Read Pashto Bible (Yusufzai) — د پښتو مقدس کتاب بادشاهانو دويم 8 Bible Online

بادشاهانو دويم 8 - Pashto Bible (Yusufzai) — د پښتو مقدس کتاب bible

بادشاهانو دويم 8

¹نو اليشع هغه ښځې له مشوره ورکړه چې د هغې زوئ يې راژوندې کړے وو او ورته يې ووئيل چې، ”تۀ او ستا کورنۍ لاړ شئ او په بل ځائ کښې اوسېږئ، ځکه چې مالِک خُدائ وئيلى دى چې په دې مُلک کښې به اووۀ کاله قحط وى.“

²نو هغې ښځې هم هغه شان وکړل چې څنګه د خُدائ پاک خِدمتګار مشوره ورکړې وه. هغې خپله کورنۍ بوتله او اووۀ کاله د فلستيه په مُلک کښې اوسېده.

³د اوؤم کال په ختمېدو، هغه واپس بنى اِسرائيلو ته راغله او بادشاه له لاړه چې مِنت ورته وکړى چې خپله زمکه او کور ورته واپس مِلاو شى.

⁴هغې وليدل چې بادشاه د اليشع نوکر جيحازى سره خبرې کولې، بادشاه غوښتل چې د اليشع په لويو معجزو باندې پوهه شى.

⁵کله چې جيحازى بادشاه ته وئيل چې اليشع يو مړے راژوندې کړے وو، نو هغه ښځې بادشاه ته عرض وکړو. جيحازى هغۀ ته ووئيل، ”بادشاه سلامت! هغه ښځه دا ده او دا يې زوئ دے چې اليشع راژوندې کړے وو.“

⁶بادشاه ښځې ته ووئيل چې خپله قيصه بيان کړه، چې څۀ شوى وُو نو هغې ورته بيان کړل، بادشاه يو آفسر راوغوښتو او ورته يې ووئيل چې، ”هغې له خپل هر څۀ واپس ورکړه، سره د هغې د زمکې د اووۀ کالو آمدن.“

⁷اليشع په هغه وخت دمشق ته لاړو چې د شام بادشاه بِن‌حدد بيمار وو. نو چې بادشاه خبر شو چې اليشع هلته دے،

⁸نو هغۀ خپل يو آفسر حِزائيل ته ووئيل، ”هغه پېغمبر له يوه تُحفه يوسه او هغۀ ته ووايه چې د خُدائ پاک نه تپوس وکړى چې زۀ به د دې بيمارۍ نه ښۀ شم او که نه.“

⁹نو حِزائيل په څلوېښتو اُوښانو باندې د دمشق ښۀ څيزُونه بار کړل او اليشع له لاړو. کله چې حِزائيل ورسره مِلاو شو نو ورته يې ووئيل، ”ستا خِدمتګار بِن‌حدد بادشاه زۀ د دې تپوس دپاره رالېږلے يم چې هغه به د خپلې بيمارۍ نه ښۀ شى او که نه.“

¹⁰اليشع ورته ووئيل، ”مالِک خُدائ ما ته دا څرګنده کړې ده چې هغه به مړ شى، خو هغۀ له لاړ شه او ورته ووايه چې هغه به روغ شى.“

¹¹اليشع ورته نېغ نېغ کتل او سترګې يې ترې نه نۀ اړولې چې خزائيل وشرمېدو نو د خُدائ پاک خِدمتګار په ژړا شروع وکړه.

¹²حِزائيل ترې نه تپوس وکړو، ”زما صاحِبه ولې ژاړې؟“ اليشع ورته ووئيل، ”ما ته د هغه بدو پته ده چې تۀ به يې د بنى اِسرائيلو سره کوې، تۀ به د هغوئ قلعې وسوزوې، د هغوئ ځلمى به په تُوره ووژنې، د هغوئ بچى به ټوټې ټوټې کړې او د هغوئ د اُميدوارو ښځو خېټې به وشلوې.“

