Read Pashto Bible (Yusufzai) — د پښتو مقدس کتاب بادشاهانو دويم 14 Bible Online

بادشاهانو دويم 14 - Pashto Bible (Yusufzai) — د پښتو مقدس کتاب bible

بادشاهانو دويم 14

¹د بنى اِسرائيلو بادشاه د يهوآخز زوئ يهوآس د بادشاهۍ په دويم کال، د يوآس زوئ امصياه د يهوداه بادشاه شو

²چې عُمر يې پينځۀ‌ويشت کاله وو او هغۀ په يروشلم کښې نهۀ‌ويشت کاله بادشاهى وکړه. د هغۀ مور يهوعدان د يروشلم وه.

³هغۀ هم هغه کار کولو چې مالِک خُدائ پرې رضا کېدو، خو د خپل پلار نيکۀ داؤد په شان نۀ وو، او هغه کارونه يې کول چې څۀ د هغۀ پلار يوآس کړى وُو.

⁴هغۀ د غېرو قومونو د عِبادت ځايُونه راونۀ غورزول او خلقو هلته قربانۍ او سوزېدونکې خوشبوئى سوزوله.

⁵څنګه چې امصياه ته بادشاهۍ ټول اِختيار مِلاو شو، نو هغۀ هغه آفسران قتل کړل چې د هغۀ پلار يعنې بادشاه يې وژلے وو.

⁶خو هغۀ د هغوئ بچى ونۀ وژل او په هغه څۀ يې عمل وکړو چې مالِک خُدائ د موسىٰ په شريعت کښې وئيلى وُو، ”مور او پلار دې د بچو د جرمونو په وجه نۀ شى وژلے او د مور پلار د جرمونو په وجه دې د هغوئ بچى نۀ شى وژلے، يو کس دې صِرف د خپل جرم په وجه ووژلے شى.“

⁷امصياه لس زره ادومى فوجيان د مالګې په مېدان کښې ووژل، هغۀ په يو جنګ کښې د شيلو ښار قبضه کړو او په دې باندې يې يقتى اېل نوم کېښودو چې تر اوسه پورې يې هم دا نوم دے.

⁸بيا امصياه د بنى اِسرائيلو بادشاه يهوآس له پېغام وړُونکى ولېږل او ورته يې ووئيل چې جنګ ته راوړاندې شه.

⁹خو يهوآس واپس دا جواب ورولېږلو، ”يو ځل د لبنان په غرونو کښې د ازغو بوټى د دِيار ونې له دا پېغام ولېږلو چې، زما زوئ له ستا لور ورکړه چې وادۀ يې کړى. يو ځنګلى ځناور هلته تېرېدو او د ازغو په بوټى يې پښې کېښودې.

¹⁰نو امصياه، تا ادوميانو له شکست ورکړے دے او مغروره شوے يې. خو په خپل شهرت باندې ګزاره کوه او په کور کښې کښېنه. داسې بلا ولې راخبروې چې په تا او ستا په خلقو باندې تباهى راولى؟“

¹¹خو امصياه به ورته غوږ نۀ نيولو، نو يهوآس بادشاه د خپلو سړو سره روان شو او په يهوداه کښې يې د بيت شمس سره د هغۀ خِلاف جنګ وکړو.

¹²د امصياه لښکر شکست وخوړو او د هغۀ ټول فوجيان خپلو کورونو ته وتښتېدل.

¹³يهوآس امصياه ونيولو، يروشلم ته وړاندې لاړو او د اِفرائيم د دروازې نه واخله د ګوټ دروازې پورې دېوال يې راغورزولو چې تقريباً دوه سوه او شل ګزه فاصله وو.

¹⁴هغۀ سپين زر، سرۀ زر او د مالِک خُدائ د کور ټول سامان او د محل ټولې خزانې يې واخستلې او واپس يې سامريه ته يوړې. هغۀ د ځان سره قېديان هم بوتلل.

¹⁵نور هر څۀ چې يهوآس کړى وُو سره د يهوداه بادشاه د امصياه خِلاف په جنګ کښې د هغۀ بهادرى، دا د بنى اِسرائيلو بادشاهانو په تاريخ کښې ليکلے شوى دى.

¹⁶يهوآس مړ شو او په سامريه کښې په شاهى اديره کښې ښخ شو او د هغۀ زوئ يربعام د هغۀ نه پس بادشاه جوړ شو.

¹⁷د يهوداه بادشاه امصياه د بنى اِسرائيلو بادشاه يهوآس د مرګ نه پس پينځلس کاله ژوندے وو.

¹⁸امصياه چې نور هر څۀ هم کړى وُو هغه د يهوداه د بادشاهانو په تاريخ کښې ليکلے شوى دى.

¹⁹په يروشلم کښې د امصياه د وژلو منصُوبه جوړه شوه، نو هغه د لکيس ښار ته وتښتېدو، خو دشمنان ورپسې وُو او هغه يې هلته ووژلو.

²⁰د هغۀ لاش واپس يروشلم ته په يو اس باندې راوړلے شو او د خپل پلار نيکۀ سره د داؤد په ښار کښې ښخ کړے شو.

²¹بيا د يهوداه خلقو د هغۀ د شپاړسو کالو زوئ عُزياه له د بادشاهۍ تاج ورپه سر کړو.

²²عُزياه د خپل پلار د مرګ نه پس ايلات بيا فتح کړو او دوباره يې جوړ کړو.

²³د يهوداه بادشاه د يوآس زوئ امصياه د بادشاهۍ په پينځلسم کال د يهوآس زوئ يربعام د بنى اِسرائيلو بادشاه شو او په سامريه باندې يې يو څلوېښت کاله بادشاهى وکړه.

²⁴هغۀ د مالِک خُدائ خِلاف ګناه وکړه او د خپل پلار نيکۀ د نباط زوئ يربعام په بدو لارو باندې روان وو چا چې بنى اِسرائيليان د ګناه طرف ته بوتلى وُو.

²⁵هغۀ هغه ټوله علاقه فتح کړه کومه چې مخکښې د بنى اِسرائيلو وه چې په شمال کښې د حمات درې نه واخله په جنوب کښې د مړ درياب پورې وه. مالِک خُدائ د بنى اِسرائيلو خُدائ پاک د خپل خِدمت کوُونکى د امتى زوئ يُونس په ذريعه د هغې وعده کړې وه، څوک چې د جات حِفر وو.

²⁶مالِک خُدائ د بنى اِسرائيلو سخت تکليف وليدو، او داسې هيڅ څوک هم نۀ وُو چې د هغوئ مدد يې کړے وے.

²⁷خو د مالِک خُدائ مقصد دا نۀ وو چې د بنى اِسرائيلو نوم‌ او‌ نشان ختم کړى، نو هغوئ يې د دويم يربعام په ذريعه بچ کړل.

²⁸نور هر څۀ چې دويم يربعام کړى وُو، د هغۀ د بهادرۍ جنګونه او چې هغۀ دمشق او حمات څنګه بنى اِسرائيلو له واپس ورکړے وو، دا هر څۀ د بنى اِسرائيلو د بادشاهانو په تاريخ کښې ليکلے شوى دى.

²⁹يربعام مړ شو او په شاهى اديره کښې ښخ شو او د هغۀ زوئ زکرياه د هغۀ نه پس بادشاه جوړ شو.