Read Pashto Bible (Yusufzai) — د پښتو مقدس کتاب اول پادشاهان 3 Bible Online

اول پادشاهان 3 - Pashto Bible (Yusufzai) — د پښتو مقدس کتاب bible

اول پادشاهان 3

¹سليمان د مِصر بادشاه فِرعون سره اِتحاد وکړو او د هغۀ لور يې وادۀ کړه. هغه يې د داؤد ښار ته راوستله او تر هغې پورې هلته اوسېدله چې تر څو پورې هغۀ خپل محل، د مالِک خُدائ کور او د يروشلم ګېرچاپېره دېوال جوړول ختم کړى نۀ وُو.

²د مالِک خُدائ کور تر اوسه پورې نۀ وو جوړ شوې، نو ځکه خلقو د قربانۍ په بېلو بېلو ځايُونو کښې قربانۍ پېش کولے.

³سليمان د مالِک خُدائ سره مينه کوله او د خپل پلار داؤد په خبرو يې عمل کولو، خو هغۀ هم د غېرو قومونو په قربان‌ګاه باندې خوشبويۍ سوزولې او قربانۍ يې پېش کولې.

⁴يوه ورځ هغه د قربانۍ پېش کولو دپاره جبعون ته لاړو چرته چې د قربانۍ مرکزى ځائ وو. هغۀ هلته يو زر سوزېدونکې نذرانې پېش کړې.

⁵په هغه شپه مالِک خُدائ هغۀ ته په خوب کښې څرګند شو او تپوس يې ترې نه وکړو، ”تۀ څۀ غواړې چې زۀ يې درکړم؟“

⁶سليمان ورته ووئيل، ”تا زما پلار خپل خِدمت کوُونکى داؤد ته همېشه ډېره مينه ښودلې ده او هغه په خپل تعلق کښې تا سره نېک، وفادار او صادق وو. تۀ هغۀ ته خپله لويه او نۀ بدلېدونکې مينه تر اوسه پورې ښايې چې هغۀ له دې يو زوئ ورکړو کوم چې د هغۀ په ځائ نن په تخت ناست دے.

⁷مالِکه خُدايه، زما خُدائ پاکه! تا زۀ د خپل پلار نه پس بادشاه جوړ کړے يم، اګر چې زۀ د يو وړُوکى ماشوم په شان يم او په هيڅ هم نۀ پوهېږم.

⁸زۀ دلته د هغه خلقو په مينځ کښې يم چې تا د خپل ځان دپاره غوره کړى دى. هغه قوم دومره لوئ دے چې د شمېر نه بهر دے.

⁹نو ما له حِکمت راکړه چې ستا په خلقو باندې په اِنصاف سره بادشاهى وکړم او د ښۀ او بد په مينځ کښې فرق وپېژنم. ګنى زۀ به څنګه د دې جوګه شم چې ستا په لوئ قوم باندې بادشاهى وکړم؟“

¹⁰مالِک خُدائ د سليمان په دې غوښتنه باندې خوشحاله شو،

¹¹نو هغۀ ورته ووئيل، ”تا حِکمت غوښتلے دے چې په اِنصاف سره بادشاهى وکړې او خپل اُوږد عُمر، مالدارى او د خپل دشمن مرګ دې نۀ دے غوښتے،

¹²نو زۀ به هغه څۀ وکړم چې تا غوښتى دى. زۀ به تا له دومره ډېر حِکمت او پوهه درکړم چې نۀ به چا ته مخکښې مِلاو شوې وى او نۀ به تا نه وروستو چا ته مِلاو شى.

¹³زۀ به تا له هغه څۀ هم درکړم چې تا نۀ دى غوښتى: تر څو پورې چې تۀ ژوندې يې نو تۀ به دولت مند او عزتمند يې، نو داسې تۀ به د ټولو بادشاهانو نه لوئ بادشاه يې.

