Read Pashto Bible (Yusufzai) — د پښتو مقدس کتاب اول پادشاهان 16 Bible Online

اول پادشاهان 16 - Pashto Bible (Yusufzai) — د پښتو مقدس کتاب bible

اول پادشاهان 16

¹بيا مالِک خُدائ د حنانى زوئ ياهُو پېغمبر سره کلام وکړو او د بعشا دپاره يې دا پېغام ورکړو،

²”ما د خاورو نه اُوچت کړې او د بنى اِسرائيلو مشر مې جوړ کړې. خو د يربعام په شان تا هم ګناه کړې ده او زما خلق دې د ګناه طرف ته بوتلى دى. د هغوئ ګناهونو زما غصه راپارولې ده،

³نو زۀ به تا او ستا کورنۍ تباه کړم، لکه څنګه چې ما يربعام او د هغۀ کورنۍ تباه کړې وه.

⁴ستا د کورنۍ هر يو کس چې په ښار کښې مړ شى نو سپى به يې وخورى او څوک هم چې په مېدان کښې مړۀ شى نو مارغان به يې وخورى.“

⁵بعشا چې نور هر څۀ هم کړى دى سره د هغۀ د بهادرۍ ټولو کارنامو هغه د بنى اِسرائيلو د بادشاهانو په تاريخ کښې ليکلے شوې دى.

⁶بعشا مړ شو او په تِرضاه کښې ښخ شو او د هغۀ زوئ ايله د هغۀ نه پس بادشاه شو.

⁷د مالِک خُدائ پېغام د بعشا او د هغۀ کورنۍ خِلاف د ياهُو پېغمبر په ذريعه ورکړے شوے وو ځکه چې بعشا د مالِک خُدائ په نظر کښې ګناهُونه کړى وُو. هغۀ د خپلو بدو عملونو په وجه د مالِک خُدائ غصه راوپاروله، ځکه چې هغۀ د يربعام ټوله کورنۍ وژلې وه، نو د هغۀ کورنۍ هم د يربعام په شان ظالِمه شوه.

⁸د يهوداه بادشاه آسا د بادشاهۍ په شپږ ويشتم کال، د بعشا زوئ ايله د بنى اِسرائيلو بادشاه شو او دوه کاله يې په تِرضاه باندې بادشاهى وکړه.

⁹د هغۀ يو آفسر زمرى چې د بادشاه د نيمو جنګى ګاډو مشر وو، د بادشاه خِلاف منصُوبه جوړه کړه. او ايله يوه ورځ په تِرضاه کښې د محل مشر ارضه په کور کښې د شرابو په نشه کښې وو.

¹⁰زمرى کور ته ورننوتلو، ايله يې ووژلو او د هغۀ په تخت کښېناستو. د يهوداه بادشاه آسا د بادشاهۍ په اوويشتم کال داسې وشول.

¹¹څنګه چې زمرے د هغۀ په تخت کښېناستو، نو هغۀ د بعشا د کورنۍ ټول کسان ووژل. د هغۀ ټول نران رِشته دار او نران دوستان يې ووژل.

¹²نو چې څنګه مالِک خُدائ د ياهُو پېغمبر په ذريعه د بعشا خِلاف وئيلى وُو، زمرى د بعشا ټوله کورنۍ ووژله.

¹³د خپلې ګناه او د بنى اِسرائيلو د ګناه طرف ته بوتلو په وجه، بعشا او د هغۀ زوئ ايله د مالِک خُدائ د بنى اِسرائيلو خُدائ پاک غصه راوپاروله.

¹⁴ايله چې نور هر څۀ هم کړى وُو نو هغه د بنى اِسرائيلو د بادشاهانو په تاريخ کښې ليکلے شوى دى.

¹⁵د يهوداه بادشاه آسا د بادشاهۍ په اوويشتم کال، زمرى په تِرضاه کښې اووۀ ورځې په بنى اِسرائيلو بادشاهى وکړه. بنى اِسرائيلى فوجيانو په فلستيه کښې د جبتون ښار محاصره کړے وو.

¹⁶او کله چې هغوئ خبر شو چې زمرى د بادشاه خِلاف منصُوبه جوړه کړې ده او بادشاه يې وژلے دے، نو هلته هغوئ ټولو دا اِعلان وکړو چې د هغوئ فوجى مشر عُمرى د بنى اِسرائيلو بادشاه دے.

¹⁷عُمرے او د هغۀ فوجيان د جبتون نه لاړل او تِرضاه يې محاصره کړو.

