Read Pashto Bible (Yusufzai) — د پښتو مقدس کتاب تاريخ اول 25 Bible Online

تاريخ اول 25 - Pashto Bible (Yusufzai) — د پښتو مقدس کتاب bible

تاريخ اول 25

¹داؤد بادشاه او د ليويانو مشرانو د ليويانو دا ډلې خوښې کړې چې د خُدائ پاک پېغام بيانوى: آسف، هيمان او يدوتون. دې سړو به د بينجو، ربابونو او چمټو د موسيقۍ سره پېشګوئې ورکوله. دا د هغه کسانو نومونه دى کوم چې د عِبادت د مشرۍ دپاره خوښ کړے شوى وُو، چې هرې ډلې به هم هغه قِسم خِدمت کولو:

²د آسف څلورو زامنو زکور، يوسف، نتانى ايل او اسرى‌لاه، د آسف د مشرۍ لاندې کار کولو. چې کله هم بادشاه حُکم کولو نو آسف به د خُدائ پاک پېغام بيانولو.

³د يدوتون شپږو زامنو جدلياه، ضرى، يشعياه، سِمعى، حسبياه او متتيا، د خپل پلار د ښودنې لاندې کار کولو، يدوتون د ربابونو د موسيقۍ سره د خُدائ پاک پېغام بيانولو، حمد‌و‌ثناء يې وئيله او د مالِک خُدائ شکر يې ادا کولو.

⁴د هيمان څوارلس زامنو بُقياه، متنياه، عُزئيل، سبو اېل، يريموت، حنانياه، حنانى، الياته، جدالتى، روممتى عزر، يسبقاشه، ملوتى، هوتير او محازيوت.

⁵خُدائ پاک د خپلې وعدې په مطابق هيمان د بادشاه پېغمبر له دا څوارلس زامن او درې لوڼه د دې دپاره ورکړې وې چې هيمان عزتمند شى.

⁶د هغۀ ټولو زامنو د خپل پلار د ښودنې لاندې چمټۍ، بينجو او ربابونه د مالِک خُدائ د کور په عِبادت کښې شريکېدو دپاره غږول. او آسف، يدوتون او هيمان د بادشاه د حُکم لاندې کولو.

⁷دا څليريشت واړه تجربه‌کار سړى وُو او د هغوئ خپلوان ليويان څوک چې تکړه موسيقاران وُو. دا ټول دوه سوه او اتۀ اتيا سړى وُو.

⁸هغوئ ته د کارونو ذِمه وارۍ حواله کولو دپاره پچه اچولے شوه، که هغوئ ځوانان وو او يا بوډاګان، که استاذان او يا که شاګردان وو.

⁹۹‏-۳۱ دا دوه سوه او اتۀ اتيا سړى د کورَنو په مطابق د دولسو دولسو کسانو په څليريشتو ډلو کښې تقسيم کړے شوى وُو، چې د هرې ډلې يو يو مشر وو. هغوئ په دې ترتيب باندې کار کولو: د آسف د کورنۍ نه يوسف، جدلياه، زکور، ضرى، نتنياه، بُقياه، اسرى‌لاه، يشعياه، متنياه، سِمعى، عُزئيل، حسبياه، سبو اېل، متتياه، يريموت، حنانياه، يسبقاشه، حنانى، ملوتى، الياته، هوتير، جدالتى، محازيوت او روممتى عزر.