Read Pashto Bible (Yusufzai) — د پښتو مقدس کتاب بادشاهانو دويم 2 Bible Online

بادشاهانو دويم 2 - Pashto Bible (Yusufzai) — د پښتو مقدس کتاب bible

بادشاهانو دويم 2

¹هغه وخت راغلو چې مالِک خُدائ الياس په يو زورور باد کښې بره آسمان ته وخېژوى. الياس او اليشع د جِلجال نه روان شول،

²او په لار کښې الياس اليشع ته ووئيل، ”اوس دلته پاتې شه، مالِک خُدائ ما له حُکم راکړے دے چې بيت‌اېل ته لاړ شم.“ خو اليشع ورته ووئيل، ”زۀ د ژوندى مالِک خُدائ او تا سره په خپله وفادارۍ قسم کوم چې زۀ به تا نه لاړ نۀ شم.“ نو هغوئ بيت‌اېل ته روان وُو.

³د پېغمبرانو يوه ډله د بيت‌اېل نه راووتله، اليشع له لاړه او د هغۀ نه يې تپوس وکړو، ”تا ته پته ده څۀ چې مالِک خُدائ نن ستا نه نېک بوځى؟“ اليشع ورته ووئيل، ”او، ما ته پته ده، خو دا خبره مۀ کوئ.“

⁴بيا الياس اليشع ته ووئيل، ”اوس تۀ دلته پاتې شه، مالِک خُدائ ما له حُکم راکړے دے چې يريحو ته لاړ شم.“ خو اليشع ورته ووئيل، ”زۀ د ژوندى مالِک خُدائ سره او تا سره په خپله وفادارۍ قسم کوم چې زۀ به ستا نه لاړ نۀ شم.“ نو هغوئ يريحو ته لاړل.

⁵د پېغمبرانو يوه ډله چې هلته اوسېده اليشع له لاړه او د هغۀ نه يې تپوس وکړو، ”تا ته پته ده څۀ چې مالِک خُدائ نن ستا نه ستا نېک بوځى؟“ اليشع ورته ووئيل، ”او، ما ته پته ده، خو ښۀ به دا وى چې تاسو ونۀ وايئ.“

⁶نو الياس اليشع ته ووئيل، ”دلته پاتې شه، مالِک خُدائ ما له حُکم راکړے دے چې د اُردن سيند نه پورې لاړ شم.“ خو اليشع ورته ووئيل، ”زۀ د ژوندى مالِک خُدائ او ستا په سر قسم خورم چې زۀ به تا نه لاړ نۀ شم.“ نو هغوئ دواړه روان شول،

⁷او په اُردن کښې پنځوس پېغمبران ورپسې لاړل. الياس او اليشع د سيند سره ودرېدل او هغه پنځوس پېغمبران ترې نه لږ لرې ودرېدل.

⁸بيا الياس خپله چُوغه وويستله، راغونډه يې کړه او سيند يې ورباندې ووهلو، اوبۀ په دوه حصو کښې تقسيم شوې او هغه او اليشع په اوچه زمکه باندې د سيند نه پورې وتل.

⁹هلته الياس اليشع ته ووئيل، ”د هغې نه مخکښې چې زۀ ستا نه بوتلے شم ما ته ووايه چې زۀ ستا دپاره څۀ وکړم.“ اليشع ورته ووئيل، ”ما له دې ستا د روح يو په دوه برخه راکړې شى.“

¹⁰الياس ورته ووئيل، ”تا يو مشکل څيز غوښتے دے، خو چې کله زۀ ستا نه جدا کړے شم او تۀ مې په ختلو ووينې نو دا به تا ته مِلاو شى، خو که تۀ مې ونۀ وينې، نو دا به تا ته نۀ ملاوېږى.“

¹¹کله چې هغوئ روان وُو او خبرې يې کولې، نو ناڅاپه يوه د اور جنګى ګاډۍ چې د اور اسونو راښکله د هغوئ مينځ ته راغله او يو زورور باد الياس بره آسمان ته وخېژولو.

¹²اليشع دا وليدل او الياس ته يې چغه کړه، ”زما پلاره، زما پلاره! ګوره، د بنى اِسرائيلو جنګى ګاډو او په دې سوارو کسانو زما نېک يوړو!“ او چې څنګه هغه د نظر نه پناه شو، نو اليشع د غم نه خپلې جامې وشلولې.

¹³بيا هغۀ د الياس هغه چُوغه راواخستله چې کومه د الياس نه غورزېدلې وه او واپس لاړو او د اُردن په غاړه باندې ودرېدو.

¹⁴هغۀ د الياس په چُوغه باندې اوبۀ ووهلې او وې وئيل، ”مالِک خُدائ، د الياس خُدائ پاک چرته دے؟“ نو هغۀ اوبۀ بيا ووهلې او اوبۀ تقسيم شوې او هغه بل خوا پورې وتو.

¹⁵د يريحو پنځوسو پېغمبرانو هغه وليدو او ورته يې ووئيل، ”د الياس روح د اليشع سره دے!“ هغوئ د هغۀ سره مِلاوېدو له لاړل، د هغۀ په مخکښې زمکې ته د عزت نه ټيټ شول

¹⁶او ورته يې ووئيل، ”دلته مونږ پنځوس سړى يُو چې ټول تکړه يُو. راځئ چې لاړ شو او ستا نېک ولټوُو. کېدے شى چې د مالِک خُدائ روح هغه وړے وى او چرته په غر يا وادۍ کښې يې پرېښے وى.“ اليشع ورته ووئيل، ”تاسو به نۀ ځئ.“

¹⁷خو هغوئ بيا بيا ووئيل نو هغۀ پرېښودل چې لاړ شى. هغه پنځوسو کسانو درې ورځې لټُون وکړو خو هغه يې ونۀ موندلو.

¹⁸کله چې هغوئ راواپس شول نو اليشع تر اوسه پورې په يريحو کښې وو. اليشع ترې نه تپوس و کړو، ”ما تاسو ته وئيلى نۀ وُو څۀ چې مۀ ځئ؟“

¹⁹د يريحو څۀ سړى اليشع له لاړل او ورته يې ووئيل، ”صاحِبه! تا ته پته ده چې دا يو ښۀ ښار دے، خو اوبۀ يې ښې نۀ دى او زمکه يې شاړه ده.“

²⁰نو هغۀ حُکم وکړو چې، ”په يو نوى لوښى کښې لږه مالګه واچوئ او ما له يې راوړئ.“ نو هغوئ ورله مالګه راوړه،

²¹او هغه يوې چينې ته لاړو او مالګه يې په اوبو کښې واچوله او وې وئيل، ”مالِک خُدائ داسې وائى: زۀ دا اوبۀ صفا کوم، نو نور څوک به نۀ مرى او زمکه به شاړه نۀ وى.“

²²او هغه اوبۀ تر اوسه پورې صفا دى، لکه څنګه چې اليشع وئيلى وُو چې داسې به وى.

²³اليشع د يريحو نه روان شو چې بيت‌اېل ته لاړ شى او په لار کښې څۀ هلکان د ښار نه راووتل او په هغۀ پورې يې ټوقې کولې. هغوئ چغې وهلې، ”د دې ځائ نه لاړ شه ګنجيه!“

²⁴اليشع راوګرځېدو، هلکانو ته يې وکتل او د مالِک خُدائ په نوم يې په هغوئ لعنت ووئيلو. نو د ځنګل نه دوه ميلوګانې راووتلې او دوه څلوېښت هلکان يې ټوټې ټوټې کړل.

²⁵اليشع د کرمل غر ته روان وو او وروستو سامريه ته راواپس شو.