Read Pashto Bible (Yusufzai) — د پښتو مقدس کتاب تاريخ اول 29 Bible Online

تاريخ اول 29 - Pashto Bible (Yusufzai) — د پښتو مقدس کتاب bible

تاريخ اول 29

¹داؤد بادشاه ټولې غونډې ته ووئيل، ”زما زوئ سليمان هغه څوک دے چې خُدائ پاک خوښ کړے دے، خو هغه لا هلک او ناتجربه‌کاره دے. کوم کار چې کېدونکے دے هغه ډېر لوئ دے، ځکه چې دا د انسانانو محل نۀ دے بلکه د مالِک خُدائ، خُدائ پاک کور دے.

²ما د خپل خُدائ پاک د کور د سرو زرو، سپينو زرو، پيتلو، اوسپنې، لرګى، د قيمتى کاڼو او جواهراتو، د ښائسته کاڼو ټُکړو او د سنګِ مرر د مِقدار تيارولو هر کوشش کړے دے.

³د دې هر څۀ نه علاوه، د خُدائ پاک د کور سره زما د مينې په وجه ما خپل سپين زر او سرۀ زر هم ورکړى دى.

⁴د مالِک خُدائ د کور په دېوالونو باندې د سرو زرو او سپينو زرو پترو خيژولو دپاره ما د اوفير د سلو ټنو نه زيات سرۀ زر او تقريباً دوه سوه او څلوېښت ټنه سوچه سپين زر هم ورکړى دى

⁵او د هغه ټولو څيزُونو دپاره مې دا ورکړى دى چې ماهِر کاريګران به يې جوړوى. نو اوس داسې څوک شته چې مالِک خُدائ له نذرانې ورکړى؟“

⁶۶‏-۷ بيا د ډلو مشرانو، د قبيلو آفسرانو، د فوج مشرانو، د شاهى جائيداد اِنتظام کوُونکو د مالِک خُدائ د کور د کار دپاره دا څيزُونه ورکړل: د يو سل او اويا ټنو نه زيات سرۀ زر، د درې سوو او دېرشو ټنو نه زيات سپين زر او تقريباً شپږ سوه او شل ټنه زېړ او د درې زره او څلورو سوه ټنو نه زياته اوسپنه.

⁸د چا سره چې قيمتى کاڼى وُو نو هغه يې د مالِک خُدائ د کور د خزانې دپاره ورکړل، چې د هغې اِنتظام د جيرسون ډلې د ليوى قبيلې يحى ايل کولو.

⁹خلقو د زړۀ د اِخلاصه څيزُونه ورکول او هغوئ په دې خوشحاله وُو چې څومره زيات يې ورکړى دى. داؤد بادشاه هم ډېر زيات خوشحاله وو.

¹⁰هلته د ټولې غونډې په مخکښې داؤد د مالِک خُدائ ثناء صِفت ووئيلو. هغۀ ووئيل، ”زمونږ د پلار نيکۀ يعقوب مالِک خُدائ، خُدائ پاکه، ستا ثناء صِفت دې د همېشه دپاره وى!

¹¹تۀ لوئ او طاقتور، د شان او شوکت والا او عزتمند يې. په زمکه او آسمان کښې هر څۀ ستا دى او اے مالِک خُدايه، تۀ په هر څۀ باندې عظيم بادشاه او حُکمران يې.

¹²عزت او دولت ستا نه راځى، تۀ په خپل طاقت او قُوت سره په هر څۀ باندې حکومت کوې، او تۀ کولے شې چې هر څوک لوئ او طاقتور کړې.

¹³اوس زمونږ خُدايه پاکه، مونږ ستا شکر کوُو او مونږ ستا د جلال نه د ډک نوم ثناء صِفت وايُو.

¹⁴خو بيا هم په حقيقت کښې زۀ او زما خلق تا له هيڅ هم نۀ شو درکولے، ځکه چې هر يو څيز ستا د طرف نه نِعمت دے او مونږ صِرف تا له هغه څۀ واپس درکړى دى چې څۀ ستا وُو.

¹⁵مالِکه خُدايه! تا ته پته ده چې زمونږ د پلار نيکۀ په شان مونږ خپل ژوند د مسافرو په شان په يو ځائ بل ځائ کښې تېر کړے دے زمونږ ژوند د تېرېدونکى سورى په شان فانى دے.

