Read Pashto Bible (Yusufzai) — د پښتو مقدس کتاب تاريخ دويم 22 Bible Online

تاريخ دويم 22 - Pashto Bible (Yusufzai) — د پښتو مقدس کتاب bible

تاريخ دويم 22

¹څۀ عربو حمله وکړه او د يهورام بادشاه د کشرى زوئ اخزياه نه بغېر يې د يهورام ټول زامن ووژل. نو بيا د يروشلم خلقو اخزياه د خپل پلار نه پس بادشاه جوړ کړو.

²اخزياه د دوويشتو کالو په عُمر کښې بادشاه جوړ شو او يو کال يې په يروشلم باندې بادشاهى وکړه د هغۀ مور عتلياه وه چې د عُمرى بادشاه نمسۍ وه.

³اخزياه د اخى‌اب د کورنۍ په نقش قدم باندې روان وو، ځکه چې د هغۀ مور عتلياه هغۀ ته بدې لارې ښودلې.

⁴هغۀ د مالِک خُدائ خِلاف ګناه وکړه، ځکه چې د هغۀ د پلار د مرګ نه پس د اخى‌اب د کورنۍ نور کسان د هغۀ مشيران شول او هغه يې د تباهۍ طرف ته بوتلو.

⁵د هغوئ په مشورو يې عمل کولو کله چې د شام بادشاه حِزائيل خِلاف يې په يو جنګ کښې د بنى اِسرائيلو د بادشاه يورام ملګرتيا وکړه. لښکرې په رامات جلعاد کښې په جنګ شوې او يورام په جنګ کښې زخمى شو.

⁶هغه د يزرعيل ښار ته ځکه راواپس شو چې د هغۀ زخمونه روغ شى او اخزياه هلته د مِلاوېدو دپاره ورَغلو.

⁷خُدائ پاک د يورام دا ملاقات د اخزياه د تباهۍ سبب وګرځولو. هغه او يورام، ياهُو زوئ د نِمسى سره ملاوېدو دپاره راوتل، کوم چې مالِک خُدائ د اخى‌اب شاهى کورنۍ د تباه کولو دپاره خوښ کړے وو.

⁸کله چې ياهُو د اخى‌اب په شاهى کورنۍ باندې د خُدائ پاک سزا راوستله، نو هغه د يهوداه د ډلې يو څو مشرانو او د اخزياه خپلوانو سره مِلاو شو چې هغوئ د اخزياه سره روان وُو نو ياهُو هغوئ ټول ووژل.

⁹اخزياه ولټولے شو او هغه په سامريه کښې پټ وو او هلته پېدا شو. هغوئ هغه ياهُو ته بوتلو او وې وژلو. خو هغوئ د هغۀ لاش د هغۀ نيکۀ يهوسفط بادشاه په خاطر په عزت سره ښخ کړو، ځکه يهوسفط د مالِک خُدائ د خِدمت دپاره هر څۀ کړى وُو. نو د اخزياه د کورنۍ داسې يو کس هم پاتې نۀ شو چې هغۀ بادشاهى کړے وے.

¹⁰څنګه چې د اخزياه بادشاه مور عتلياه د خپل زوئ د قتل نه خبر شوه، نو هغې دا حُکم ورکړو چې د يهوداه د شاهى کورنۍ ټول کسان دې ووژلے شى.

¹¹د اخزياه يوه ناسکه خور يهوسبع وه، د هغې وادۀ د يهويدع اِمام سره شوے وو. هغې په پټه باندې د اخزياه يو زوئ يوآس بچ کړو، هغه يې د هغه نورو شهزادګانو نه يوړو کوم چې قتل کېدونکے وو او هغه يې پټ کړو او ولې د اُودۀ کېدو په يوه کوټه کښې د هغۀ خيال ساتلو. نو داسې يهوسبع د هغۀ د پټ ساتلو په وجه باندې هغه د عتلياه د لاسه د مرګ نه بچ کړو.

¹²تر شپږو کالو پورې هغه هلته پټ وو کله چې عتلياه د مَلِکه په توګه بادشاهى کوله.