¹³حِزائيل ورته ووئيل، ”زما په شان يو معمولى انسان دومره غټ کار څنګه کولے شى؟“ اليشع ورته ووئيل، ”مالِک خُدائ ما ته ښودلى دى چې تۀ به د شام بادشاه شې.“

¹⁴خزائيل بِن‌حدد له لاړو، بِن‌حدد ترې نه تپوس وکړو، ”اليشع څۀ ووئيل؟“ حِزائيل ورته ووئيل، ”هغۀ ما ته ووئيل چې تۀ به روغ جوړ شې.“

¹⁵خو په ورپسې ورځ خزائيل يوه کمبله واخستله، په اوبو کښې يې لمده کړه او د بادشاه په مخ باندې يې واچوله ساه يې ورله بنده کړه او مړ شو. او حِزائيل د بِن‌حدد نه پس د شام بادشاه شو.

¹⁶د بنى اِسرائيلو د بادشاه د اخى‌اب زوئ يورام د بادشاهۍ په پينځم کال، د يهوسفط زوئ يهورام د يهوداه بادشاه شو

¹⁷چې عُمر يې دوه دېرش کاله وو او هغۀ په يروشلم باندې اتۀ کاله بادشاهى وکړه.

¹⁸هغۀ د اخى‌اب لور وادۀ کړه او د اخى‌اب د کورنۍ په شان هغه هم د بنى اِسرائيلو د بادشاهانو په شان په غلطو لارو روان وو. هغۀ د مالِک خُدائ په نظر کښې بد وکړل،

¹⁹خو مالِک خُدائ نۀ غوښتل چې يهوداه تباه کړى، ځکه چې هغۀ د خپل خِدمت کوُونکى داؤد سره لوظ کړے وو چې د هغۀ د اولاد ځلېدونکې بادشاهى به د همېشه دپاره وى.

²⁰د يهورام په بادشاهۍ کښې ادوم د يهوداه خِلاف بغاوت وکړو او يو خپل بادشاه يې جوړ کړو.

²¹نو يهورام د خپلو ټولو جنګى ګاډو سره صغير ته روان شو، چې هلته ادومى فوجيانو هغوئ محاصره کړل. د شپې هغۀ او د هغۀ د جنګى ګاډو مشرانو محاصره ماته کړه او وتښتېدل او د هغۀ فوجيان خپلو کورونو ته واپس شول.

²²نو ادوم تر اوسه پورې آزاد دے. هم په دې دوران کښې د لبنان ښار هم بغاوت وکړو.

²³يهورام چې نور هر څۀ هم کړى وُو هغه د يهوداه د بادشاهانو د تاريخ په کِتاب کښې ليکلے شوى دى.

²⁴يهورام مړ شو او د داؤد په ښار کښې په شاهى اديره کښې ښخ شو او د هغۀ زوئ اخزياه د هغۀ نه پس بادشاه شو.

²⁵د بنى اِسرائيلو بادشاه د اخى‌اب زوئ يورام د بادشاهۍ په دولسم کال، د يهورام زوئ اخزياه د يهوداه بادشاه شو

²⁶چې عُمر يې دوه ويشت کاله وو او هغۀ يو کال په يروشلم باندې بادشاهى وکړه. د هغۀ د مور عتلياه نوم وو، چې د اخى‌اب بادشاه لور او د بنى اِسرائيلو بادشاه عُمرى نمسۍ وه.

²⁷هغه هم د اخى‌اب د کورنۍ په لار روان وو او هغه څۀ يې کول چې د مالِک خُدائ په نظر کښې بد وُو، لکه څنګه چې د اخى‌اب کورنۍ کړى وُو، ځکه چې هغه د اخى‌اب د کورنۍ زُوم وو.

²⁸اخزياه بادشاه د بنى اِسرائيلو د بادشاه يورام په يو جنګ کښې ملګرتيا وکړه چې دا جنګ د شام د حِزائيل خِلاف وو. فوجونه په رامات جلعاد کښې وجنګېدل او يورام په جنګ کښې زخمى شو.

²⁹هغه د يزرعيل ښار ته راواپس شو چې زخمونه يې روغ شى او اخزياه هلته د مِلاوېدو دپاره ورَغلو.