خلقو سره همېشه د عدل او اِنصاف سلوک کېږى.

¹⁶يوآب د لښکر مشر وو چې د هغۀ مور ضروياه وه، د اخيلود زوئ يهوسفط منشى وو،

¹⁷د اخيطوب زوئ صدوق او د ابياتار زوئ اخيمُلک اِمامان وُو، شراياه د عدالت منشى وو،

¹⁸د يهويدع زوئ بناياه د داؤد د څوکيدارانو مشر وو او د داؤد زامن اِمامان وُو.