Read Pashto Bible (Yusufzai) — د پښتو مقدس کتاب تاريخ اول 10 Bible Online

تاريخ اول 10 - Pashto Bible (Yusufzai) — د پښتو مقدس کتاب bible

تاريخ اول 10

¹فلستيانو د بنى اِسرائيلو خِلاف د جِلبوعه په غر باندې يو جنګ وکړو. هلته ډېر بنى اِسرائيليان ووژلے شول او د هغوئ نور پاتې کسان سره د ساول بادشاه او د هغۀ د زامنو وتښتېدل.

²خو فلستيان ساول او د هغۀ زامنو له ورنزدې شول او د ساول درې زامن يُونتن، ابينداب او مُلکيشوَع يې ووژل.

³د ساول نه ګېرچاپېره سخت جنګ وو او هغه په کښې د دشمن په غشو باندې ولګېدو او سخت زخمى شو.

⁴نو هغه ځلمى ته يې ووئيل چې کوم د هغۀ وسلحه وړله، ”خپله تُوره راوباسه او ما پرې ووهه، ګنى هغه ناسنته کسان به راشى او زما بې‌عزتې به کوى.“ خو ځلمے يرېدو او داسې يې نۀ کول، نو ساول خپله تُوره واخستله او په هغې باندې يې ځان وروغورزولو.

⁵کله چې هغه ځلمى وليدل چې ساول مړ شو، نو هغۀ هم خپل ځان په خپله تُوره وروغورزولو او مړ شو.

⁶نو ساول او د هغۀ درې واړه زامن په يو ځائ مړۀ شول او د هغۀ د اولاد هيچا هم بادشاهى ونۀ کړه.

⁷چې د يزرعيل په وادۍ کښې چې کوم بنى اِسرائيليان وُو نو چې هغوئ خبر شول چې لښکر تښتېدلے دے او ساول او د هغۀ زامن مړۀ شوى دى، نو هغوئ خپل ښارونه پرېښودل او منډه يې کړه. او بيا فلستيان راغلل او ښارونه يې قبضه کړل.

⁸په ورپسې ورځ، فلستيان د مړو لوټ کولو له لاړل او هغوئ د ساول او د هغۀ د زامنو لاشونه وموندل چې د جِلبوعه په غرۀ باندې پراتۀ وُو.

⁹هغوئ د ساول سر پرې کړو، د هغۀ نه يې زغره کولاو کړه او د هغوئ سره يې ټولو فلستيانو ته پېغام وړُونکى ولېږل چې خپلو معبودانو او خپلو خلقو ته دا زېرے واوروى.

¹⁰هغوئ د هغۀ وسلحه په خپله يوه عِبادتخانه کښې کېښوده او د هغۀ سر يې د خپل خُدائ دجون په عِبادتخانه کښې راځوړند کړو.

¹¹کله چې د يبيس خلقو په جِلعاد کښې دا واورېدل چې فلستيانو د ساول سره څۀ کړى وُو،

¹²نو د هغوئ ټول تکړه سړى لاړل او د ساول او د هغۀ د زامنو لاشونه يې واخستل او يبيس ته يې يوړل. هلته هغوئ دا د څېړۍ د ونې لاندې ښخ کړل او اووۀ ورځې يې روژه ونيوله.

¹³ساول ځکه مړ شو چې د مالِک خُدائ سره يې خيانت وکړو او د مالِک خُدائ د حُکمونو نافرمانى يې وکړه. هغۀ د کوډګرې ښځې په ذريعه د مړو د روحُونو سره مشورې هم کولې.

¹⁴په کار خو دا وُو چې د مالِک خُدائ نه يې مشوره اخستې وے. نو مالِک خُدائ هغه ووژلو او د بادشاهۍ اِختيار يې د يَسى زوئ داؤد له ورکړو.