Read Pashto Bible (Yusufzai) — د پښتو مقدس کتاب تاريخ دويم 12 Bible Online

تاريخ دويم 12 - Pashto Bible (Yusufzai) — د پښتو مقدس کتاب bible

تاريخ دويم 12

¹څنګه چې رحُبعام ته د بادشاهۍ اِختيار مِلاو شو، نو هغۀ او د هغۀ ټولو خلقو د مالِک خُدائ قانون پرېښودو.

²د رحُبعام د بادشاهۍ په پينځم کال د مالِک خُدائ سره د بې وفائۍ په وجه هغوئ ته سزا مِلاو شوه. د مِصر بادشاه سيساق په يروشلم باندې حمله وکړه

³چې د هغۀ سره د دولسو سوو جنګى ګاډو لښکر، شپېتۀ زره په اسونو سوارۀ کسان او ډېر فوجيان وُو چې بې شمېره وُو، چې په دې کښې د ليبيا، سکى او د ايتهوپيا فوجيان شامِل وُو.

⁴هغۀ د يهوداه د پَخو دېوالونو والا ښارونه قبضه کړل او د يروشلم پورې وړاندې لاړو.

⁵سمعياه پېغمبر رحُبعام بادشاه او د يهوداه هغه مشرانو له لاړو کوم چې په يروشلم کښې سيساق نه د تښتېدو دپاره راغونډ شوى وُو. هغۀ هغوئ ته ووئيل، ”ستاسو دپاره د مالِک خُدائ پېغام دا دے چې تاسو زۀ مالِک خُدائ پرېښودم نو دا ځکه ما تاسو سيساق ته پرېښودئ.“

⁶نو بادشاه او مشرانو په عاجزۍ سره دا ومنله چې هغوئ ګناه کړې ده او هغوئ ووئيل، ”مالِک خُدائ چې څۀ کوى نو هغه صحيح دى.“

⁷کله چې مالِک خُدائ دا وليدل نو هغۀ سمعياه ته بيا کلام وکړو او ورته يې ووئيل، ”هغوئ خپله ګناه ومنله نو زۀ به هغوئ نۀ تباه کوم. خو چې کله سيساق حمله وکړى، خو د هغوئ لږ کسان به ژوندى پاتې شى. يروشلم ته به زما د غصې پوره پته ونۀ لږى،

⁸خو سيساق به هغوئ فتح کړى، نو هغوئ ته به زما د خِدمت او د دنياوى بادشاهانو د خِدمت کولو فرق معلوم شى.“

⁹سيساق بادشاه يروشلم ته راغلو او د مالِک خُدائ د کور او د محل نه يې خزانې يوړې. هغۀ هر څۀ يوړل سره د هغه ډالونو چې سليمان بادشاه د سرو زرو نه جوړ کړى وُو.

¹⁰د هغې په ځائ رحُبعام د زېړو ډالونه جوړ کړل او د هغه آفسرانو په حواله يې کړل چې هغوئ د محل د دروازو د څوکيدارۍ ذِمه وار وُو.

¹¹هر ځل به چې بادشاه د مالِک خُدائ کور ته تلو، نو څوکيدارانو به ډالونه د ځان سره وړل او بيا به يې واپس جمع کول.

¹²هغۀ خپل ځان مالِک خُدائ ته حواله کړو نو په دې وجه د مالِک خُدائ غصې هغه پوره تباه نۀ کړو او د يهوداه کارونه سم وُو.

¹³رحُبعام په يروشلم کښې بادشاهى کوله او د خپلې بادشاهۍ طاقت يې زيات کړو. هغه د يو څلوېښتو کالو وو چې هغه بادشاه شو او هغۀ اوولس کاله په يروشلم بادشاهى وکړه، دا هغه ښار وو چې مالِک خُدائ دا د بنى اِسرائيلو د ټولې علاقې نه د داسې ځائ په توګه خوښ کړے وو چرته به چې د هغۀ عِبادت کېږى. د رحُبعام مور نعمه وه چې هغه د عمون د مُلک وه.

¹⁴نو هغۀ بدکارى کوله، ځکه چې هغۀ د مالِک خُدائ د مرضۍ د معلومولو کوشش نۀ کولو.

¹⁵د رحُبعام د اول نه واخله تر آخره پورې کارنامې او د هغۀ د کورنۍ حِساب کِتاب د سمعياه پېغمبر په تاريخ کښې او د عدو پېغمبر په تاريخ کښې ملاوېږى. رحُبعام او يربعام مسلسل د يو بل خِلاف د جنګ په حالت کښې وُو.

¹⁶رحُبعام مړ شو او د داؤد ښار په شاهى اديره کښې ښخ شو او د هغۀ زوئ ابياه د هغۀ نه پس بادشاه جوړ شو.