Read Pashto Bible (Yusufzai) — د پښتو مقدس کتاب تاريخ دويم 15 Bible Online

تاريخ دويم 15 - Pashto Bible (Yusufzai) — د پښتو مقدس کتاب bible

تاريخ دويم 15

¹د خُدائ پاک روح د عوبيد په زوئ عزرياه باندې نازل شو،

²او هغه د آسا سره مِلاوېدو له لاړو. هغۀ ورته اُوچت آواز وکړو، ”آسا بادشاه او د يهوداه او بنيامين ټولو خلقو، ما ته غوږ ونيسئ! چې تر څو پورې تاسو د مالِک خُدائ سره يئ نو مالِک خُدائ ستاسو سره دے. که تاسو د هغۀ طلب وکړئ نو هغه به پېدا کړئ، خو که تاسو ترې نه واوړئ، نو هغه به تاسو پرېږدى.

³تر ډېره وخته پورې بنى اِسرائيلو د حقيقى خُدائ پاک نه بغېر، د اِمامانو د ښودنې نه بغېر او بغېر د يو قانون نه ژوند تېرولو.

⁴خو چې کله به مصيبت راغلو، نو هغوئ به مالِک خُدائ د بنى اِسرائيلو خُدائ پاک ته راوګرځېدل. هغوئ به د خُدائ پاک لټُون وکړو او پېدا به يې کړو.

⁵په هغه ورځو کښې به هيڅ څوک په حِفاظت سره تلے راتلے نۀ شول، ځکه چې په هر مُلک کښې لويه ګډ وډى وه.

⁶يو قوم بل قوم خراب تُراب کړو او يو ښار بل ښار دړې وړې کړو، ځکه چې خُدائ پاک به په هغوئ باندې هر قسم مصيبت راوستلو.

⁷خو تاسو تکړه شئ او بې‌حوصلې کېږئ مه او بيا چې تاسو کوم کار کوئ نو د هغې به تاسو ته اِنعام ملاوېږى.“

⁸کله چې آسا د هغه پېشګويۍ نه خبر شو چې د عوبيد زوئ عزرياه ورکړې وه، نو د هغۀ حوصله مضبوطه شوه. نو هغۀ د يهوداه او بنيامين په مُلک کښې او په هغه ښارونو کښې ټول پليت بُتان لرې کړل چې کوم ښارونه يې د اِفرائيم د غرونو په مُلک کښې قبضه کړى وُو. هغۀ د مالِک خُدائ هغه قربان‌ګاه هم بيا جوړه کړه کومه چې د مالِک خُدائ د کور په دربار کښې ولاړه وه.

⁹د اِفرائيم، منسى او د شمعون قبيلو ډېر خلق د آسا په طرف شوى وُو او د هغۀ په بادشاهۍ کښې اوسېدل، ځکه چې هغوئ ته پته لګېدلې وه چې مالِک خُدائ د هغۀ مل دے. آسا هغوئ ټول او د يهوداه او بنيامين خلق راوغوښتل.

¹⁰نو هغوئ د آسا د بادشاهۍ په پينځلسم کال په دريمه مياشت په يروشلم کښې راغونډ شول.

¹¹په هغه ورځ هغوئ د هغه مالِ غنيمت نه مالِک خُدائ ته نذرانې پېش کړې چې کوم هغوئ قبضه کړے وو: اووۀ سوه څاروى او اووۀ زره ګډان.

¹²هغوئ يو تړون وکړو چې هغوئ به د زړۀ د اخلاصه د مالِک خُدائ د خپل پلار نيکۀ د خُدائ پاک عِبادت کوى.

¹³چې هر يو نر يا ښځې، ځوان يا بوډا به عِبادت نۀ کولو نو هغه به وژلے شول.

¹⁴نو هغوئ د مالِک خُدائ په نوم په اُوچت آواز سره قسم وکړو چې هغوئ به دا لوظ پوره کوى او بيا هغوئ چغه ووهله او بيګلې يې وغږولې.

¹⁵د يهوداه ټول خلق خوشحاله وُو ځکه چې هغوئ د زړۀ د اخلاصه لوظ کړے وو. هغوئ د مالِک خُدائ په عِبادت کښې خوشحاله وُو، مالِک خُدائ هغوئ قبول کړل او د ټولو دښمانو نه يې په آمن کښې کړل.

¹⁶آسا بادشاه خپله نيا معکه د مور مُلکې د عُهدې نه لرې کړه، ځکه چې هغې د اشيرې د بې شرمۍ بُت جوړ کړے وو. آسا دا بُت مات کړو، ټوټې ټوټې يې کړو او د دې ټوټې يې د قِدرون په وادۍ کښې وسوزولې.

¹⁷اګر چې آسا بيا هم په هغه مُلک کښې د نا مناسبه عِبادت ټول ځايُونه تباه نۀ کړل، خو هغه ټول عُمر د مالِک خُدائ وفادار پاتې شو.

¹⁸هغۀ د مالِک خُدائ په کور کښې هغه ټول څيزُونه کېښودل کوم چې د هغۀ پلار ابياه خُدائ پاک ته وقف کړى وُو او داسې د سرو زرو او سپينو زرو هغه څيزُونه يې هم کېښودل چې کوم هغۀ په خپله وقف کړى وُو.

¹⁹د هغۀ د بادشاهۍ تر پينځۀ دېرشم کال پورې نور جنګونه نۀ وُو.