Read Pashto Bible (Yusufzai) — د پښتو مقدس کتاب بادشاهانو دويم 24 Bible Online

بادشاهانو دويم 24 - Pashto Bible (Yusufzai) — د پښتو مقدس کتاب bible

بادشاهانو دويم 24

¹کله چې يهويقيم بادشاه وو، نو د بابل بادشاه نبوکدنضر په يهوداه حمله وکړه او درې کاله يې په يهويقيم باندې زور راوړلو چې د هغۀ حکومت ته تسليم شى، بيا يهويقيم بغاوت وکړو.

²نو مالِک خُدائ د يهوقيم خِلاف د يهوداه د تباه کولو دپاره، د بابل، اسور، موآب او عمون لښکرې ولېږلې، لکه څنګه چې مالِک خُدائ د خپلو خِدمت کوُونکو پېغمبرانو په ذريعه وئيلى وُو چې هغه به داسې کوى.

³د مالِک خُدائ په حُکم باندې داسې ځکه وشول چې د يهوداه خلق د خپل حضُور نه لرې کړى دا د هغه ټولو ګناهُونه په وجه چې منسى بادشاه کړى وُو،

⁴د هغه بې ګناه خلقو د وينې په وجه چې هغۀ توئ کړې وه. نو مالِک خُدائ ځکه منسى نۀ شو معاف کولے.

⁵نور هر څۀ چې يهويقيم کړى دى هغه د يهوداه د بادشاهانو په تاريخ کښې ليکلے شوى دى.

⁶يهويقيم مړ شو او د هغۀ زوئ يهوياکين د هغۀ نه پس بادشاه جوړ شو.

⁷د مِصر بادشاه او د هغۀ لښکر بيا هيڅ کله هم د مِصر نه لانۀ ړل، ځکه چې اوس د بابل بادشاه د مِصر ټوله علاقه قبضه کړې وه، دا د فرات سيند نه واخله د مِصر شمالى سرحد پورې وه.

⁸يهوياکين د اتلسو کالو وو چې هغه د يهوداه بادشاه شو او هغۀ په يروشلم باندې درې مياشتې بادشاهى وکړه. د هغۀ مور نحشتا وه چې د يروشلم د الناتن لور وه.

⁹يهوياکين د مالِک خُدائ په نظر کښې بد عمل کولو هم هغه شان لکه څنګه عمل چې د هغۀ پلار کړے وو.

¹⁰د هغۀ په دور کښې د بابل فوج د يروشلم خِلاف روان شو چې مشرى يې د نبوکدنضر بادشاه آفسرانو کوله او يروشلم يې محاصره کړو.

¹¹د محاصرې په دوران کښې نبوکدنضر په خپله يروشلم ته راغلو،

¹²او يهوياکين بادشاه، سره د خپلې مور، زامنو، آفسرانو او سره د محل د آفسرانو بابليانو ته تسليم شو. د نبوکدنضر د بادشاهۍ په اتم کال هغۀ يهوياکين قېدى کړو

¹³او د محل او د مالِک خُدائ د کور ټولې خزانې يې بابل ته يوړې. لکه څنګه چې مالِک خُدائ پېشګوئې کړې وه، نبوکدنضر د سرو زرو هغه ټول سامان مات کړو کوم چې سليمان بادشاه د مالِک خُدائ د کور دپاره جوړ کړے وو.

¹⁴نبوکدنضر د يروشلم خلق، ټول شهزادګان او ټول مشران سړى قېديان بوتلل چې دا ټول په شمېر کښې لس زره وُو. هغۀ سره د لوهارانو، ټول ماهِر کاريګران وويستل او په يهوداه کښې يې صِرف مسکينان خلق پرېښودل.

¹⁵نبوکدنضر، يهوياکين د يهوياکين مور، د هغۀ ښځې، د هغۀ آفسران او د يهوداه د مشران بابل ته قېديان بوتلل.

¹⁶د بابل بادشاه نبوکدنضر ټول فوجيان هم وويستل چې په شمېر کښې اووۀ زرۀ وُو، چې په جنګ کښې ښۀ تکړه وُو او ورسره يو زر ماهِر کاريګران او لوهاران هم وُو.

¹⁷نبوکدنضر د يهوياکين ترۀ متان د هغۀ په ځائ د يهوداه بادشاه جوړ کړو او د متان نوم يې صدقياه ته بدل کړو.

¹⁸صدقياه د يويشتو کالو وو چې هغه د يهوداه بادشاه جوړ شو او هغۀ په يروشلم باندې يولس کاله بادشاهى وکړه. د هغۀ مور حموطل وه، چې د لِبناه د ښار د يرمياه لور وه.

¹⁹صدقياه بادشاه د مالِک خُدائ خِلاف ګناه وکړه بلکل هم هغسې لکه چې يهويقيم بادشاه کړې وه.

²⁰نو مالِک خُدائ د يروشلم او د يهوداه خلقو ته غصه شو او په آخر کښې يې هغوئ د خپل حضُور نه لرې کړل. صدقياه د بابل بادشاه خِلاف بغاوت وکړو.