Read Pashto Bible (Yusufzai) — د پښتو مقدس کتاب تاريخ اول 24 Bible Online

تاريخ اول 24 - Pashto Bible (Yusufzai) — د پښتو مقدس کتاب bible

تاريخ اول 24

¹دا د خِدمت هغه ډلې دى چې د هارون اولاد په کښې تقسيم وو. د هارون څلور زامن وُو: ندب، ابيهُو، اِلعازر او اِتمر.

²ندب او ابيهُو د خپل پلار د مرګ نه مخکښې مړۀ شول او د هغوئ اولاد نۀ وو، نو د هغوئ وروڼه اِلعازر او اِتمر اِمامان شول.

³داؤد بادشاه د هارون د اولاد نه د هغوئ د ذِمه وارو په مطابق په ډلو کښې تقسيم کړل. په دې کار کښې د هغۀ مدد د اِلعازر اولاد صدوق او د اِتمر اولاد اخيمُلک کولو.

⁴د اِلعازر د اولاد نه شپاړس ډلې جوړې شوې وې، خو اِتمر د اولاد نه اتۀ ډلې جوړې وې، داسې په دې وجه شوى وُو چې د اِلعازر په اولاد کښې د کورَنو نور مشران وُو.

⁵د اِلعازر او اِتمر دواړو په اولاد کښې د مالِک خُدائ په کور کښې د خِدمت دپاره تکړه آفسران او اِمامان وُو نو ټولې ذِمه وارۍ مختلفو ډلو ته د پچې په ذريعه حواله شوې وې.

⁶د اِلعازر او د اِتمر اولاد دپاره وار په وار پچه اچولے شوه. نو د هغوئ نومونه د نتانى ايل زوئ سمعياه ليکلى وُو چې دا يو ليوے منشى وو. بادشاه، د هغۀ آفسران، صدوق اِمام، د ابياتار زوئ اخيمُلک او د ليوى قبيلې د اِمامانو د کورَنو مشران ټول د دې ګواهان وُو.

⁷۷‏-۱۸ دا هغه ترتيب دے چې په هغې کښې د څليريشتو کورَنو ډلو ته خپلې خپلې ذِمه وارۍ حواله شوې وې: يهويريب، يدعياه، حارِم، شعوريم، مُلکياه، ميامين، هقوض، ابياه، يشوَع، سکانياه، اِلياسب، يقيم، خُفاه، يسباب، بِلجاه، اِمير، حزير، حفضيض، فتحياه، يحزقيل، يکين، جمول، دلاياه او معزياه.

¹⁹د دې سړو نومونه د هغوئ د ذِمه وارو په مطابق ليکلے شوى وُو چې کله هم هغوئ د مالِک خُدائ کور ته د خپلو هغه ذِمه وارو دپاره تلل کوم چې د هغوئ پلار نيکۀ هارون د مالِک خُدائ د بنى اِسرائيلو خُدائ پاک د حُکمونو د منلو دپاره مقررې کړې وې.

²⁰دا د ليوى د اولاد کورَنو نور مشران دى: يهدياه چې د سبو اېل په ذريعه د عُمرام اولاد وو،

²¹يسياه د رحبياه اولاد،

²²يحت، د سلوميت نه د اِضهار اولاد،

²³د عُمر په ترتيب باندې د حبرون زامن دا وُو، يرياه، امرياه، يحزى اېل، يقمعام،

²⁴سمير، د ميکاه نه د عُزئيل اولاد،

²⁵زکرياه، د ميکاه ورور يسياه نه د عُزئيل اولاد،

²⁶د مرارى اولاد، محلى، موشى او يعزياه.

²⁷د يعزياه درې زامن وُو: سوهم، زکور او عبرى.

²⁸۲۸‏-۲۹ د محلى دوه زامن اِلعازر او قيس وُو. د اِلعازر زامن نۀ وُو، خو د قيس يو زوئ يرحمئيل وو.

³⁰د موشى درې زامن وُو: محلى، عدر او يريموت. دا د ليويانو کورنۍ دى.

³¹د هرې کورنۍ مشرانو او کشرانو وروڼو يو شان د هغوئ د ذِمه وارو دپاره پچه اچوله، هم هغه شان لکه څنګه چې د هغوئ خپلوانو يعنې د هارون د اولاد اِمامانو کړى وُو. داؤد بادشاه، صدوق، اخيمُلک او د اِمامانو د کورَنو مشران او ليويان د دې ګواهان وُو.