Read Pashto Bible (Yusufzai) — د پښتو مقدس کتاب تاريخ دويم 19 Bible Online

تاريخ دويم 19 - Pashto Bible (Yusufzai) — د پښتو مقدس کتاب bible

تاريخ دويم 19

¹د يهوداه، يهوسفط بادشاه په يروشلم کښې په خېر سره خپل محل ته واپس راغلو.

²د حنانى زوئ ياهُو پېغمبر د بادشاه سره مِلاوېدو له ورَغلو او ورته يې ووئيل، ”ستا په خيال کښې دا صحيح خبره ده چې د هغه خلقو مدد وکړے شى چې کوم بدعمله دى او د هغه خلقو طرفدارى وکړے شى چې څوک د مالِک خُدائ نه نفرت کوى؟ تا چې څۀ کړى دې د هغې په وجه تا په خپل ځان باندې د مالِک خُدائ غصه راپارولې ده.

³خو بيا هم، په تا کښې څۀ خوبۍ هم شته دے. تا د اشيرې بُت ټولې نښې ورانې کړې چې خلقو د هغې عِبادت کولو او تا د خُدائ پاک د طلب کلکه اراده کړې وه.“

⁴اګر چې يهوسفط په يروشلم کښې اوسېدو، هغۀ به هر وخت په جنوب کښې د بير سبع نه واخله په شمال کښې د غرونو مُلک اِفرائيم تر غاړې پورې سفر کولو، دا د دې پاره چې خلق مالِک خُدائ د هغوئ پلار نيکۀ خُدائ پاک ته واپس راوغواړى.

⁵هغۀ د يهوداه د پَخو دېوالونو په هر يو ښار کښې قاضيان مقرر کړل

⁶او هغوئ ته يې دا اصُول وښودل، ”په فېصلو کولو کښې د احتياط نه کار اخلئ، تاسو به د خلقو د خوښې په مطابق فېصلې نۀ کوئ، بلکه د مالِک خُدائ په مرضۍ به کارکوئ او چې کله تاسو يوه فېصله کوئ نو مالِک خُدائ به ستاسو مل وى.

⁷د مالِک خُدائ نه په يره کښې اوسئ او په فېصلو کولو کښې د احتياط نه کار اخلئ، ځکه چې د مالِک خُدائ زمونږ د خُدائ پاک سره نۀ بې اِنصافى شته، نۀ طرفدارے او نه رشوت.“

⁸يهوسفط په يروشلم کښې ليويان، اِمامان او د ښار څۀ مشران اوسېدونکى قاضيان مقرر کړل، چې د مالِک خُدائ دپاره فېصلې کوى، او د يروشلم د اوسېدونکو لانجې هواروى.

⁹هغۀ هغوئ ته دا اصُول وښودل، ”تاسو به خپلې ذِمه وارۍ خامخا د مالِک خُدائ په يره کښې او په وفادارۍ او د زړۀ د اخلاصه ادا کوئ.

¹⁰کله هم چې ستاسو د ښارونو نه د يو ښار اوسېدونکى ستاسو په وړاندې د قتل، يا د بل څۀ قانون يا حُکم ماتولو لانجه راوړى، نو تاسو خامخا په احتياط سره دا اصُول ورته ښايئ چې هغه به په عدالت کښې څنګه سلوک کوى، نو چې داسې هغوئ د مالِک خُدائ ګناهګار نۀ شى. که تاسو داسې ونۀ کړئ، نو تاسو او ستاسو د ښارونو اوسېدونکو ته به د مالِک خُدائ د غصې پته ولګى. خو که تاسو خپله ذِمه وارى پوره کوئ نو تاسو به ګناهګار نۀ شئ.

¹¹د ټولو مذهبى لانجو آخرى اِختيار به د مشر اِمام امرياه سره وى او د خلقو په مينځ کښې د ټولو لانجو آخرى اِختيار به د يهوداه د حُکمران د اِسمٰعيل زوئ زبدياه سره وى. د ليويانو ذِمه وارى د هغه فېصلو کتل دى کومې چې په عدالتُونو کښې کېږى. تکړه شئ او په دې اصُولو عمل کوئ او مالِک خُدائ د اِنصاف کونکو سره وى!“