Read Pashto Bible (Yusufzai) — د پښتو مقدس کتاب تاريخ اول 14 Bible Online

تاريخ اول 14 - Pashto Bible (Yusufzai) — د پښتو مقدس کتاب bible

تاريخ اول 14

¹د صور بادشاه حيرام داؤد له پېغام وړُونکى ولېږل، هغۀ ورله د دِيار د لرګو سره د کاڼو، ګِلکارانو او ترکاڼانو بندوبست وکړو چې يو محل جوړ کړى.

²نو داؤد ته پته ولګېده چې مالِک خُدائ هغه د بنى اِسرائيلو بادشاه جوړ کړے دے او د خپلو خلقو په خاطر يې د هغۀ بادشاهۍ له برکت ورکړے وو.

³هلته په يروشلم کښې داؤد نورې ښځې وادۀ کړې او نور زامن او لوڼه يې پېدا شوې.

⁴د هغۀ دا بچى په يروشلم کښې پېدا شوى وُو: سموع، سوباب، ناتن، سليمان،

⁵اِبحار، اليسوع، الفالط،

⁶نجه، نفج، يفيع،

⁷اليسمع، بعليدع او اليفلط.

⁸کله چې فلستيان خبر شول چې هغه د بنى اِسرائيل په ټول مُلک باندې بادشاه جوړ شوے دے، نو د هغوئ ټول لښکر د هغۀ د نيولو دپاره لاړو. او داؤد د هغوئ سره جنګ له روان شو.

⁹فلستيان د رفائيم مېدان ته رسېدلى وُو او لوټ مار يې شروع کړو.

¹⁰داؤد د خُدائ پاک نه تپوس وکړو، ”ما له په فلستيانو باندې حمله کول په کار دى څۀ؟ تۀ به ما له فتح راکړې؟“ مالِک خُدائ جواب ورکړو، ”او، حمله پرې وکړه! زۀ به تا له فتح درکړم!“

¹¹نو داؤد په بعل پراضيم کښې په هغوئ باندې حمله وکړه او شکست يې ورکړو. هغۀ ووئيل، ”خُدائ پاک زۀ د سېلاب په شان اِستعمال کړے يم چې د دشمن لښکر په مخه يوسم.“ نو په دې وجه د هغه ځائ نوم بعل پراضيم دے.

¹²کله چې فلستيان تښتېدل، نو هغوئ خپل بُتان د ځان نه وروستو پرېښودل او داؤد حُکم وکړو چې دا دې وسوزولے شى.

¹³خو لږ وخت پس فلستيان وادۍ ته راواپس شول او لوټ مار يې شروع کړو.

¹⁴داؤد يو ځل بيا د خُدائ پاک سره مشوره وکړه او خُدائ پاک جواب ورکړو، ”په هغوئ باندې د دې ځائ نه حمله مۀ کوه، خو ورله راتاو شه او د بل طرف نه ورباندې د حملې کولو تيارے وکړه، چرته چې د تُوت ونې دى.

¹⁵کله چې د ونو په سرونو باندې د تګ آواز واورې، نو بيا حمله وکړه، زۀ به ستاسو نه مخکښې د دې دپاره روان يم چې د فلستيانو لښکر له شکست ورکړم.“

¹⁶نو داؤد هم هغه شان وکړل چې څنګه خُدائ پاک حُکم ورکړے وو او هغه د جبعون نه تر جزر پورې په فلستيانو پسې وو.

¹⁷د داؤد شهرت په هر ځائ کښې خور شو او مالِک خُدائ ټول قومونه د هغۀ نه ويرول.