Read Pashto Bible (Yusufzai) — د پښتو مقدس کتاب اول پادشاهان 12 Bible Online

اول پادشاهان 12 - Pashto Bible (Yusufzai) — د پښتو مقدس کتاب bible

اول پادشاهان 12

¹بيا رحُبعام شِکم ته لاړو، چرته چې ټول بنى اِسرائيليان راغونډ شوى وُو چې دے بادشاه جوړ کړى.

²کله چې د نباط زوئ يربعام د دې نه خبر شو چې څوک د سليمان بادشاه نه مِصر ته تښتېدلے وو، هغه د مِصر نه راواپس شو.

³د شمالى قبيلو خلقو يربعام راوغوښتو او بيا هغه ټول ورسره رحُبعام له لاړل او هغۀ ته يې ووئيل،

⁴”ستا پلار سليمان په مونږ باندې درانۀ بوجونه کېښودل. که تۀ دا بوجونه سپک کړې، نو مونږ به ستا وفادار خلق يُو.“

⁵هغۀ ورته ووئيل، ”درې ورځې پس راشئ نو زۀ به تاسو له جواب درکړم.“ نو هغوئ لاړل.

⁶رحُبعام بادشاه د هغه سپين ګېرو مشرانو سره مشوره وکړه کوم چې د هغۀ د پلار سليمان مشوره ورکوُونکى وُو. هغۀ ترې نه تپوس وکړو، ”تاسو ما له مشوره راکړئ چې دې خلقو له څۀ جواب ورکړم؟“

⁷هغوئ ورته ووئيل، ”که تۀ نن د دې خلقو خِدمتګار جوړ شې او د هغوئ خِدمت وکړې او خوږې خبرې ورسره وکړې، نو هغوئ به همېشه ستا خِدمت کوُونکى وى.“

⁸خو هغۀ د مشرانو نصيحت رد کړو او هغه ځلمو له لاړو کوم چې د هغۀ سره لوئ شوى وُو او اوس د هغۀ مشوره ورکوُونکى وُو.

⁹هغۀ ترې نه تپوس وکړو، ”تاسو ما له مشوره راکړئ چې څۀ وکړُو. مونږ هغه خلقو ته څۀ ووايُو چې ما ته وائى چې د هغوئ بوجونه سپک کړم چې زما پلار ورباندې ايښى دى؟“

¹⁰نو ځلمو ورته ووئيل، ”څوک چې آسان ژوند غواړى نو هغوئ ته ووايه چى: زما کچه ګوته زما د پلار د ملا نه غټه ده!

¹¹هغوئ ته ووايه چې زما پلار په تاسو باندې درانۀ بوجونه اچولى دى، خو زۀ به دا نور هم درانۀ کړم. هغۀ تاسو په کوړو باندې وهلئ، خو زۀ به تاسو په لړمانو باندې سموم.“

¹²درې ورځې وروستو يربعام او ټول خلق رحُبعام بادشاه ته راواپس شول، لکه څنګه چې دې بادشاه ورته وئيلى وُو.

¹³بادشاه د مشرانو سړو مشوره رد کړه او خلقو ته يې سختې خبرې وکړې،

¹⁴هم هغه شان څنګه چې ځلمو ورته وئيلى وُو. هغۀ ووئيل، ”زما پلار په تاسو باندې درانۀ بوجونه اچولى وُو، خو زۀ به دا نور هم درانۀ کړم. هغۀ تاسو په کوړو باندې وهلئ، خو زۀ به تاسو په لړمانو باندې سموم!“

¹⁵نو بادشاه خلقو ته غوږ ونۀ نيولو، دا هر څۀ ځکه بدل شول چې دا مالِک خُدائ ته منظُوره وه چې هغه خبره پوره کړى چې مالِک خُدائ د سِله پېغمبر اخياه په ذريعه د نباط زوئ يربعام ته کړې وه.

¹⁶کله چې ټول بنى اِسرائيليان پوهه شول چې بادشاه هغوئ ته غوږ نۀ نيولو، نو هغوئ ووئيل، ”مونږ د داؤد بادشاهى نۀ منو، د يَسى په زوئ کښې زمونږ څۀ فائده ده. اے بنى اِسرائيلو! ځئ خپلو خېمو ته واپس لاړ شئ، د داؤد کورنۍ دې خپله بادشاهى سمبال کړى.“ او بنى اِسرائيليان خپلو خېمو ته لاړل.

¹⁷خو رحُبعام په هغه بنى اِسرائيلو باندې بادشاهى کوله کوم چې د يهوداه په علاقه کښې اوسېدل.