¹⁶مالِکه خُدايه، زمونږ خُدايه پاکه! مونږ دا ټول دولت ستا د کور د جوړولو دپاره راوړے دے چې ستا د نوم درناوے وشى، خو دا ټول ستا نه راغلے وو او دا ټول ستا دے.

¹⁷ما ته پته ده چې تۀ د هر چا زړۀ معلوموې او د خلقو په صداقت خوشحاليږى. په روغ نېت او خلوص سره ما دا هر څۀ تا له درکړى دى او ما ته پته لګېدلې ده چې کوم خلق دلته راغونډ شوى دى هغوئ تا له څومره په شوق او خوشحالۍ سره نذرانې راوړى.

¹⁸مالِکه خُدايه، زمونږ د پلار نيکۀ اِبراهيم، اِسحاق او يعقوب خُدايه پاکه! ستا د خپلو خلقو په زړۀ کښې ستا سره دا مينه د همېشه دپاره مضبوطه وساته او د هغوئ زړونه وفادار وساته.

¹⁹زما د زوئ سليمان په زړۀ کښې دا جذبه واچوه چې ستا ټول حُکمونه ومنى او هغه کور جوړ کړى چې د کومې دپاره ما دا تيارے کړے دے.“

²⁰بيا داؤد ټولې ډلې له حُکم ورکړو، ”د مالِک خُدائ ستاسو د خُدائ پاک ثناء صِفت وکړئ!“ نو ټولې غونډې د مالِک خُدائ، د خپل پلار نيکۀ د خُدائ پاک ثناء صِفت وکړو او هغوئ لاندې ټيټ شول او مالِک خُدائ او بادشاه له يې عزت ورکړو.

²¹په ورپسې ورځ هغوئ د قربانۍ په توګه ځناور حلال کړل، مالِک خُدائ ته يې وقف کړل او بيا يې خلقو له ورکړل چې وې خورى. د دې نه علاوه، هغوئ يو زر غوَيى، يو زر ګډان او يو زر ګډُورى هم حلال کړل، چې په قربان‌ګاه باندې يې پوره وسوزول. هغوئ د انګورو د شرابو نذرانې هم راوړې.

²²چې هغوئ د مالِک خُدائ په حضُور کښې خوراک څښاک وکړو نو په هغه ورځ هغوئ ډېر خوشحاله وُو. هغوئ په دويم ځل سليمان بادشاه جوړ کړو. هغوئ د مالِک خُدائ په نوم سليمان د بادشاه په توګه او صدوق د اِمام په توګه مقرر کړو.

²³نو سليمان د خپل پلار داؤد نه پس په هغه تخت باندې کښېناستو کوم چې مالِک خُدائ قائم کړے وو. هغه يو کامياب بادشاه وو او د بنى اِسرائيلو ټول قوم هغه منلو.

²⁴ټولو آفسرانو، فوجيانو او تر دې پورې چې د داؤد نورو زامنو دا لوظ وکړو چې د سليمان بادشاه وفادار به وى.

²⁵مالِک خُدائ سليمان د ټول قوم په نظر کښې عزتمند کړو او د هغه نورو ټولو بادشاهانو نه يې زيات شان او شوکت ورکړو چې هغوئ په بنى اِسرائيلو بادشاهى کړې وه.

²⁶نو د يَسى زوئ داؤد په ټولو بنى اِسرائيلو باندې بادشاهى کوله.

²⁷هغۀ څلوېښتو کالو پورې بادشاهى کوله. هغۀ په حبرون کښې اووۀ کاله او په يروشلم کښې درې دېرش کاله بادشاهى وکړه.

²⁸هغه يو عزتمند او مالدار سړے وو او ښۀ په پوخ عُمر کښې مړ شو او د هغۀ زوئ سليمان د هغۀ نه پس بادشاه جوړ شو.

²⁹د داؤد بادشاه تاريخ د اول نه واخله تر آخره پورې د دې درې پېغمبرانو په کتابونو کښې ليکلے شوے دے: سموئيل، ناتن او جاد.

³⁰د تاريخ دا کتابونه وائى چې هغۀ څنګه حکومت وکړو او هغه څومره طاقتور وو او هغه هر څۀ چې په هغۀ، بنى اِسرائيلو او ګېرچاپېره بادشاهو باندې شوى وُو.