Read Pashto Bible (Yusufzai) — د پښتو مقدس کتاب تاريخ اول 18 Bible Online

تاريخ اول 18 - Pashto Bible (Yusufzai) — د پښتو مقدس کتاب bible

تاريخ اول 18

¹څۀ موده وروستو داؤد بادشاه يو ځل بيا په فلستيانو حمله وکړه او شکست يې ورکړو. هغۀ د هغوئ د قبضې نه د جات ښار او ګېرچاپېره کلى واخستل.

²هغۀ موآبيانو له هم شکست ورکړو، چې د هغۀ د بادشاهۍ لاندې راغلل نو هغۀ له يې محصُول ورکولو.

³بيا، داؤد د ضوباه بادشاه هدد‌عزر له شکست ورکړو او د حمات پورې لاړو، چې هغه مخ په وړاندې تلو نو د فرات سيند پورې علاقه يې قبضه کړه.

⁴داؤد د هغۀ يو زر جنګى ګاډۍ، اووۀ زره په اسونو سوارۀ سړى او شل زره پياده فوجيان ونيول. هغۀ دومره اسونه پرېښودل چې د سلو جنګى ګاډو دپاره کافى وُو او باقى چې کوم پاتې وُو نو هغه ټول يې ګوډ کړل.

⁵کله چې د دمشق شاميانو د هدد‌عزر بادشاه د مدد دپاره يو لښکر ولېږلو، نو داؤد ورباندې حمله وکړه او دوويشت زره سړى يې ترې نه ووژل.

⁶بيا هغۀ د هغوئ په علاقه کښې فوجى کېمپ ولګولو او هغوئ د هغۀ د بادشاهۍ لاندې راغلل او هغۀ له يې محصُول ورکولو. مالِک خُدائ داؤد له په هر ځائ کښې فتح ورکوله.

⁷داؤد د سرو زرو هغه ډالونه قبضه کړل چې کوم د هدد‌عزر آفسرانو وړل او دا يې يروشلم ته يوړل.

⁸هغۀ د طِبخت او قون ښارونو نه په لوئ مِقدار کښې زېړ هم يوړل، چې په دې ښارونو باندې هدد‌عزر بادشاهى کوله. وروستو سليمان دا د زېړو ډيګۍ، ستنو او د عِبادتخانې د زېړو د لوښو جوړولو دپاره اِستعمال کړل.

⁹د حمات بادشاه توعو خبر شو چې داؤد د هدد‌عزر ټول لښکر له شکست ورکړے دے.

¹⁰نو هغۀ خپل زوئ يورام ورولېږلو چې داؤد بادشاه ته ستړى مشى وکړى او په هدد‌عزر باندې د فتح موندلو مبارکى ورکړى، چې د هغۀ خِلاف توعو څو ځلې جنګېدلے وو. يورام داؤد له تُحفې راوړې چې د سرو زرو، سپينو زرو او زېړو نه جوړې وې.

¹¹داؤد بادشاه دا څيزُونه وقف کړل چې په عِبادت کښې اِستعمال شى، سره د هغه سپينو او سرو زرو چې د هغه قومونو نه يې اخستى وُو چې کوم يې فتح کړى وُو لکه چې ادوم، موآب، عمون، فلستيه او عماليق.

¹²ابيشى چې د هغۀ مور ضروياه وه، هغۀ د مالګې په مېدان کښې ادوميانو له شکست ورکړو او د هغوئ نه يې اتلس زره کسان ووژل.

¹³هغۀ په ټول ادوم کښې فوجى کېمپونه ولګول او د هغه ځائ خلق د داؤد د بادشاهۍ لاندې راغلل. مالِک خُدائ داؤد له په هر ځائ کښې فتح ورکوله.

¹⁴داؤد په ټولو بنى اِسرائيلو باندې حکومت کولو او دا خبره يې يقينى کړه چې د هغۀ د خلقو سره همېشه د حق او اِنصاف سلوک کېږى.

¹⁵د ابيشى ورور يوآب د فوج مشر وو، د اخيلود زوئ يهوسفط منشى وو،

¹⁶د اخيطوب زوئ صدوق او د ابياتار زوئ اخيمُلک اِمامان وُو، شراياه د دربار منشى وو،

¹⁷د يهويدع زوئ بناياه د داؤد د حِفاظت کوُونکو مشر وو، او د داؤد زامنو د هغۀ په خِدمت کښې لوئې عُهدې لرلې.