¹⁸بيا رحُبعام بادشاه ادونرام ولېږلو، کوم چې د هغه مزدورانو مشر وو چې په زور کار ترې نه اخستے شو، چې هغه بنى اِسرائيلو له لاړ شى، خو هغوئ هغه سنګسار کړو. رحُبعام په تېزۍ سره په خپله جنګى ګاډۍ کښې سور شو او يروشلم ته وتښتېدو.

¹⁹نو هم د هغه وخت نه د بنى اِسرائيلو د شمالى بادشاهۍ خلق د داؤد د شاهى کورنۍ خِلاف بغاوت کوى.

²⁰کله چې بنى اِسرائيليان خبر شول چې يربعام د مِصر نه راواپس شوے دے، نو هغه يې د خلقو يوې غونډې ته راوغوښتلو او د بنى اِسرائيلو بادشاه يې جوړ کړو. صِرف د يهوداه قبيلې خلقو د داؤد اولاد منلو.

²¹کله چې رحُبعام يروشلم ته ورسېدو، نو هغۀ د يهوداه او بنيامين قبيلې نه يو لاکھ اتيا زره ښۀ فوجيان راغونډ کړل. هغۀ دا اراده وکړه چې د جنګ دپاره لاړ شى چې د بنى اِسرائيلو شمالى قبيلې په خپل قابو کښې بيا راولى.

²²خو خُدائ پاک سمعياه پېغمبر ته ووئيل

²³چې هغه رحُبعام او د يهوداه او د بنيامين ټولو خلقو ته دا پېغام ورسوى،

²⁴”په خپلو وړُونو يعنې بنى اِسرائيلو باندې حمله مۀ کوئ. ټول کور ته لاړ شئ ځکه چې څۀ وشول نو هغه ما کړى دى.“ هغوئ ټولو د مالِک خُدائ حُکم ومنلو او واپس کورونو ته لاړل.

²⁵د بنى اِسرائيلو بادشاه يربعام د اِفرائيم غرونو په مُلک شِکم کښې د پَخو دېوالونو ښار جوړ کړو. بيا هغه لاړو او د فنواېل ښار دپاره يې پاخۀ دېوالونه جوړ کړل.

²⁶۲۶‏-۲۷ هغۀ د خپل ځان سره ووئيل، ”اوس خبره داسې ده، که زما خلق يروشلم ته لاړ شى او هلته د مالِک خُدائ په کور کښې نذرانې پېش کړى نو هغوئ به خپله وفادارى د يهوداه بادشاه رحُبعام ته بدله کړى او ما به ووژنى.“

²⁸د مشورې اخستلو نه پس، بادشاه دوه د سرو زرو سخى جوړ کړل او خپلو خلقو ته يې ووئيل، ”تاسو د ډېرې مودې نه د عِبادت دپاره يروشلم ته ځئ. اے بنى اِسرائيلو! ستاسو خُدايان دا دى چا چې د مِصر مُلک نه راوويستلئ.“

²⁹هغۀ د سرو زرو يو سخے په بيت‌اېل کښې او بل په دان کښې کېښودو.

³⁰نو داسې خلقو ګناه وکړه، ځکه چې هغوئ د عِبادت دپاره بېت اېل او دان ته لاړل.

³¹او يربعام د غرونو په سرونو باندې د عِبادت ځايُونه هم جوړ کړل او د هغه کورونو نه يې اِمامان خوښ کړل کومې چې د ليوى قبيلې نه نۀ وې.

³²يربعام د اتمې مياشتې په پينځلسمه ورځ په يهوداه کښې د اختر په شان يو مذهبى اختر هم مقرر کړو. د سرو زرو کوم سخى يې چې جوړ کړى وُو نو په بيت‌اېل کښې يې په قربان‌ګاه باندې هغې ته نذرانې پېش کړې او هغۀ هلته په بيت‌اېل کښې د عِبادت په هغه ځايُونو کښې د خِدمت دپاره اِمامان کښېنول کوم ځايُونه چې هغۀ جوړ کړى وُو.

³³او د اتمې مياشتې په پينځلسمه ورځ کومه ورځ چې هغۀ په خپله مقرره کړې وه، نو هغه بيت‌اېل ته لاړو او هغۀ چې د بنى اِسرائيلو دپاره کوم اختر مقرر کړے وو د هغې د مناوولو دپاره هغۀ په قربان‌ګاه باندې يوه نذرانه پېش کړه.