Read Pashto Bible (Yusufzai) — د پښتو مقدس کتاب اول پادشاهان 9 Bible Online

اول پادشاهان 9 - Pashto Bible (Yusufzai) — د پښتو مقدس کتاب bible

اول پادشاهان 9

¹کله چې سليمان بادشاه د مالِک خُدائ کور، خپل محل او د هغه هر څۀ جوړول ختم کړل چې څۀ يې جوړول غوښتل،

²نو مالِک خُدائ په دويم ځل هغۀ ته راڅرګند شو، لکه څنګه چې هغه په جبعون کښې څرګند شوے وو.

³مالِک خُدائ هغۀ ته ووئيل، ”ما ستا دعا اورېدلې ده، کومه چې تا زما په وړاندې کړې ده. کوم کور چې تا جوړ کړے دے هغه زۀ مقدس کوم او هغه به داسې ځائ وى چې همېشه به هلته زما عِبادت کېږى. زما به په دې نظر وى او همېشه به زړۀ کښې اوسى.

⁴او که تا په صداقت او د زړۀ د اخلاصه زما خِدمت کولو لکه چې ستا پلار داؤد کولو او تا زما قانون او هغه هر څۀ منل چې ما يې حُکم درکړے دے،

⁵نو زۀ به خپله هغه وعده پوره کړم چې ما ستا پلار داؤد سره کړې وه چې ما هغۀ ته ووئيل چې ستا د اولاد نه به همېشه يو کس د بنى اِسرائيل په تخت ناست وى.

⁶خو که تا يا ستا اولاد زما تابعدارى پرېښوده، چې ما کوم قانون او حُکمونه درکړى دى، د هغې نافرمانى مو وکړه او د نورو خُدايانو عِبادت مو وکړو،

⁷نو زۀ به خپل خلق بنى اِسرائيليان د هغه مُلک نه لرې کړم کوم چې ما ورکړے دے. او زۀ به دا کور هم پرېږدم چې ما د خپل عِبادت دپاره مقدس کړے دے. ټول قومونه به د بنى اِسرائيلو په مُلک پورې خندا کوى او سپک به ورته ګورى.

⁸دا کور به د کنډر يو ډېرے شى او چې هر څوک هم ورباندې تېرېږى نو وبه لړزېږى او حېران به شى. هغوئ به تپوس کوى چې مالِک خُدائ په دې مُلک او کور باندې داسې ولې کړى دى.

⁹نو خلق به وائى چې هغوئ مالِک خُدائ پرېښے وو، چا چې د هغوئ پلار نيکۀ د مِصر نه راوويستل. هغوئ نور خُدايان راټينګ کړل او د هغوئ عِبادت او خِدمت يې وکړو. نو دا ځکه مالِک خُدائ ورباندې دا تباهى راوستلې ده.“

¹⁰د سليمان د مالِک خُدائ په کور او خپل محل باندې شل کاله ولګېدل.

¹¹د صور بادشاه حيرام هغۀ له دِيار او د نختر لرګو او د هغه ټولو سرو زرو بندوبست وکړو چې هغۀ د دې کار دپاره غوښتى وُو. کله چې دا کار ختم شو، نو سليمان بادشاه حيرام له د ګليل په علاقه کښې شل ښارونه ورکړل.

¹²حيرام د هغه ښارونو ليدو له لاړو کوم چې سليمان ورکړى وُو، خو د هغۀ خوښ نۀ شول.

¹³نو هغۀ سليمان ته ووئيل، ”زما وروره! دا څۀ رنګه ښارونه دى چې تا ما له راکړى دى؟“ نو په دې وجه تر اوسه پورې د هغه ځائ نوم کبول دے.

¹⁴حيرام سليمان له د څلورو زرو کيلو نه زيات سرۀ زر لېږلى وُو.

¹⁵سليمان بادشاه په مزدورانو باندې د مالِک خُدائ کور، محل، په غرۀ باندې پټى او د يروشلم دېوال جوړ کړو. په هغوئ يې د حصور، مجدو او جزر ښارونه هم بيا جوړ کړل.

¹⁶د مِصر بادشاه په جزر حمله کړې وه او دا يې قبضه کړې وو، د هغې اوسېدونکى يې ووژل او په ښار يې اور بل کړو. بيا هغۀ دا خپلې لور له د وادۀ په جهېز کښې په هغه وخت ورکړو چې سليمان ودوله،

¹⁷سليمان د جزر ښار او لاندينې بيت‌حورون هم بيا جوړ کړو،

¹⁸ورسره بعلات، د يهوداه په صحرا کښې تامار،

¹⁹د ګودامونه والا ښارونه، د هغۀ د اسونو او جنګى ګاډو دپاره ښارونه او چې په يروشلم، لبنان او خپله ټوله بادشاهۍ کښې يې څۀ هم جوړول غوښتل نو هغه يې جوړ کړل.

²⁰۲۰‏-۲۱ سليمان د کنعان خلقو د اولاد نه مزدوران جوړ کړل، کوم چې بنى اِسرائيلو د مُلک قبضه کولو په وخت نۀ وُو وژلى. په دې کښې اموريان، حِتيان، فارصيان، حِويان او يبوسيان وُو، چې د هغوئ اولاد تر اوسه پورې غلامان دى.

²²سليمان د بنى اِسرائيلو نه غلامان جوړ نۀ کړل، هغوئ د فوجيانو، مشرانو، فوجى آفسرانو، د ګاډو مشرانو او د اسونو والا په توګه خِدمت کولو.

²³په هغه مزدورانو باندې پينځۀ سوه او پنځوس آفسران مقرر کړے شوې وُو چې کومو مزدورانو د سليمان په منصُوبو باندې کار کولو.

²⁴سليمان په غرۀ باندې پټى د هغې نه پس جوړ کړل چې د هغۀ ښځه د مِصر د بادشاه لور، د داؤد د ښار نه هغه محل ته تلې وه چې د هغې دپاره يې جوړ کړے وو.

²⁵سليمان به په کال کښې درې ځل سوزېدونکې نذرانې او د سلامتۍ نذرانې په هغه قربان‌ګاه پېش کولې چې کومه يې مالِک خُدائ ته جوړه کړې وه. هغۀ مالِک خُدائ ته خوشبوئى هم سوزوله. او داسې هغۀ د مالِک خُدائ کور جوړول پوره کړل.

²⁶سليمان بادشاه په عصيون جابر کښې ډېر سمندرى جهازُونه هم جوړ کړل، عصيون جابر د ادوم په علاقه کښې د بحرِقُلزم په غاړه دے او ايلوت ته نزدې دے.

²⁷حيرام بادشاه يو څو تکړه جهاز چلوُونکى ورولېږل چې د سليمان د سړو مدد وکړى.

²⁸هغوئ د اوفير مُلک ته سفر وکړو او د هغه ځائ نه يې څوارلسو زرو کيلو نه زيات سرۀ زر سليمان له راوړل.