¹⁸کله چې زمرى وليدل چې ښار قبضه شوے دے، نو هغه د محل دنننۍ قلعې ته لاړو، په محل يې اور بل کړو او هغه د اور په لمبو کښې مړ شو.

¹⁹د مالِک خُدائ خِلاف د هغۀ د ګناهونو په وجه داسې وشول، لکه څنګه چې د هغۀ نه مخکښينى يربعام د خپلې ګناه په وجه مالِک خُدائ ناراضه کړے وو او بنى اِسرائيليان يې د ګناه طرف ته بوتلى وُو.

²⁰زمرى چې نور څۀ هم کړى وُو، سره د هغۀ د بغاوت د منصُوبې جوړولو، دا د بنى اِسرائيلو د بادشاهانو په تاريخ کښې ليکلے شوى دى.

²¹نو د دې نه پس بنى اِسرائيليان په دوو ډلو کښې تقسيم شول: نيمو کسانو وئيل چې د جينت زوئ تِبنى بادشاه جوړوُو او نيم د عُمرى په حق کښې وُو.

²²خو د عُمرى ډلې وګټله او د جينت زوئ تِبنى په ډله باندې بريالى شول. تِبنى ووژلے شو او عُمرى بادشاه شو.

²³نو د يهوداه د آسا بادشاه د بادشاهۍ په يو دېرشم کال، عُمرى د بنى اِسرائيلو بادشاه شو او دولس کاله يې بادشاهى وکړه، وړومبے شپږ کاله هغۀ په تِرضاه کښې بادشاهى وکړه،

²⁴او بيا هغۀ د سپينو زرو په شپږ زره سيکو باندې د سامريه غر د يو سړى نه واخستلو چې نوم يې سمر وو. عُمرى د غر نه پاخۀ دېوالونه تاو کړل، هلته يې يو ښار جوړ کړو او سامريه نوم يې پرې کېښودو، سمر د دې غر مخکښينے مالِک وو.

²⁵عُمرى د مالِک خُدائ په نظر کښې بد کارونه کول او د مالِک خُدائ خِلاف يې د مخکښينو بادشاهانو نه زياته ګناه وکړه.

²⁶د يربعام په شان، هغۀ هم د مالِک خُدائ د بنى اِسرائيلو خُدائ پاک غصه راوپاروله، دا د هغۀ د خپلې ګناه او د هغه ګناه په وجه وُو چې بنى اِسرائيليان يې د بُت پرستۍ طرف ته بوتلى وُو.

²⁷نور هر څۀ چې عُمرى کړى وُو او د هغۀ ټولې کاميابۍ د بنى اِسرائيلو بادشاهانو په تاريخ کښې ليکلے شوې دى.

²⁸عُمرى مړ شو او په سامريه کښې ښخ شو او د هغۀ زوئ اخى‌اب د هغۀ نه پس بادشاه جوړ شو.

²⁹د يهوداه بادشاه آسا د بادشاهۍ په اتۀ دېرشم کال، د عُمرى زوئ اخى‌اب د بنى اِسرائيلو بادشاه شو، هغۀ په سامريه کښې دوويشت کاله بادشاهى وکړه.

³⁰هغۀ د مخکښينو بادشاهانو د هر يو نه زيات د مالِک خُدائ خِلاف ګناه وکړه.

³¹هغۀ نۀ صرف د يربعام بادشاه ګناهُونه معمولى ګڼل بلکه هغۀ د صيدانى بادشاه اِتبعل لور ايزبل هم وادۀ کړه او د بعل عِبادت يې وکړو.

³²هغۀ په سامريه کښې د بعل دپاره د بعل په عِبادتخانه کښې يوه قربان‌ګاه جوړه کړه.

³³هغۀ د اشيرې بُت ولګولو. د بنى اِسرائيلو د ټولو مخکښينو بادشاهانو نه يې زيات د مالِک خُدائ د بنى اِسرائيلو خُدائ پاک غصه راوپاروله.

³⁴د هغۀ د بادشاهۍ په دوران کښې د بيت‌اېل، حى اېل د يريحو ښار بيا جوړ کړو. کله چې حى اېل د يريحو بُنياد کېښودو نو د هغۀ مشر زوئ ابيرام مړ شو او چې کله يې دروازې جوړې کړې نو د هغۀ کشر زوئ سجوب مړ شو. هم هغه شان لکه چې مالِک خُدائ د نون زوئ يشوَع په ذريعه د دې پېشګوئې کړې وه.