Read Pashto Bible (Yusufzai) — د پښتو مقدس کتاب تاريخ اول 13 Bible Online

تاريخ اول 13 - Pashto Bible (Yusufzai) — د پښتو مقدس کتاب bible

تاريخ اول 13

¹داؤد بادشاه د هغه ټولو آفسرانو سره مشوره وکړه چې زرو سړو د ډلو او د سلو سړو د ډلو مشران وُو.

²بيا هغۀ ټولو بنى اِسرائيلو ته اِعلان وکړو چې، ”که تاسو ته منظُوره وى او که دا د مالِک خُدائ زمونږ د خُدائ پاک رضا وى، نو راځئ چې زمونږ باقى خلقو له او د هغوئ په ښارونو کښې اِمامانو او ليويانو له پېغام وړُونکى ولېږُو او هغوئ ته ووايُو چې دلته زمونږ سره راغونډ شى.

³نو بيا به مونږ لاړ شو او د خُدائ پاک د لوظ صندوق به راوړُو، چې د ساول بادشاه په وخت کښې ورته توجو نۀ وه شوې.“

⁴ټول خلق دې ته راضى شول، ځکه چې خلقو ته پته ولګېده چې دا خبره صحيح ده.

⁵نو داؤد د ټول مُلک نه بنى اِسرائيليان راغونډ کړل، په جنوب کښې د مِصر د سرحد نه واخله په شمال کښې د حمات درې پورې، د دې دپاره چې د لوظ صندوق د قريت يعريم نه يروشلم ته راوړى.

⁶داؤد او نور ټول بنى اِسرائيليان د بعله يعنې قريت يعريم ښار ته لاړل چې د يهوداه په علاقه کښې دے، د دې دپاره چې د خُدائ پاک د لوظ صندوق راوړى، هغه صندوق د مالِک خُدائ وو چې هغه د وزرو والا مخلوق په مينځ کښې په تخت باندې دے.

⁷د ابينداب د کور نه هغوئ د لوظ صندوق راوويستلو او په يوه نوې ګاډۍ باندې يې کېښودو. عُزه او اخيو د ګاډۍ لارښوونه کوله،

⁸په دې دوران کښې داؤد او ټول خلق د خپل ټول طاقت سره د خُدائ پاک د درناوى دپاره ګډېدل. سندرې يې وئيلې او ربابونه، تمبلونه، چمټې او بيګلې يې غږولې.

⁹کله چې هغوئ د کيدون درمند ته راغلل، نو غوَيانو تيندک وخوړو، عُزه خپل لاس وراُوګد کړو او د لوظ صندوق يې را ايسار کړو.

¹⁰نو مالِک خُدائ سمدستى عُزه ته غصه شو او صندوق له د لاس د وړلو په وجه يې ووژلو. هغه هلته د خُدائ پاک په حضُور کښې مړ شو،

¹¹داؤد په قهر وو ځکه چې مالِک خُدائ عُزه له په غصه کښې سزا ورکړې وه. نو هغه ځائ تر اوسه پورې فارص عُزه بللے شى.

¹²بيا داؤد د خُدائ پاک نه ويرېدو او وې وئيل، ”زۀ اوس د لوظ صندوق څنګه د ځان سره يوسم؟“

¹³نو داؤد دا د ځان سره په يروشلم کښې د داؤد ښار ته يونۀ وړو. د هغې په ځائ دا يې د يو سړى په کور کښې پرېښودو چې نوم يې عوبيد ادوم وو، چې د جات ښار نه وو.

¹⁴دا هلته درې مياشتې پاتې شو او مالِک خُدائ د عوبيد ادوم کورنۍ او هغه هر څۀ له برکت ورکړو چې د هغۀ وُو.