¹⁴او که تۀ د خپل پلار داؤد په شان زما تابعدارى کوې او زما قانون او حُکمونه پوره کوې، نو زۀ به تا له يو اُوږد عُمر درکړم.“

¹⁵سليمان راويښ شو او پته ورته ولګېده چې خُدائ پاک ورسره په خوب کښې خبرې وکړې. بيا هغه يروشلم ته لاړو او د مالِک خُدائ د لوظ صندوق په مخکښې ودرېدو او مالِک خُدائ ته يې سوزېدونکې نذرانې او د سلامتۍ نذرانې پېش کړې. او د خپلو درباريانو دپاره يې يوه لويه مېلمستيا وکړه.

¹⁶يوه ورځ دوه کنجرې ښځې راغلې او سليمان بادشاه په مخکښې يې خپل ځانونه پېش کړل.

¹⁷هغې يوې په کښې ووئيل، ”بادشاه سلامت! دا ښځه او زۀ په يو کور کښې اوسېږُو او چې دا کله هلته وه نو زما يو ماشوم پېدا شو.

¹⁸زما د زوئ د پېدا کېدو په دريمه ورځه د هغې هم يو ماشوم پېدا شو. په هغه کور کښې صِرف زۀ او هغه وُو او بل هيڅ څوک هم موجود نۀ وُو.

¹⁹نو يوه شپه هغه په غلطۍ سره په خپل ماشوم ورواوړېده او د هغۀ ساه يې بنده کړه.

²⁰هغه د شپې پاڅېده، چې کله زۀ اودۀ وم نو هغې زما نه ماشوم واخستلو او په خپل څنګ کښې يې واچولو، بيا هغې هغه مړ ماشوم زما په کټ کښې کېښودو.

²¹په ورپسې سحر کله چې زۀ پاڅېدم او خپل ماشوم له مې تے ورکولو، نو ومې ليدل چې دا خو مړ دے. ما په رڼا کښې ښۀ په غور سره ورته وکتل او پته راته ولګېده چې دا خو زما ماشوم نۀ دے.“

²²خو هغه بلې ښځې ووئيل، ”نه! ژوندې ماشوم زما دے او دا مړ ماشوم ستا دے!“ نو هغه وړومبۍ ښځې جواب ورکړو، ”نه! مړ ماشوم ستا دے او ژوندې ماشوم زما دے!“ نو داسې هغوئ د بادشاه په وړاندې بحث شروع کړو.

²³نو سليمان بادشاه ووئيل، ”تاسو دواړه دا دعوه کوئ چې ژوندې ماشوم زما دے او مړ ماشوم زما نۀ دے.“

²⁴نو هغۀ ووئيل چې تُوره راوړه او چې کله تُوره راوړے شوه،

²⁵نو هغۀ ووئيل، ”دا ژوندې ماشوم دوه ټوټې کړه او هرې يوې له نيم نيم ورکړه.“

²⁶د کومې مور چې زوئ ژوندے وو او زړۀ يې د زوئ د مينې نه ډک وو، نو هغې بادشاه ته ووئيل، ”بادشاه سلامت! دا ماشوم مۀ وژنه او هغې له يې ورکړه!“ خو هغې بلې ښځې ووئيل، ”دا ماشوم مونږ يوې له هم مۀ راکوه او دوه ټوټې يې کړه.“

²⁷سليمان ووئيل، ”ماشوم مۀ وژنه! او هغه ښځې له يې ورکړه چې کومه وائى چې مۀ يې وژنه. هغه يې اصلى مور ده.“

²⁸کله چې ټول بنى اِسرائيليان د سليمان د فېصلې نه خبر شول، نو د هغۀ رُعب ورباندې پرېوتو، ځکه چې هغوئ ته نوره پته ولګېده چې خُدائ پاک هغۀ له حِکمت ورکړے دے چې په اِنصاف سره لانجې هوارې کړى.