Read Pashto Bible (Yusufzai) — د پښتو مقدس کتاب تاريخ اول 23 Bible Online

تاريخ اول 23 - Pashto Bible (Yusufzai) — د پښتو مقدس کتاب bible

تاريخ اول 23

¹کله چې داؤد د ډېر عُمر شو، نو هغۀ خپل زوئ سليمان د بنى اِسرائيلو بادشاه جوړ کړو.

²داؤد بادشاه د بنى اِسرائيلو ټول مشران، ټول اِمامان او ليويان راغونډ کړل.

³هغۀ د هغه ټولو نرانو ليويانو مردم‌شمارى وکړه چې عُمر يې دېرش کاله يا د دې نه زيات وو. دا ټول شمېر اتۀ دېرش زره وو.

⁴بادشاه د دې ليويانو نه څلريشت زره کسان مقرر کړل چې د مالِک خُدائ د کور د کار اِنتظام وکړى، شپږ زره کسان چې اِنتظام چلوى او لانجې هواروى،

⁵څلور زره کسان د څوکيدارۍ دپاره او څلور زره کسان د مالِک خُدائ د حمد‌و‌ثناء وئيلو دپاره. هغوئ د موسيقۍ هغه څيزُونه اِستعمالول چې بادشاه د دې دپاره ورکړى وُو.

⁶داؤد ليويان په درې ډلو کښې د هغوئ د ډلو په مطابق تقسيم کړل: جيرسون، قُهات او مرارى.

⁷د جيرسون دوه زامن وُو: لعدان او سِمعى.

⁸د لعدان درې زامن وُو: مشر يحى ايل، ورپسې زيتان او يوئيل،

⁹چې هغوئ د هغه ډلو مشران وُو چې د لعدان اولاد وو. د سِمعى درې زامن وُو: سلوميت، حزى اېل او حاران.

¹⁰۱۰‏-۱۱ د سِمعى څلور زامن د عُمر په ترتيب دا وُو: يحت، زينا، يعوس او بريعاه. د يعوس او بريعاه بچى ډېر نۀ وُو، نو په دې وجه هغوئ يوه ډله شمېرلے کېدل.

¹²د قُهات څلور زامن وُو: عُمرام، اِضهار، حبرون او عُزئيل.

¹³د هغۀ مشر زوئ عُمرام د هارون او موسىٰ پلار وو. هارون او د هغۀ اولاد د دې دپاره مخصُوص کړے شوى وُو چې د همېشه دپاره د مقدسو څيزُونو مشران وى، چې د مالِک خُدائ په عِبادت کښې خوشبوئى سوزوى، د هغۀ خِدمت کوى او د مالِک خُدائ په نوم باندې د خلقو دپاره برکت غواړى.

¹⁴خو د خُدائ پاک د خِدمت‌ګار موسىٰ زامن په ليويانو کښې شامِل وُو.

¹⁵د موسىٰ دوه زامن وُو: جيرسوم او اِلعازار.

¹⁶د جيرسوم په زامنو کښې مشر سبو اېل وو.

¹⁷د اِلعازار صِرف يو زوئ رحبياه وو، خو د رحبياه بچى ډېر وُو.

¹⁸د قُهات د دويم زوئ اِضهار، زوئ سلوميت وو چې د ډلې مشر وو.

¹⁹د قُهات درېم زوئ حبرون څلور زامن وُو: يرياه، امرياه، يحزى ايل او يقمعام.

²⁰د قُهات د څلورم زوئ عُزئيل دوه زامن ميکاه او يسياه وُو.

²¹د مرارى دوه زامن محلى او موشى وُو. د محلى هم دوه زامن اِلعازر او قيس وو،

²²خو د اِلعازر زامن نۀ وُو، صِرف لوڼه يې وې او بې زامنو مړ شو. د هغۀ لوڼو د خپل ترۀ زامنو يعنې د قيس د زامنو سره ودونه وکړل.

²³د مرارى دويم زوئ موشى درې زامن وُو: محلى، عدر او يريموت.

²⁴دا ډله په ډله او کورنۍ په کورنۍ د ليوى اولاد دے، چې د هغوئ هر يو نومونه ليکلے شوى وُو. د هغۀ د اولاد هر يو کس د مالِک خُدائ په کور کښې خِدمت کولو چې د هغوئ عُمر شل کاله يې يا د دې نه زيات وو.

²⁵داؤد ووئيل، ”مالِک خُدائ د بنى اِسرائيلو خُدائ پاک خپل خلق په آمن کښې کړى دى او هغه به په خپله په يروشلم کښې د همېشه دپاره اوسېږى.

²⁶نو ليويانو ته نور ضرورت نشته چې د مالِک خُدائ د حضُور خېمه او هغه ټول سامان يوسى چې په عِبادت کښې اِستعمالېږى.“

²⁷د داؤد د آخرى وصيت په بُنياد باندې کله چې ليويان د شلو کالو عُمر ته رسېدل نو د هغوئ ټولو نومونه د خِدمت دپاره ليکلے شول.

²⁸او هغوئ ته دا کارونه حواله شوى وُو: د مالِک خُدائ د کور په عِبادت کښې د هارون د اولاد مدد کول. د کور د دربارونو او کوټو خيال ساتل. او چې کوم څيزُونه مقدس وُو هغه هر څۀ د پليتېدو نه پاک ساتل.

²⁹خُدائ پاک ته د پېش کړے شوې روټۍ او د هغه اوړو ذِمه وارى اخستل چې په نذرانو کښې اِستعمالېدل، د خمبيرې نه بغېر نرۍ پخې شوې روټۍ، پخې شوې نذرانې او اوړۀ چې د زيتُونو تېل ورسره ګډ وى. د مالِک خُدائ د کور د نذرانو تَلل او مِقدار معلومول،

³⁰او هر سحر او هر ماښام د مالِک خُدائ په وړاندې ودرېدل، د هغۀ ثناء صِفت وئيل او د هغۀ شکر ادا کول.

³¹او هر کله چې د سبت په ورځ، د نوې مياشتې په اختر او نورو اخترونو باندې مالِک خُدائ ته نذرانې سوزولے شوې، نو هغوئ به مدد کولو. ليويانو به هر ځل د مالِک خُدائ په حضُور کښې د سړو د شمېر په مطابق خِدمت کولو، هغوئ په هغه اصُولو باندې عمل کولو چې کوم ورته ښودلى شوى وُو.

³²هغوئ له د مالِک خُدائ د حضُور خېمې او کور د خيال ساتلو او د هغوئ د خپلوانو يعنې د هارون د اولاد اِمامانو د مدد کولو ذِمه وارۍ ورکړے شوې وې، چې دا ذِمه وارۍ د مالِک خُدائ د کور په خِدمت کښې ادا کېدې.